ਅੰਮ੍ਰਿਤਸਰ, 26 ਸਤੰਬਰ (ਪੋਸਟ ਬਿਊਰੋ)- ਗੌਰਮਿੰਟ ਮੈਡੀਕਲ ਕਾਲਜ ਅੰਮ੍ਰਿਤਸਰ (ਜੀ ਐੱਮ ਸੀ) ਦੇ ਵਿਦਿਆਰਥੀ-ਵਿਦਿਆਰਥਣਾਂ ਜੀਂਸ, ਟੀ-ਸ਼ਰਟ, ਕੈਪਰੀ ਅਤੇ ਸਕਰਟ ਨਹੀਂ ਪਹਿਨ ਸਕਣਗੇ।
ਕਾਲਜ ਦੀ ਪ੍ਰਿੰਸੀਪਲ ਡਾਕਟਰ ਸੁਜਾਤਾ ਸ਼ਰਮਾ ਨੇ ਲਿਖਤੀ ਹੁਕਮ ਜਾਰੀ ਕਰ ਕੇ ਕਿਹਾ ਹੈ ਕਿ ਵਿਦਿਆਰਥਣਾਂ ਸਕਰਟ, ਕੈਪਰੀ, ਟੀ-ਸ਼ਰਟ,ਜੀਨਸ ਨਹੀਂ ਪਹਿਨ ਸਕਣਗੀਆਂ ਅਤੇ ਲੜਕਿਆਂ ਨੂੰ ਜੀਨਸ ਅਤੇ ਟੀ-ਸ਼ਰਟ ਦੀ ਬਜਾਏ ਫਾਰਮਲ ਟ੍ਰਾਊਜ਼ਰ ਅਤੇ ਟੀ-ਸ਼ਰਟ ਪਹਿਨ ਕੇ ਕਾਲਜ ਵਿੱਚ ਆਉਣਾ ਹੋਵੇਗਾ। ਬੀਤੇ ਦਿਨ ਡਾਕਟਰ ਸੁਜਾਤਾ ਸ਼ਰਮਾ ਨੇ ਮੈਡੀਕਲ ਕਾਲਜ ਦੇ ਸਾਰੇ ਵਿਭਾਗਾਂ ਦੇ ਇੰਚਾਰਜਾਂ, ਹੋਸਟਲ ਸੁਪਰਡੈਂਟ, ਕਾਲਜ ਸੁਪਰਡੈਂਟ ਨੂੰ ਇਹ ਪੱਤਰ ਜਾਰੀ ਕਰ ਕੇ ਸਪੱਸ਼ਟ ਕਰ ਦਿੱਤਾ ਕਿ ਉਹ ਇਹ ਯਕੀਨੀ ਕਰਨ ਕਿ ਕੋਈ ਸਟੂਡੈਂਟ ਜੀਂਸ, ਟੀ-ਸ਼ਰਟ, ਕੈਪਰੀ ਜਾਂ ਸਕਰਟ ਪਹਿਨ ਕੇ ਕਾਲਜ ਵਿੱਚ ਨਾ ਆਵੇ। ਮੈਡੀਕਲ ਕਾਲਜ ਵਿੱਚ ਐੱਮ ਬੀ ਬੀ ਐੱਸ, ਬੀ ਐੱਮ ਸੀ, ਡਿਪਲੋਮਾ ਕੋਰਸ ਅਤੇ ਇੰਟਰਨਸ਼ਿਪ ਕਰ ਰਹੇ ਵਿਦਿਆਰਥੀ ਤੈਅ ਡ੍ਰੈੱਸ ਕੋਡ ਦਾ ਪਾਲਣ ਕਰਨ। ਵਿਦਿਆਰਥਣਾਂ ਸਲਵਾਰ-ਸੂਟ ਜਾਂ ਟ੍ਰਾਊਜ਼ਰ-ਸ਼ਰਟ ਪਹਿਨ ਕੇ ਆਉਣ ਅਤੇ ਲੜਕੇ ਫਾਰਮਲ ਟ੍ਰਾਊਜਰ ਅਤੇ ਸ਼ਰਟ ਅਤੇ ਉਸ ਉਤੇ ਸਫੇਦ ਐਪਰਿਨ ਪਹਿਨ ਕੇ ਆਪਣੀ ਕਲਾਸਾਂ ਅਤੇ ਵਿਭਾਗਾਂ ਵਿੱਚ ਆਉਣ। ਡਾਕਟਰ ਸੁਜਾਤਾ ਸ਼ਰਮਾ ਨੇ ਸਾਫ ਕੀਤਾ ਕਿ ਵਿਦਿਆਰਥੀ-ਵਿਦਿਆਰਥਣਾਂ ਟੀ-ਸ਼ਰਟ, ਕੈਪਰੀ, ਜੀਨਸ ਅਤੇ ਸਕਰਟ ਪਹਿਨ ਕੇ ਕਾਲਜ ਆਉਂਦੇ ਹਨ, ਜੋ ਦੇਖਣ ਨੂੰ ਮਾੜਾ ਲੱਗਦਾ ਹੈ। ਜੇ ਕੋਈ ਵਿਦਿਆਥੀ ਇਸ ਹੁਕਮ ਦਾ ਉਲੰਘਣਾ ਕਰਦਾ ਹੈ ਤਾਂ ਉਸ ਦਾ ਨਾਂਅ, ਰੋਲ ਨੰਬਰ ਅਤੇ ਕਲਾਸ ਦੀ ਜਾਣਕਾਰੀ ਉਨ੍ਹਾਂ ਨੂੰ ਦਿੱਤੀ ਜਾਏ। ਪ੍ਰਿੰਸੀਪਲ ਨੇ ਸਪੱਸ਼ਟ ਕੀਤਾ ਹੈ ਕਿ ਇੱਕ ਅਕਤੂਬਰ ਤੋਂ ਸਾਰੇ ਵਿਦਿਆਰਥੀ ਡ੍ਰੈੱਸ ਕੋਡ ਦਾ ਪਾਲਣ ਕਰਨਗੇ।
ਦੂਸਰੇ ਪਾਸੇ ਪ੍ਰਿੰਸੀਪਲ ਦੇ ਇਸ ਹੁਕਮ ਦਾ ਮੈਡੀਕਲ ਕਾਲਜ ਵਿੱਚ ਵਿਰੋਧ ਸ਼ੁਰੂ ਹੋ ਗਿਆ ਹੈ। ਸਟੂਡੈਂਟਸ ਬਾਡੀ ਜੀ ਐੱਸ ਐੱਮ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਇਸ ਹੁਕਮ ਨਾਲ ਸਹਿਮਤ ਨਹੀਂ ਹਨ।