ਓਟਵਾ, 8 ਅਕਤੂਬਰ (ਪੋਸਟ ਬਿਊਰੋ) : ਫੈਡਰਲ ਸਰਕਾਰ ਫਿਲਹਾਲ ਟਰਾਂਸ ਮਾਊਨਟੇਨ ਪਾਈਪਲਾਈਨ ਪ੍ਰੋਜੈਕਟ ਨੂੰ ਵੇਚਣ ਬਾਰੇ ਨਹੀਂ ਸੋਚ ਰਹੀ ਹੈ। ਵਿੱਤ ਮੰਤਰੀ ਬਿੱਲ ਮੌਰਨਿਊ ਨੇ ਆਖਿਆ ਕਿ ਜਦੋਂ ਉਹ ਸਮਾਂ ਆਵੇਗਾ ਤੇ ਮੂਲਵਾਸੀ ਗਰੁੱਪ ਉਸ ਨੂੰ ਖਰੀਦਣਾ ਚਾਹੁਣਗੇ ਤਾਂ ਉਹ ਚੰਗੀ ਗੱਲ ਹੋਵੇਗੀ।
ਫੈਡਰਲ ਅਦਾਲਤ ਵੱਲੋਂ ਕੈਬਨਿਟ ਦੀ ਮਨਜ਼ੂਰੀ ਨੂੰ ਦਰਕਿਨਾਰ ਕਰਕੇ ਮੂਲਵਾਸੀ ਲੋਕਾਂ ਨਾਲ ਇਸ ਪ੍ਰੋਜੈਕਟ ਬਾਰੇ ਨਵੇਂ ਸਿਰੇ ਤੋਂ ਸਲਾਹ ਮਸ਼ਵਰਾ ਕਰਨ ਦੇ ਦਿੱਤੇ ਹੁਕਮਾਂ ਤੋਂ ਬਾਅਦ ਹਾਲ ਦੀ ਘੜੀ ਤਾਂ ਸੱਤਾਧਾਰੀ ਲਿਬਰਲ ਇਹ ਚਾਹੁੰਦੇ ਹਨ ਕਿ ਇਹ ਪ੍ਰੋਜੈਕਟ ਅੱਗੇ ਵਧੇ। ਬੁੱਧਵਾਰ ਨੂੰ ਸਰਕਾਰ ਨੇ ਇਹ ਐਲਾਨ ਕੀਤਾ ਸੀ ਕਿ ਸਾਬਕਾ ਸੁਪਰੀਮ ਕੋਰਟ ਦੇ ਜੱਜ ਦੀ ਮਦਦ ਨਾਲ ਉਹ ਮੂਲਵਾਸੀਆਂ ਨਾਲ ਇਸ ਮੁੱਦੇ ਉੱਤੇ ਮੁੜ ਗੱਲਬਾਤ ਕਰਨ ਜਾ ਰਹੀ ਹੈ। ਸਰਕਾਰ ਨੇ ਇਹ ਵੀ ਆਖਿਆ ਸੀ ਕਿ ਉਹ ਅਦਾਲਤ ਦੇ ਫੈਸਲੇ ਖਿਲਾਫ ਅਪੀਲ ਨਹੀਂ ਕਰਨਗੇ। ਇਸ ਤੋਂ ਇਲਾਵਾ ਫੈਡਰਲ ਸਰਕਾਰ ਤੱਟੀ ਪ੍ਰਭਾਵਾਂ ਬਾਰੇ ਨੈਸ਼ਨਲ ਐਨਰਜੀ ਬੋਰਡ ਦਾ ਮੁਲਾਂਕਣ ਵੀ ਲਾਂਚ ਕਰ ਚੁੱਕੀ ਹੈ।
ਮੌਰਨਿਊ ਨੇ ਇੱਕ ਇੰਟਰਵਿਊ ਵਿੱਚ ਆਖਿਆ ਇਸ ਸਮੇਂ ਅਸੀਂ ਅਜਿਹੀ ਸਥਿਤੀ ਵਿੱਚ ਨਹੀਂ ਹਾਂ ਕਿ ਪਾਈਪਲਾਈਨ ਨੂੰ ਵੇਚ ਸਕੀਏ ਜਾਂ ਇਸ ਦਾ ਪਸਾਰ ਕਰ ਸਕੀਏ। ਜਦੋਂ ਮੌਰਨਿਊ ਨੇ ਕਿੰਡਰ ਮੌਰਗਨ ਤੋਂ ਪਾਈਪਲਾਈਨ ਖਰੀਦਣ ਤੇ ਇਸ ਦਾ ਪਸਾਰ ਕਰਨ ਦਾ ਐਲਾਨ ਕੀਤਾ ਸੀ ਤਾਂ ਉਨ੍ਹਾਂ ਆਖਿਆ ਸੀ ਕਿ ਮੂਲਵਾਸੀ ਗਰੁੱਪਜ਼, ਪੈਨਸ਼ਨ ਫੰਡਜ਼ ਤੇ ਕਈ ਹੋਰਨਾਂ ਵੱਲੋਂ ਇਸ ਪ੍ਰੋਜੈਕਟ ਵਿੱਚ ਦਿਲਚਸਪੀ ਵਿਖਾਈ ਗਈ ਹੈ। ਉਨ੍ਹਾਂ ਇਹ ਵੀ ਆਖਿਆ ਸੀ ਕਿ ਇਹ ਕਮਰਸ਼ੀਅਲ ਅਗਰੀਮੈਂਟ ਨਿਵੇਸ਼ ਸਬੰਧੀ ਚੰਗਾਂ ਮੌਕਾ ਹੈ।