* ਅੱਤਵਾਦੀ ਨੇ ਬੰਬ ਨਾਲ ਖੁਦ ਨੂੰ ਉਡਾਇਆ
ਦਮਿਸ਼ਕ, 23 ਜੂਨ (ਪੋਸਟ ਬਿਊਰੋ): ਸੀਰੀਆ ਦੀ ਰਾਜਧਾਨੀ ਦਮਿਸ਼ਕ ਵਿੱਚ ਐਤਵਾਰ ਰਾਤ ਨੂੰ ਇੱਕ ਭਿਆਨਕ ਆਤਮਘਾਤੀ ਹਮਲੇ ਵਿੱਚ ਘੱਟੋ-ਘੱਟ 22 ਲੋਕ ਮਾਰੇ ਗਏ ਅਤੇ 63 ਜ਼ਖਮੀ ਹੋ ਗਏ। ਇਹ ਹਮਲਾ ਗ੍ਰੀਕ ਆਰਥੋਡਾਕਸ ਸੇਂਟ ਇਲਿਆਸ ਚਰਚ ਵਿੱਚ ਉਸ ਸਮੇਂ ਹੋਇਆ ਜਦੋਂ ਦਰਜਨਾਂ ਲੋਕ ਪ੍ਰਾਰਥਨਾ ਵਿੱਚ ਸ਼ਾਮਿਲ ਹੋ ਰਹੇ ਸਨ। ਇਹ ਘਟਨਾ ਉਦੋਂ ਵਾਪਰੀ ਜਦੋਂ ਇਸਲਾਮਿਕ ਸਟੇਟ ਨਾਲ ਸਬੰਧਤ ਇੱਕ ਅੱਤਵਾਦੀ ਚਰਚ ਵਿੱਚ ਦਾਖਲ ਹੋਇਆ, ਪਹਿਲਾਂ ਗੋਲੀਬਾਰੀ ਕੀਤੀ ਅਤੇ ਫਿਰ ਆਪਣੇ ਆਪ ਨੂੰ ਉਡਾ ਲਿਆ।
ਇਹ ਹਮਲਾ ਐਤਵਾਰ ਰਾਤ ਨੂੰ ਹੋਇਆ। ਚਸ਼ਮਦੀਦਾਂ ਅਨੁਸਾਰ, ਹਮਲਾਵਰ ਦੇ ਨਾਲ ਇੱਕ ਹੋਰ ਬੰਦੂਕਧਾਰੀ ਵੀ ਸੀ, ਉਸਨੇ ਭੀੜ 'ਤੇ ਗੋਲੀਬਾਰੀ ਵੀ ਕੀਤੀ ਪਰ ਉਸਨੇ ਧਮਾਕਾ ਨਹੀਂ ਕੀਤਾ। ਉਸ ਸਮੇਂ ਚਰਚ ਵਿੱਚ ਲਗਭਗ 150 ਤੋਂ 350 ਲੋਕ ਮੌਜੂਦ ਸਨ। ਧਮਾਕੇ ਕਾਰਨ ਅੰਦਰਲੇ ਬੈਂਚ ਚਕਨਾਚੂਰ ਹੋ ਗਏ।
ਸੀਰੀਆਈ ਸੁਰੱਖਿਆ ਬਲ ਹਮਲੇ ਦੀ ਜਾਂਚ ਕਰ ਰਹੇ ਹਨ ਅਤੇ ਚਰਚ ਖੇਤਰ ਨੂੰ ਘੇਰ ਲਿਆ ਗਿਆ ਹੈ। ਸਰਕਾਰ ਨੇ ਇਹ ਵੀ ਕਿਹਾ ਕਿ ਧਾਰਮਿਕ ਘੱਟ ਗਿਣਤੀਆਂ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾਵੇਗੀ। ਨਵੀਂ ਸਰਕਾਰ (ਹਯਾਤ ਤਹਿਰੀਰ ਅਲ-ਸ਼ਾਮ) ਦੇ ਸਾਬਕਾ ਇਸਲਾਮੀ ਬਾਗ਼ੀ ਆਗੂਆਂ ਦੁਆਰਾ ਚਲਾਈ ਜਾ ਰਹੀ ਹੈ, ਜੋ ਪਹਿਲਾਂ ਵੀ ਆਈ ਐੱਸ ਵਿਰੁੱਧ ਲੜ ਚੁੱਕੇ ਹਨ।