ਬਰਮਾ, 23 ਮਈ (ਪੋਸਟ ਬਿਊਰੋ): ਮਿਆਂਮਾਰ ਦੀ ਥਾਈਲੈਂਡ ਨਾਲ ਲੱਗਦੀ ਸਰਹੱਦ 'ਤੇ ਮਿਆਂਮਾਰ ਦੀ ਫੌਜ ਅਤੇ ਫੌਜੀ ਸ਼ਾਸਨ ਵਿਰੋਧੀ ਬਾਗੀਆਂ ਵਿਚਾਲੇ ਭਿਆਨਕ ਲੜਾਈ ਜਾਰੀ ਹੈ। ਇਹ ਖੇਤਰ ਮਿਆਂਮਾਰ ਦੇ ਨਸਲੀ ਘੱਟ-ਗਿਣਤੀ ਭਾਈਚਾਰਿਆਂ ਦਾ ਘਰ ਹੈ, ਜਿਨ੍ਹਾਂ ਨੇ ਦੇਸ਼ ਦੀ ਫੌਜ ਦੇ ਖਿਲਾਫ ਹਥਿਆਰਬੰਦ ਬਗਾਵਤ ਕੀਤੀ ਹੈ। ਲੜਾਈ ਨੇ ਇੱਕ ਵੱਡੇ ਆਰਥਿਕ ਵਿਕਾਸ ਪ੍ਰੋਜੈਕਟ 'ਤੇ ਕੰਮ ਠੱਪ ਕਰ ਦਿੱਤਾ ਹੈ। ਇਸ ਪ੍ਰੋਜੈਕਟ ਦੇ ਮੁਕੰਮਲ ਹੋਣ ਤੋਂ ਬਾਅਦ ਮਿਆਂਮਾਰ ਦੇ ਮੇਕਾਂਗ ਡੈਲਟਾ ਦੇਸ਼ਾਂ ਨਾਲ ਵਪਾਰ ਵਿੱਚ ਭਾਰੀ ਵਾਧਾ ਹੋਣ ਦੀ ਸੰਭਾਵਨਾ ਹੈ।
ਮਿਆਂਮਾਰ, ਥਾਈਲੈਂਡ, ਲਾਉਸ, ਕੰਬੋਡੀਆ ਅਤੇ ਵੀਅਤਨਾਮ ਮੇਕਾਂਗ ਡੈਲਟਾ ਖੇਤਰ ਵਿੱਚ ਆਉਂਦੇ ਹਨ। ਇਨ੍ਹਾਂ ਦੇਸ਼ਾਂ ਨੂੰ ਜੋੜਨ ਲਈ 1700 ਕਿਲੋਮੀਟਰ ਲੰਬੇ ਪੂਰਬ-ਪੱਛਮੀ ਆਰਥਿਕ ਗਲਿਆਰੇ ਦੇ ਨਿਰਮਾਣ ਦਾ ਕੰਮ ਸ਼ੁਰੂ ਕੀਤਾ ਗਿਆ ਸੀ। ਜਦੋਂ ਦੋ ਸਾਲ ਪਹਿਲਾਂ ਮਿਆਂਮਾਰ ਵਿੱਚ ਫੌਜ ਨੇ ਚੁਣੀ ਹੋਈ ਸਰਕਾਰ ਦਾ ਤਖਤਾ ਪਲਟ ਦਿੱਤਾ ਸੀ ਤਾਂ ਇਸ ਪ੍ਰਾਜੈਕਟ 'ਤੇ ਕੰਮ ਪੂਰਾ ਹੋਣ ਦੇ ਨੇੜੇ ਸੀ। ਨਸਲੀ ਘੱਟਗਿਣਤੀ ਬਾਗੀਆਂ ਨੇ ਫਿਰ ਹਥਿਆਰਬੰਦ ਬਗਾਵਤ ਦਾ ਰਾਹ ਫੜ ਲਿਆ।
ਥਾਈਲੈਂਡ ਅਤੇ ਮਿਆਂਮਾਰ ਵਿਚਕਾਰ ਟਰੱਕ ਟਰਾਂਸਪੋਰਟ ਸੇਵਾਵਾਂ ਪ੍ਰਦਾਨ ਕਰਨ ਵਾਲੀ ਇੱਕ ਜਾਪਾਨੀ ਕੰਪਨੀ ਦੇ ਇੱਕ ਕਰਮਚਾਰੀ ਨੇ ਦੱਸਿਆ ਕਿ ਅਚਾਨਕ ਅਪ੍ਰੈਲ ਵਿੱਚ ਟਰੱਕਾਂ ਅਤੇ ਡਰਾਈਵਰਾਂ ਨੂੰ ਲੱਭਣਾ ਬਹੁਤ ਮੁਸ਼ਕਲ ਹੋ ਗਿਆ, ਪਿਛਲੇ ਮਾਰਚ ਤੋਂ ਸਮੁੰਦਰੀ ਮਾਰਗ ਰਾਹੀਂ ਮਿਆਂਮਾਰ ਨੂੰ ਭੇਜਣਾ ਜਾਂ ਉੱਥੋਂ ਮੰਗਵਾਉਣ ਦੀ ਲਾਗਤ 50 ਪ੍ਰਤੀਸ਼ਤ ਵਧ ਗਈ ਹੈ।
ਏਸ਼ੀਆ ਹਾਈਵੇ-1 ਪ੍ਰੋਜੈਕਟ ਨੂੰ ਥਾਈਲੈਂਡ ਅਤੇ ਮਿਆਂਮਾਰ ਵਿਚਕਾਰ ਜ਼ਮੀਨੀ ਆਵਾਜਾਈ ਦੇ ਇੱਕ ਪ੍ਰਮੁੱਖ ਸਾਧਨ ਵਜੋਂ ਬਣਾਇਆ ਜਾ ਰਿਹਾ ਹੈ। ਇਹ ਸੜਕ ਥਾਈਲੈਂਡ ਦੇ ਮੱਧ ਵਿੱਚ ਮਾਏ ਸੋਟ ਤੋਂ ਮਿਆਂਮਾਰ ਵਿੱਚ ਮਾਇਆਵਾਦੀ ਤੱਕ ਚੱਲੇਗੀ। ਪਰ ਇਸ ਇਲਾਕੇ 'ਤੇ ਕੈਰਨ ਨੈਸ਼ਨਲ ਯੂਨੀਅਨ ਨਾਂ ਦੀ ਖਾੜਕੂ ਜਥੇਬੰਦੀ ਦਾ ਕਬਜ਼ਾ ਹੈ। ਕੈਰਨ ਨੈਸ਼ਨਲ ਯੂਨੀਅਨ 20 ਨਸਲੀ ਕੱਟੜਪੰਥੀ ਸੰਗਠਨਾਂ ਵਿੱਚੋਂ ਇੱਕ ਹੈ ਜੋ ਮਿਆਂਮਾਰ ਦੀ ਫੌਜ ਨਾਲ ਲੜ ਰਹੀਆਂ ਹਨ।