ਵਾਸ਼ਿੰਗਟਨ, 17 ਸਤੰਬਰ (ਪੋਸਟ ਬਿਊਰੋ): ਗੂਗਲ ਦੇ ਸਹਿ-ਸੰਸਥਾਪਕ ਸਰਗੇਈ ਬ੍ਰਿਨ ਨੇ ਆਪਣੀ ਪਤਨੀ ਨਿਕੋਲ ਸ਼ਨਾਹਨ ਨੂੰ ਤਲਾਕ ਦੇ ਦਿੱਤਾ ਹੈ। ਨਿਕੋਲ ਪੇਸ਼ੇ ਤੋਂ ਬਿਜ਼ਨੈੱਸ ਵੂਮੈਨ ਅਤੇ ਵਕੀਲ ਹੈ ਅਤੇ ਮੀਡੀਆ ਰਿਪੋਰਟਾਂ ਮੁਤਾਬਕ ਉਨ੍ਹਾਂ ਦਾ ਟੇਸਲਾ ਦੇ ਸੰਸਥਾਪਕ ਐਲੋਨ ਮਸਕ ਨਾਲ ਅਫੇਅਰ ਚੱਲ ਰਿਹਾ ਹੈ।
ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ ਸਰਗੇਈ ਅਤੇ ਨਿਕੋਲ ਦੇ ਤਲਾਕ ਦੀ ਪ੍ਰਕਿਰਿਆ 26 ਮਈ ਨੂੰ ਪੂਰੀ ਹੋ ਗਈ ਸੀ। ਦੋਵਾਂ ਕੋਲ ਆਪਣੀ 4 ਸਾਲਾ ਬੇਟੀ ਦੀ ਸਾਂਝੀ ਕਸਟਡੀ ਹੋਵੇਗੀ।
ਨਿਕੋਲ ਨੇ ਤਲਾਕ ਦਾ ਵਿਰੋਧ ਨਹੀਂ ਕੀਤਾ। ਦੋਨਾਂ ਨੇ 2015 ਵਿੱਚ ਡੇਟਿੰਗ ਸ਼ੁਰੂ ਕੀਤੀ ਅਤੇ 2018 ਵਿੱਚ ਵਿਆਹ ਕਰ ਲਿਆ। ਸਰਗੇਈ ਨੇ ਆਪਣੀ ਪਹਿਲੀ ਪਤਨੀ ਐਨੀ ਵੋਜਿਕੀ ਨਾਲ ਤਲਾਕ ਹੋਣ ਤੋਂ ਬਾਅਦ ਹੀ ਨਿਕੋਲ ਨਾਲ ਵਿਆਹ ਕਰਵਾ ਲਿਆ। ਹਾਲਾਂਕਿ, 2021 ਤੋਂ, ਸਰਗੇਈ ਅਤੇ ਨਿਕੋਲ ਵੱਖ-ਵੱਖ ਰਹਿ ਰਹੇ ਸਨ।
ਬ੍ਰਿਨ ਨੇ 2022 ਵਿੱਚ ਤਲਾਕ ਲਈ ਦਾਇਰ ਕੀਤੀ ਸੀ। ਜਾਣਕਾਰੀ ਮੁਤਾਬਕ ਇਸ ਤੋਂ ਠੀਕ ਇਕ ਮਹੀਨਾ ਪਹਿਲਾਂ ਹੀ ਨਿਕੋਲ ਅਤੇ ਮਸਕ ਦੇ ਅਫੇਅਰ ਦੀਆਂ ਖਬਰਾਂ ਵਾਇਰਲ ਹੋਣੀਆਂ ਸ਼ੁਰੂ ਹੋ ਗਈਆਂ ਸਨ। ਨਿਕੋਲ ਸ਼ਨਾਹਨ ਅਤੇ ਐਲੋਨ ਮਸਕ ਇੱਕ ਦੂਜੇ ਨੂੰ ਲੰਬੇ ਸਮੇਂ ਤੋਂ ਜਾਣਦੇ ਹਨ। ਦੋਹਾਂ ਨੇ ਆਪਣੇ ਅਫੇਅਰ ਦੀਆਂ ਖਬਰਾਂ ਨੂੰ ਪੂਰੀ ਤਰ੍ਹਾਂ ਖਾਰਿਜ ਕਰ ਦਿੱਤਾ ਹੈ।