-ਕਿਹਾ- ਜੇ ਸਿੰਧੂ ਦਾ ਪਾਣੀ ਰੋਕਿਆ ਤਾਂ ਜੰਗ ਲਈ ਤਿਆਰ ਰਹੋ
ਇਸਲਾਮਾਬਾਦ, 27 ਅਪ੍ਰੈਲ (ਪੋਸਟ ਬਿਊਰੋ): ਪਾਕਿਸਤਾਨੀ ਰੇਲ ਮੰਤਰੀ ਹਨੀਫ਼ ਅੱਬਾਸੀ ਨੇ ਭਾਰਤ 'ਤੇ ਪਰਮਾਣੂ ਬੰਬ ਹਮਲੇ ਦੀ ਧਮਕੀ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਭਾਰਤ ਲਈ ਸ਼ਾਹੀਨ, ਘੋਰੀ ਅਤੇ ਗਜ਼ਨਵੀ ਵਰਗੀਆਂ 130 ਮਿਜ਼ਾਈਲਾਂ ਰੱਖੀਆਂ ਹਨ।
ਜੇਕਰ ਭਾਰਤ ਸਿੰਧੂ ਜਲ ਸੰਧੀ ਨੂੰ ਰੋਕਦਾ ਹੈ, ਤਾਂ ਅਸੀਂ ਉਸਦਾ ਸਾਹ ਲੈਣਾ ਵੀ ਬੰਦ ਕਰ ਦੇਵਾਂਗੇ। ਭਾਰਤ ਨੂੰ ਜੰਗ ਲਈ ਤਿਆਰ ਰਹਿਣਾ ਚਾਹੀਦਾ ਹੈ। ਪਾਕਿਸਤਾਨ ਦੇ ਪਰਮਾਣੂ ਹਥਿਆਰ ਸਿਰਫ਼ ਸਜਾਵਟ ਲਈ ਨਹੀਂ ਰੱਖੇ ਜਾਂਦੇ, ਸਗੋਂ ਅਸੀਂ ਦੇਸ਼ ਭਰ ਵਿੱਚ ਕਈ ਥਾਵਾਂ 'ਤੇ ਪਰਮਾਣੂ ਹਥਿਆਰ ਲੁਕਾਏ ਹੋਏ ਹਨ।
ਅੱਬਾਸੀ ਨੇ ਕਿਹਾ ਕਿ ਸਾਡੀਆਂ ਮਿਜ਼ਾਈਲਾਂ ਭਾਰਤ ਵੱਲ ਨਿਸ਼ਾਨਾ ਹਨ। ਭਾਰਤ ਨੂੰ ਇਹ ਵੀ ਪਤਾ ਹੈ ਕਿ ਸਾਡੇ ਕੋਲ ਹਥਿਆਰ ਹਨ, ਇਸ ਲਈ ਉਹ ਸਾਡੇ 'ਤੇ ਹਮਲਾ ਨਹੀਂ ਕਰ ਰਹੇ।
ਅੱਬਾਸੀ ਨੇ ਕਿਹਾ ਕਿ ਭਾਰਤ ਆਪਣੀਆਂ ਸੁਰੱਖਿਆ ਕਮੀਆਂ ਨੂੰ ਸਵੀਕਾਰ ਕਰਨ ਦੀ ਬਜਾਏ ਪਹਿਲਗਾਮ ਹਮਲੇ ਲਈ ਪਾਕਿਸਤਾਨ ਨੂੰ ਜਿ਼ੰਮੇਵਾਰ ਠਹਿਰਾ ਰਿਹਾ ਹੈ। ਇਸਲਾਮਾਬਾਦ ਆਪਣੇ ਵਿਰੁੱਧ ਕੀਤੀ ਗਈ ਕਿਸੇ ਵੀ ਆਰਥਿਕ ਕਾਰਵਾਈ ਦਾ ਜਵਾਬ ਦੇਣ ਲਈ ਤਿਆਰ ਹੈ।
ਹਨੀਫ਼ ਅੱਬਾਸੀ ਨੇ ਭਾਰਤ ਵੱਲੋਂ ਪਾਕਿਸਤਾਨ ਨੂੰ ਪਾਣੀ ਦੀ ਸਪਲਾਈ ਰੋਕਣ ਅਤੇ ਵਪਾਰਕ ਸਬੰਧਾਂ ਨੂੰ ਖਤਮ ਕਰਨ ਦੇ ਕਦਮ ਦਾ ਮਜ਼ਾਕ ਉਡਾਇਆ। ਉਨ੍ਹਾਂ ਕਿਹਾ ਕਿ ਪਾਕਿਸਤਾਨ ਨੇ ਭਾਰਤ ਲਈ ਆਪਣਾ ਹਵਾਈ ਖੇਤਰ ਬੰਦ ਕਰ ਦਿੱਤਾ ਹੈ। ਇਸ ਕਾਰਨ, ਭਾਰਤ ਦਾ ਹਵਾਬਾਜ਼ੀ ਉਦਯੋਗ ਸਿਰਫ਼ ਦੋ ਦਿਨਾਂ ਵਿੱਚ ਹੀ ਮੁਸੀਬਤ ਵਿੱਚ ਪੈ ਗਿਆ। ਭਾਰਤ ਨੂੰ ਆਪਣੀ ਗਲਤੀ ਦਾ ਅਹਿਸਾਸ ਹੋ ਗਿਆ ਹੈ। ਜੇਕਰ ਅਸੀਂ ਹਵਾਈ ਖੇਤਰ ਨੂੰ 10 ਦਿਨਾਂ ਲਈ ਬੰਦ ਰੱਖਦੇ ਹਾਂ, ਤਾਂ ਭਾਰਤੀ ਏਅਰਲਾਈਨਾਂ ਦੀਵਾਲੀਆ ਹੋ ਜਾਣਗੀਆਂ।