ਬਰਨ, 18 ਜੂਨ (ਪੋਸਟ ਬਿਊਰੋ): ਭਾਰਤੀ ਮੂਲ ਦੇ ਅਰਬਪਤੀ ਹਿੰਦੂਜਾ ਪਰਿਵਾਰ 'ਤੇ ਘਰੇਲੂ ਕਰਮਚਾਰੀਆਂ ਨਾਲ ਬੇਰਹਿਮੀ ਨਾਲ ਪੇਸ਼ ਆਉਣ ਦਾ ਦੋਸ਼ ਹੈ। ਜਾਣਕਾਰੀ ਮੁਤਾਬਕ ਇਨ੍ਹਾਂ ਨੇ ਸਵਿਟਜ਼ਰਲੈਂਡ 'ਚ ਆਪਣੇ ਵਿਲਾ 'ਚ ਘਰੇਲੂ ਸਟਾਫ ਨੂੰ ਬਹੁਤ ਘੱਟ ਕੀਮਤ 'ਤੇ 15 ਤੋਂ 18 ਘੰਟੇ ਕੰਮ ਕਰਵਾਇਆ। ਸੋਮਵਾਰ ਤੋਂ ਸਵਿਟਜ਼ਰਲੈਂਡ 'ਚ ਉਨ੍ਹਾਂ ਖਿਲਾਫ ਮਨੁੱਖੀ ਤਸਕਰੀ ਦੀ ਸੁਣਵਾਈ ਸ਼ੁਰੂ ਹੋ ਗਈ ਹੈ।
ਸਰਕਾਰੀ ਵਕੀਲ ਨੇ ਦੋਸ਼ੀਆਂ ਨੂੰ ਘੱਟੋ-ਘੱਟ ਇੱਕ ਸਾਲ ਦੀ ਸਜ਼ਾ ਦੇਣ ਦੀ ਮੰਗ ਕੀਤੀ ਹੈ। ਬਲੂਮਬਰਗ ਨੇ ਦੱਸਿਆ ਕਿ ਇਕ ਹੋਰ ਸਰਕਾਰੀ ਵਕੀਲ ਨੇ ਅਦਾਲਤ 'ਚ ਦੋਸ਼ ਲਗਾਇਆ ਹੈ ਕਿ ਹਿੰਦੂਜਾ ਆਪਣੇ ਸਟਾਫ ਦੀ ਬਜਾਏ ਆਪਣੇ ਕੁੱਤਿਆਂ 'ਤੇ ਜਿ਼ਆਦਾ ਖਰਚ ਕਰਦਾ ਸੀ। ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਇਸ ਦੌਰਾਨ ਉਨ੍ਹਾਂ ਨੇ ਸਟਾਫ਼ ਦੇ ਪਾਸਪੋਰਟ ਵੀ ਜ਼ਬਤ ਕਰ ਲਏ ਸਨ।
ਰਿਪੋਰਟ 'ਚ ਦਾਅਵਾ ਕੀਤਾ ਗਿਆ ਹੈ ਕਿ ਹਿੰਦੂਜਾ ਪਰਿਵਾਰ ਜਨੇਵਾ 'ਚ 'ਲੇਕ ਵਿਲਾ' 'ਚ ਆਪਣੇ ਸਟਾਫ ਨੂੰ ਲਗਭਗ 18 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਅਦਾ ਕਰਦਾ ਸੀ, ਇਹ ਪੈਸਾ ਉਨ੍ਹਾਂ ਨੂੰ ਭਾਰਤੀ ਰੁਪਏ 'ਚ ਦਿੱਤਾ ਗਿਆ ਸੀ। ਉਹ ਇਸ ਪੈਸੇ ਨੂੰ ਉੱਥੇ ਵਰਤਣ ਦੇ ਯੋਗ ਵੀ ਨਹੀਂ ਸਨ।
ਜਾਣਕਾਰੀ ਮੁਤਾਬਕ ਸਰਕਾਰੀ ਵਕੀਲ ਨੇ ਅਦਾਲਤ 'ਚ ਦਾਅਵਾ ਕੀਤਾ ਕਿ ਹਿੰਦੂਜਾ ਪਰਿਵਾਰ ਦੇ ਵਿਲਾ 'ਚ ਕਰਮਚਾਰੀਆਂ ਲਈ ਨਾ ਤਾਂ ਕੰਮ ਦੇ ਨਿਸ਼ਚਿਤ ਘੰਟੇ ਹਨ ਅਤੇ ਨਾ ਹੀ ਉਨ੍ਹਾਂ ਦੀ ਹਫਤਾਵਾਰੀ ਛੁੱਟੀ ਦਾ ਕੋਈ ਨਿਸ਼ਚਿਤ ਸਮਾਂ ਹੈ। ਇਨ੍ਹਾਂ ਸਟਾਫ਼ ਨੂੰ ਨੌਕਰੀ ਛੱਡਣ ਦੀ ਵੀ ਇਜਾਜ਼ਤ ਨਹੀਂ ਹੈ। ਉਨ੍ਹਾਂ ਨੂੰ ਬਿਨ੍ਹਾਂ ਇਜਾਜ਼ਤ ਘਰੋਂ ਬਾਹਰ ਨਿਕਲਣ ਦੀ ਇਜਾਜ਼ਤ ਨਹੀਂ ਹੈ।