ਓਟਵਾ, 2 ਫਰਵਰੀ (ਪੋਸਟ ਬਿਊਰੋ) : ਵੱਡੀਆਂ ਟੈਕ ਕੰਪਨੀਆਂ, ਜਿਹੜੀਆਂ ਆਨਲਾਈਨ ਸਟਰੀਮਿੰਗ ਸਰਵਿਸਿਜ਼ ਮੁਹੱਈਆ ਕਰਵਾਉਂਦੀਆਂ ਹਨ, ਨੂੰ ਹੁਣ ਕੈਨੇਡੀਅਨ ਕੰਟੈਂਟ ਵੀ ਵਿਖਾਉਣਾ ਹੋਵੇਗਾ ਨਹੀਂ ਤਾਂ ਉਨ੍ਹਾਂ ਨੂੰ ਵੱਡੇ ਜੁਰਮਾਨਿਆਂ ਦਾ ਸਾਹਮਣਾ ਕਰਨਾ ਪਵੇਗਾ। ਅਜਿਹਾ ਇਸ ਲਈ ਸੰਭਵ ਹੋ ਸਕਿਆ ਹੈ ਕਿਉਂਕਿ ਲਿਬਰਲਾਂ ਵੱਲੋਂ ਲਿਆਂਦਾ ਵਿਵਾਦਗ੍ਰਸਤ ਬਿੱਲ ਪਾਸ ਹੋਣ ਦੇ ਇੱਕ ਕਦਮ ਹੋਰ ਨੇੜੇ ਪਹੁੰਚ ਗਿਆ ਹੈ।
ਸੈਨੇਟ ਵੱਲੋਂ ਆਨਲਾਈਨ ਸਟਰੀਮਿੰਗ ਐਕਟ, ਜਿਸ ਨੂੰ ਬਿੱਲ ਬੀ-11 ਵਜੋਂ ਵੀ ਜਾਣਿਆ ਜਾਂਦਾ ਹੈ, ਪਾਸ ਕਰ ਦਿੱਤਾ ਗਿਆ ਹੈ। ਸੈਨੇਟਰਜ਼ ਵੱਲੋਂ ਲੰਮੇਂ ਅਧਿਐਨ ਤੋਂ ਬਾਅਦ ਇਸ ਵਿੱਚ ਦਰਜਨਾਂ ਸੋਧਾਂ ਵੀ ਕੀਤੀਆਂ ਗਈਆਂ। ਇਸ ਬਿੱਲ ਨਾਲ ਕੈਨੇਡਾ ਵਿੱਚ ਬ੍ਰੌਡਕਾਸਟਿੰਗ ਸਬੰਧੀ ਨਿਯਮਾਂ ਨੂੰ ਅਪਡੇਟ ਕਰ ਦਿੱਤਾ ਜਾਵੇਗਾ। ਆਨਲਾਈਨ ਸਟਰੀਮਿੰਗ ਕਰਨ ਵਾਲੀਆਂ ਵੱਡੀਆਂ ਕੰਪਨੀਆਂ ਜਿਵੇਂ ਕਿ ਯੂਟਿਊਬ, ਨੈੱਟਫਲਿਕਸ ਤੇ ਸਪੌਟੀਫਾਇ ਨੂੰ ਕੈਨੇਡੀਅਨ ਕੰਟੈਂਟ ਵੀ ਵਿਖਾਉਣਾ ਹੋਵੇਗਾ ਤੇ ਇਸ ਨੂੰ ਕੈਨੇਡਾ ਦੇ ਯੂਜਰਜ਼ ਦੀ ਪਹੁੰਚ ਵਿੱਚ ਵੀ ਲਿਆਉਣਾ ਹੋਵੇਗਾ ਨਹੀਂ ਤਾਂ ਇਨ੍ਹਾਂ ਨੂੰ ਵੱਡੇ ਜੁਰਮਾਨੇ ਲੱਗਣਗੇ।
ਕੈਨੇਡੀਅਨ ਹੈਰੀਟੇਜ ਮੰਤਰੀ ਪਾਬਲੋ ਰੌਡਰਿਗਜ਼ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਪੂਰੀ ਆਸ ਹੈ ਕਿ ਸੈਨੇਟ ਵੱਲੋਂ ਕੀਤੀਆਂ ਗਈਆਂ ਤਬਦੀਲੀਆਂ ਦੇ ਮੁਲਾਂਕਣ ਤੋਂ ਬਾਅਦ ਹਾਊਸ ਆਫ ਕਾਮਨਜ਼ ਅਗਲੇ ਹਫਤੇ ਇਸ ਬਿੱਲ ਨੂੰ ਪਾਸ ਕਰ ਦੇਵੇ। ਰੌਡਰਿਗਜ਼ ਨੇ ਆਖਿਆ ਕਿ ਲਿਬਰਲ ਸਰਕਾਰ ਸੈਨੇਟ ਵੱਲੋਂ ਕੀਤੀਆਂ ਸਾਰੀਆਂ ਸਿਫਰਸ਼ਾਂ ਨਹੀਂ ਮੰਨੇਗੀ ਪਰ ਉਨ੍ਹਾਂ ਇਹ ਨਹੀਂ ਦੱਸਿਆ ਕਿ ਕਿਹੜੀਆਂ ਸਿਫਾਰਸ਼ਾਂ ਨਹੀਂ ਮੰਨੀਆਂ ਜਾਣਗੀਆਂ।