ਸਾਲ 2020 ਵਿੱਚ ਰਿਲੀਜ਼ ਵੈੱਬ ਸੀਰੀਜ਼ ‘ਸਕੈਮ 1992 : ਦ ਹਰਸ਼ਦ ਮਹਿਤਾ ਸਟੋਰੀ’ ਨਾਲ ਸੁਰਖੀਆਂ ਵਿੱਚ ਛਾਏ ਅਭਿਨੇਤਾ ਪ੍ਰਤੀਕ ਗਾਂਧੀ ਇੱਕ ਵਾਰ ਫਿਰ ਬਾਇਓਪਿਕ ਵੈੱਬ ਸ਼ੋਅ ਦਾ ਹਿੱਸਾ ਬਣਨ ਲਈ ਤਿਆਰ ਹਨ। ਇਸ ਵਾਰ ਪ੍ਰਤੀਕ ਨੂੰ ਰਾਸ਼ਟਰਪਿਤਾ ਮਹਾਤਮਾ ਗਾਂਧੀ ਦੇ ਜੀਵਨ ਉੱਤੇ ਬਣ ਰਹੀ ਮਲਟੀ ਸੀਜ਼ਨ ਵੈੱਬ ਸੀਰੀਜ਼ ‘ਗਾਂਧੀ’ ਵਿੱਚ ਮੁੱਖ ਭੂਮਿਕਾ ਵਿੱਚ ਆਉਣਗੇ। ਇਹ ਸ਼ੋਅ ਇਤਿਹਾਸਕਾਰ ਰਾਮਚੰਦਰ ਗੁਹਾ ਦੁਆਰਾ ਲਿਖੀ, ਗਾਂਧੀ : ਬਿਫੋਰ ਇੰਡੀਆ ਅਤੇ ਗਾਂਧੀ : ਦ ਈਅਰਸ ਦੈੱਟ ਚੇਂਜਡ ਦ ਵਰਲਡ ਕਿਤਾਬਾਂ ਉੱਤੇ ਆਧਾਰਤ ਹੋਵੇਗੀ। ਇਸ ਕਿਤਾਬ ਉੱਤੇ ਵੈੱਬ ਸੀਰੀਜ਼ ਬਣਾਉਣ ਦੇ ਰਾਈਟਸ ਨਿਰਮਾਤਾ ਸਮੀਰ ਨਾਇਰ ਨੇ ਆਪਣੇ ਪ੍ਰੋਡਕਸ਼ਨ ਹਾਊਸ ਅਪਲਾਜ ਇੰਟਰਟੇਨਮੈਂਟ ਵੱਲੋਂ ਖਰੀਦੇ ਹਨ। ਇਸ ਸੀਰੀਜ਼ ਵਿੱਚ ਮਹਾਤਮਾ ਗਾਂਧੀ ਦੇ ਦੱਖਣੀ ਅਫਰੀਕਾ ਦੇ ਅਨੁਭਵਾਂ ਤੋਂ ਭਾਰਤ ਵਿੱਚ ਸੁਤੰਤਰਤਾ ਸੰਗਰਾਮ ਅੰਦੋਲਨ ਚਲਾਉਣ ਸਮੇਤ ਉਨ੍ਹਾਂ ਦੇ ਜੀਵਨ ਸਫਰ ਦੇ ਤਮਾਮ ਪਹਿਲੂਆਂ ਨੂੰ ਦਿਖਾਇਆ ਜਾਏਗਾ।
ਸ਼ੋਅ ਦੇ ਜ਼ਰੀਏ ਯੁਵਾ ਮੋਹਨਦਾਸ ਕਰਮਚੰਦ ਗਾਂਧੀ ਤੋਂ ਮਹਾਤਮਾ ਗਾਂਧੀ ਬਣਨ ਤੱਕ ਦੀਆਂ ਤਮਾਮ ਅਣਕਹੀਆਂ ਕਹਾਣੀਆਂ ਨੂੰ ਲੋਕਾਂ ਸਾਹਮਣੇ ਲਿਆਂਦਾ ਜਾਏਗਾ। ਇਸ ਸੀਰੀਜ਼ ਨੂੰ ਦੁਨੀਆ ਦੇ ਦਰਸ਼ਕਾਂ ਤੱਕ ਪੁਚਾਉਣ ਲਈ ਇਸ ਦਾ ਨਿਰਮਾਣ ਸੰਸਾਰਕ ਮਾਪਦੰਡਾਂ ਦੇ ਆਧਾਰ ਉੱਤੇ ਕੀਤਾ ਜਾਏਗਾ। ਸ਼ੋਅ ਦੀ ਸ਼ੂਟਿੰਗ ਭਾਰਤ ਦੇ ਨਾਲ-ਨਾਲ ਕਈ ਵਿਦੇਸ਼ੀ ਲੋਕੇਸ਼ਨਾਂ ਉੱਤੇ ਵੀ ਹੋਵੇਗੀ। ਇਸ ਸ਼ੋਅ ਦੇ ਪਲੇਟਫਾਰਮ, ਰਿਲੀਜ਼ ਅਤੇ ਬਾਕੀ ਕਲਾਕਾਰਾਂ ਬਾਰੇ ਅਜੇ ਕੋਈ ਅਧਿਕਾਰਕ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ।