ਨਵੀਂ ਦਿੱਲੀ, 18 ਮਾਰਚ (ਪੋਸਟ ਬਿਊਰੋ): ਵਿਦੇਸ਼ ਮੰਤਰੀ ਐਸ ਜੈਸ਼ੰਕਰ ਨੇ ਕੈਂਬਰਿਜ ਵਿਚ ਰਾਹੁਲ ਗਾਂਧੀ ਦੀ ਚੀਨ ਬਾਰੇ ਟਿੱਪਣੀ ’ਤੇ ਤਿੱਖਾ ਹਮਲਾ ਕੀਤਾ। ਉਨ੍ਹਾਂ ਕਿਹਾ ਕਿ ਰਾਹੁਲ ਗਾਂਧੀ ਨੇ ਵਿਦੇਸ਼ੀ ਧਰਤੀ ‘ਤੇ ਜਾ ਕੇ ਚੀਨ ਦੀ ਤਾਰੀਫ ਕੀਤੀ ਅਤੇ ਭਾਰਤ ਨੂੰ ਨੀਵਾਂ ਦਿਖਾਉਣ ਦੀ ਕੋਸਸਿ ਕੀਤੀ। ਕੈਂਬਰਿਜ ਵਿੱਚ ਰਾਹੁਲ ਗਾਂਧੀ ਦੀਆਂ ਚੀਨ ਬਾਰੇ ਟਿੱਪਣੀਆਂ ਨੂੰ ਰਾਜਨੀਤੀ ਤੋਂ ਪ੍ਰੇਰਿਤ ਦੱਸਦਿਆਂ ਉਨ੍ਹਾਂ ਕਿਹਾ ਕਿ ਇਕ ਭਾਰਤੀ ਹੋਣ ਦੇ ਨਾਤੇ ਉਨ੍ਹਾਂ ਨੂੰ ਬਹੁਤ ਦੁੱਖ ਹੁੰਦਾ ਹੈ ਜਦੋਂ ਕੋਈ ਭਾਰਤ ਨੂੰ ਨਕਾਰਦਿਆਂ ਚੀਨ ਦੀ ਤਾਰੀਫ ਕਰਦਾ ਹੈ।
ਜੈਸ਼ੰਕਰ ਨੇ ਕਿਹਾ, ‘ਜਦੋਂ ਰਾਹੁਲ ਗਾਂਧੀ ਚੀਨ ਬਾਰੇ ਗੱਲ ਕਰ ਰਹੇ ਸਨ, ਤੁਹਾਨੂੰ ਪਤਾ ਹੈ, ਉਨ੍ਹਾਂ ਦੇ ਦਿਮਾਗ ‘ਚ ਕਿਹੜਾ ਸਬਦ ਆਇਆ?- ਹਾਰਮੋਨੀ। ਉਨ੍ਹਾਂ ਕੋਲ ਚੀਨ ਲਈ ਇਕ ਸ਼ਬਦ ਇਕਸੁਰਤਾ ਅਤੇ ਭਾਰਤ ਲਈ ਇਕ ਸ਼ਬਦ ਵਿਵਾਦ ਹੈ। ਚੀਨ ਦੀ ਤਾਰੀਫ ਕਰਦੇ ਹੋਏ ਉਹ ਕਹਿ ਰਹੇ ਸਨ ਕਿ ਕਿਵੇਂ ਚੀਨ ਸਭ ਤੋਂ ਵੱਡਾ ਉਤਪਾਦਕ ਬਣ ਗਿਆ ਹੈ ਅਤੇ ਇਹ ਸੱਚ ਵੀ ਹੈ। ਪਰ ਜਦੋਂ ਭਾਰਤ ਵਿੱਚ ਉਤਪਾਦਨ ਦੀ ਗੱਲ ਆਉਂਦੀ ਹੈ, ਤਾਂ ਉਨ੍ਹਾਂ ਨੇ ਹਰ ਸੰਭਵ ਤਰੀਕੇ ਨਾਲ ਇਸ ਨੂੰ ਘਟਾਉਣ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਕਿਹਾ ਕਿ ਮੇਕ ਇਨ ਇੰਡੀਆ ਸਫਲ ਨਹੀਂ ਹੋਇਆ ਹੈ। ਜਦੋਂ ਅਸੀਂ ਕੋਵੈਕਸੀਨ ਬਣਾਈ ਸੀ, ਉਦੋਂ ਵੀ ਕਾਂਗਰਸ ਨੇ ਕਿਹਾ ਸੀ ਕਿ ਕੋਵੈਕਸੀਨ ਕੰਮ ਨਹੀਂ ਕਰ ਰਹੀ ਹੈ।