ਅੰਤਾਲਯਾ, 26 ਅਪ੍ਰੈਲ (ਪੋਸਟ ਬਿਊਰੋ)- ਭਾਰਤ ਨੇ ਤੀਰਅੰਦਾਜ਼ੀ ਵਿਸ਼ਵ ਕੱਪ ਗੇੜ-1 ਵਿੱਚ ਦੂਸਰਾ ਸੋਨ ਤਮਗ਼ਾ ਜਿੱਤਿਆ, ਜਦੋਂ ਕੱਲ੍ਹ ਇੱਥੇ ਤਰੁਣਦੀਪ ਰਾਏ ਅਤੇ ਰਿਧੀ ਫੋਰ ਦੀ ਮਿਕਸਡ ਟੀਮ ਨੇ ਪੱਛੜਨ ਪਿੱਛੋਂ ਵਾਪਸੀ ਕਰਦੇ ਹੋਏ ਸ਼ੂਟਆਊਟ ਵਿੱਚ ਗ੍ਰੇਟ ਬ੍ਰਿਟੇਨ ਨੂੰ ਹਰਾਇਆ।
ਪਹਿਲੀ ਵਾਰ ਜੋੜੀ ਬਣਾ ਕੇ ਖੇਡ ਰਹੇ ਦੋ ਵਾਰ ਦੇ ਉਲੰਪੀਅਨ ਰਾਏ ਅਤੇ ਰਿਧੀ ਪਹਿਲਾਂ 0-2 ਨਾਲ ਅਤੇ ਫਿਰ 2-4 ਨਾਲ ਪੱਛੜ ਰਹੇ ਸਨ। ਇਸ ਭਾਰਤੀ ਜੋੜੀ ਨੇ ਸੰਜਮ ਰੱਖਦੇ ਹੋਏ 5-4(35-37, 36-33, 39-40, 38-37, 18-17) ਨਾਲ ਜਿੱਤ ਦਰਜ ਕੀਤੀ। ਭਾਰਤ ਨੇ ਇਸ ਤਰ੍ਹਾਂ ਕੈਲੰਡਰ ਸਾਲ ਦੇ ਪਹਿਲੇ ਟੂਰਨਾਮੈਂਟ ਵਿੱਚ ਆਪਣੀ ਮੁਹਿੰਮ ਦਾ ਅੰਤ ਦੋ ਸੋਨ ਤਮਗ਼ਿਆਂ ਨਾਲ ਕੀਤਾ। ਕੱਲ੍ਹ ਅਭਿਸ਼ੇਕ ਵਰਮਾ, ਰਜਤ ਚੌਹਾਨ ਅਤੇ ਅਮਨ ਸੈਣੀ ਦੀ ਕੰਪਾਊਂਡ ਪੁਰਸ਼ ਟੀਮ ਨੇ ਸੋਨ ਤਮਗ਼ਾ ਜਿੱਤਿਆ ਸੀ। ਗਵਾਂਗਝੂ ਏਸ਼ੀਆਈ ਖੇਡਾਂ 2019 ਵਿੱਚ ਚਾਂਦੀ ਦਾ ਤਮਗ਼ਾ ਜਿੱਤਣ ਵਾਲੇ 38 ਸਾਲ ਦੇ ਰਾਏ ਦਾ ਵਿਸ਼ਵ ਕੱਪ ਵਿੱਚ ਪਹਿਲਾ ਮਿਕਸਡ ਟੀਮ ਤਮਗ਼ਾ ਹੈ ਜਦਕਿ 17 ਸਾਲਾ ਰਿਧੀ ਦਾ ਇਹ ਵਿਸ਼ਵ ਕੱਪ ਵਿੱਚ ਪਹਿਲਾ ਤਮਗ਼ਾ ਹੈ। ਇਸ ਤੋਂ ਭਵਿੱਖ ਵਿੱਚ ਵੀ ਆਸਾਂ ਹੋ ਸਕਦੀਆਂ ਹਨ।