ਲੁੰਗਾ, 9 ਅਪ੍ਰੈਲ (ਪੋਸਟ ਬਿਊਰੋ) : ਮੋਜ਼ਾਮਬਿਕ ਵਿੱਚ ਕਿਸ਼ਤੀ ਹਾਦਸੇ ਤੋਂ ਬਾਅਦ ਮਰਨ ਵਾਲਿਆਂ ਦੀ ਗਿਣਤੀ ਵੱਧ ਕੇ 98 ਹੋ ਗਈ ਹੈ। ਮਰਨ ਵਾਲਿਆਂ ਵਿੱਚ ਕਈ ਬੱਚੇ ਵੀ ਸ਼ਾਮਲ ਹਨ। ਇਹ ਘਟਨਾ ਉਦੋਂ ਵਾਪਰੀ ਜਦੋਂ ਲੁੰਗਾ ਵਿੱਚ ਕਥਿਤ ਹੈਜ਼ੇ ਦੇ ਪ੍ਰਕੋਪ ਤੋਂ ਭੱਜ ਰਹੇ ਸਥਾਨਕ ਨਿਵਾਸੀਆਂ ਨੂੰ ਲੈ ਕੇ ਜਾ ਰਹੀ ਇੱਕ ਕਿਸ਼ਤੀ ਦੇਸ਼ ਦੇ ਉੱਤਰੀ ਤੱਟ 'ਤੇ ਡੁੱਬ ਗਈ। ਕਿਸ਼ਤੀ ਵਿੱਚ ਸਮਰੱਥਾ ਤੋਂ ਵੱਧ ਲੋਕ ਸਵਾਰ ਸਨ। ਕਿਸ਼ਤੀ ਐਤਵਾਰ ਨੂੰ ਦੱਖਣੀ-ਪੂਰਬੀ ਅਫਰੀਕੀ ਦੇਸ਼ ਮੋਜ਼ਾਮਬਿਕ ਦੇ ਟਾਪੂ ਲਈ ਤੱਟ ਤੋਂ ਨਿਕਲਣ ਤੋਂ ਬਾਅਦ ਡੁੱਬ ਗਈ। ਕਿਸ਼ਤੀ 'ਤੇ ਕਰੀਬ 130 ਲੋਕ ਸਵਾਰ ਸਨ ਅਤੇ ਘੱਟੋ-ਘੱਟ 11 ਲੋਕਾਂ ਨੂੰ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ।
ਜ਼ਿਆਦਾਤਰ ਲਾਸ਼ਾਂ ਐਤਵਾਰ ਨੂੰ ਬਰਾਮਦ ਕੀਤੀਆਂ ਗਈਆਂ ਸਨ, ਪਰ ਸੋਮਵਾਰ ਨੂੰ ਸੱਤ ਹੋਰ ਲਾਸ਼ਾਂ ਮਿਲੀਆਂ, ਜਿਸ ਨਾਲ ਮਰਨ ਵਾਲਿਆਂ ਦੀ ਗਿਣਤੀ 91 ਤੋਂ 98 ਹੋ ਗਈ। ਬਚਾਅ ਕਾਰਜ ਜਾਰੀ ਹਨ, ਕਿੰਨੇ ਲੋਕ ਲਾਪਤਾ ਹਨ ਦੱਸਣਾ ਮੁਸ਼ਕਲ ਹੈ।
ਕਿਸ਼ਤੀ ਦੇ ਡੁੱਬਣ ਲਈ ਮੁਸਾਫਰਾਂ ਲਈ ਅਣਉਚਿਤ ਕਿਸ਼ਤੀ ਦੀ ਵਰਤੋਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਗਿਆ ਹੈ। ਕਿਸ਼ਤੀ ਨੂੰ ਆਮ ਤੌਰ 'ਤੇ ਮੱਛੀਆਂ ਫੜ੍ਹਨ ਲਈ ਵਰਤਿਆ ਜਾਂਦਾ ਸੀ ਅਤੇ ਲੁੰਗਾ ਸ਼ਹਿਰ ਦੇ ਲੋਕ ਹੈਜ਼ੇ ਤੋਂ ਬਚਣ ਲਈ ਮੋਜ਼ਾਮਬਿਕ ਦੇ ਟਾਪੂ ਵੱਲ ਜਾਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਸਥਾਨਕ ਲੋਕਾਂ ਦਾ ਮੰਨਣਾ ਹੈ ਕਿ ਲੁੰਗਾ ਵਿੱਚ ਹੈਜ਼ੇ ਦੇ ਮਾਮਲਿਆਂ ਵਿੱਚ ਅਚਾਨਕ ਵਾਧਾ ਹੋਇਆ ਹੈ।