ਕਾਠਮੰਡੂ, 24 ਮਈ (ਪੋਸਟ ਬਿਊਰੋ): ਨੇਪਾਲ ਵਿੱਚ ਸ਼ਰਨਾਰਥੀ ਘੁਟਾਲੇ ਵਿੱਚ ਸਰਕਾਰੀ ਵਕੀਲਾਂ ਨੇ ਬੁੱਧਵਾਰ ਨੂੰ ਇੱਕ ਅਦਾਲਤ ਵਿੱਚ 30 ਲੋਕਾਂ ਖਿ਼ਲਾਫ਼ ਕੇਸ ਦਾਇਰ ਕੀਤਾ।ਮੁਲਜ਼ਮਾਂ ਵਿੱਚ ਸਾਬਕਾ ਉਪ ਪ੍ਰਧਾਨ ਮੰਤਰੀ ਸਿਖਰ ਬਹਾਦੁਰ ਰਾਏਮਾਝੀ, ਸਾਬਕਾ ਗ੍ਰਹਿ ਮੰਤਰੀ ਬਾਲ ਕ੍ਰਿਸ਼ਨ ਖਾਂਡ ਅਤੇ ਉੱਘੇ ਅਧਿਕਾਰ ਕਾਰਕੁਨ ਟੇਕ ਨਾਥ ਰਿਜਾਲ ਸਮੇਤ ਕਈ ਸਿਆਸਤਦਾਨ ਸ਼ਾਮਲ ਹਨ।ਇਨ੍ਹਾਂ ਲੋਕਾਂ 'ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਨੇਪਾਲੀ ਨਾਗਰਿਕਾਂ ਤੋਂ ਪੈਸੇ ਲਏ ਸਨ ਅਤੇ ਬਦਲੇ 'ਚ ਉਨ੍ਹਾਂ ਨੂੰ ਯੋਗ ਭੂਟਾਨੀ ਸ਼ਰਨਾਰਥੀ ਵਜੋਂ ਪਛਾਣ ਵਾਲੇ ਦਸਤਾਵੇਜ਼ ਮੁਹੱਈਆ ਕਰਵਾਉਣ ਦਾ ਵਾਅਦਾ ਕੀਤਾ ਸੀ, ਤਾਂ ਜੋ ਉਹ ਦੂਜੇ ਦੇਸ਼ਾਂ 'ਚ ਸ਼ਰਣ ਲੈ ਸਕਣ।
ਇਸ ਮਾਮਲੇ ਨੇ ਨੇਪਾਲ ਦੀ ਰਾਜਨੀਤੀ ਵਿੱਚ ਹਲਚਲ ਮਚਾ ਦਿੱਤੀ ਹੈ ਕਿਉਂਕਿ ਗ੍ਰਿਫ਼ਤਾਰ ਕੀਤੇ ਗਏ ਨੇਤਾ ਸੱਤਾਧਾਰੀ ਗਠਜੋੜ ਅਤੇ ਵਿਰੋਧੀ ਧਿਰ ਦੋਵਾਂ ਨਾਲ ਸਬੰਧਤ ਹਨ।ਹਫ਼ਤਿਆਂ ਦੀ ਜਾਂਚ ਤੋਂ ਬਾਅਦ ਸਰਕਾਰੀ ਵਕੀਲਾਂ ਨੇ ਕਾਠਮੰਡੂ ਜਿ਼ਲ੍ਹਾ ਅਦਾਲਤ ਵਿੱਚ ਕੇਸ ਦਾਇਰ ਕੀਤਾ ਹੈ।ਕਾਰਕੁਨ ਰਿਜ਼ਲ ਨੇ ਭੂਟਾਨ ਵਿੱਚ ਘੱਟ ਗਿਣਤੀ ਨੇਪਾਲੀਆਂ ਦੇ ਅਧਿਕਾਰਾਂ ਲਈ ਮੁਹਿੰਮ ਚਲਾਈ ਅਤੇ ਭੂਟਾਨ ਦੀ ਸਰਕਾਰ ਦੁਆਰਾ ਉਸਨੂੰ ਕਈ ਸਾਲਾਂ ਤੱਕ ਜੇਲ੍ਹ ਵਿੱਚ ਰੱਖਿਆ ਗਿਆ ਅਤੇ ਬਾਅਦ ਵਿੱਚ ਨੇਪਾਲ ਭੇਜ ਦਿੱਤਾ ਗਿਆ।ਪੁਲਸ ਨੇ 16 ਮੁਲਜ਼ਮਾਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ ਅਤੇ ਬਾਕੀਆਂ ਦੀ ਭਾਲ ਕੀਤੀ ਜਾ ਰਹੀ ਹੈ।