ਦੁਬਈ, 25 ਜਨਵਰੀ (ਪੋਸਟ ਬਿਊਰੋ)- ਸੰਯੁਕਤ ਅਰਬ ਅਮੀਰਾਤ (ਯੂ ਏ ਈ) ਨੇ ਕੱਲ੍ਹ ਰਾਜਧਾਨੀ ਆਬੂਧਾਬੀ ਵੱਲ ਛੱਡੀਆਂ ਗਈਆਂ ਹਾਊਤੀ ਬਾਗੀਆਂ ਦੀਆਂ ਦੋ ਬੈਲਿਸਟਿਕ ਮਿਜ਼ਾਈਲਾਂ ਦਾ ਪਤਾ ਲਾ ਕੇ ਨਸ਼ਟ ਕਰ ਦਿੱਤਾ।
ਯੂ ਏ ਈ ਦੇ ਰੱਖਿਆ ਮੰਤਰਾਲੇ ਨੇ ਦੱਸਿਆ ਕਿ ਇਸ ਹਮਲੇ ਵਿੱਚ ਕੋਈ ਮੌਤ ਨਹੀਂ ਹੋਈ। ਮਿਜ਼ਾਈਲਾਂ ਦਾ ਮਲਬਾ ਆਬੂਧਾਬੀ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਡਿੱਗਾ। ਮੰਤਰਾਲੇ ਨੇ ਟਵੀਟ ਕੀਤਾ ਕਿ ਹਵਾਈ ਸੁਰੱਖਿਆ ਪ੍ਰਣਾਲੀ ਨੇ ਹਾਊਤੀ ਬਾਗੀਆਂ ਵੱਲੋਂ ਦੇਸ਼ ਵੱਲ ਦਾਗੀਆਂ ਗਈਆਂ ਦੋ ਬੈਲਿਸਟਿਕ ਮਿਜ਼ਾਈਲਾਂ ਦਾ ਪਤਾ ਲਾ ਕੇ ਮਾਰ ਦਿਤਾ ਹੈ। ਇਸ ਬਾਰੇ ਮੰਤਰਾਲੇ ਨੇ ਕਿਹਾ ਕਿ ਯੂ ਏ ਈ ਕਿਸੇ ਵੀ ਤਰ੍ਹਾਂ ਦੇ ਖਤਰੇ ਨਾਲ ਨਜਿੱਠਣ ਲਈ ਤਿਆਰ ਹੈ ਅਤੇ ਇਸ ਲਈ ਸਾਰੇ ਜ਼ਰੂਰੀ ਕਦਮ ਚੁੱਕੇ ਗਏ ਹਨ। ਯੂ ਏ ਈ ਨੇ ਯਮਨ ਦੇ ਹਾਊਤੀ ਬਾਗੀਆਂ ਨੂੰ ਹਮਲੇ ਲਈ ਜ਼ਿੰਮੇਵਾਰ ਠਹਿਰਾਉਂਦੇ ਹੋਏ ਕਿਹਾ ਕਿ ਨਿਸ਼ਾਨਾ ਬਣਾ ਕੇ ਕੀਤੇ ਇਸ ਹਮਲੇ ਲਈ ਉਨ੍ਹਾਂ ਨੂੰ ਬਖਸ਼ਿਆ ਨਹੀਂ ਜਾਵੇਗਾ। ਯੂ ਏ ਈ ਨੇ ਯਮਨ ਜੰਗ ਵਿੱਚ ਸ਼ਾਮਲ ਆਪਣੇ ਲਗਭਗ ਸਾਰੇ ਫੌਜੀਆਂ ਨੂੰ ਜੁਲਾਈ 2019 ਵਿੱਚ ਵਾਪਸ ਬੁਲਾ ਲਿਆ ਸੀ, ਕਿਉਂਕਿ ਉਹ ਖੁਦ ਨੂੰ ਹਮੇਸ਼ਾਂ ਤੋਂ ਸੈਰ ਸਪਾਟੇ ਤੇ ਕਾਰੋਬਾਰੀ ਦੇਸ਼ ਦੇ ਰੂਪ ਵਿੱਚ ਪੇਸ਼ ਕਰਦਾ ਰਿਹਾ ਹੈ, ਪਰ ਪਿੱਛੇ ਜਿਹੇ ਯੂ ਏ ਈ ਦੀ ਹਵਾਈ ਫੌਜ ਨੇ ਹਾਊਤੀ ਬਾਗੀਆਂ ਦੇ ਕਬਜ਼ੇ ਵਾਲੇ ਖੇਤਰਾਂ ਉੱਤੇ ਮੁੜ ਤੋਂ ਹਮਲੇ ਸ਼ੁਰੂ ਕਰ ਦਿੱਤੇ। ਮਾਹਰਾਂ ਦਾ ਮੰਨਣਾ ਹੈ ਕਿ ਹਾਊਤੀ ਬਾਗੀ ਆਬੂਧਾਬੀ ਉੱਤੇ ਜਵਾਬੀ ਹਮਲੇ ਕਰ ਰਹੇ ਹਨ। 17 ਜਨਵਰੀ ਨੂੰ ਆਬੂਧਾਬੀ ਉੱਤੇ ਹੋਏ ਹਾਊਤੀ ਹਮਲੇ ਦੇ ਅਗਲੇ ਦਿਨ ਸਾਊਦੀ ਅਰਬ ਦੀ ਅਗਵਾਈ ਵਾਲੀ ਗੱਠਜੋੜ ਫੌਜ ਨੇ ਯਮਨ ਦੇ ਹੂਦੈਦਾਰ ਸ਼ਹਿਰ ਵਿੱਚ ਹਵਾਈ ਹਮਲੇ ਕੀਤੇ ਸਨ, ਜਿਨ੍ਹਾਂ ਵਿੱਚ 20 ਲੋਕ ਮਾਰੇ ਗਏ ਸਨ।ਹਾਊਤੀ ਬਾਗੀਆਂ ਨੇ 17 ਜਨਵਰੀ ਨੂੰ ਆਬੂਧਾਬੀ ਦੇ ਮੁਸਾਫਫਾ ਆਈ ਸੀ ਏ ਡੀ-3 ਖੇਤਰ ਤੇ ਕੌਮਾਂਤਰੀ ਹਵਾਈ ਅੱਡੇ ਦੇ ਨਿਰਮਾਣ ਖੇਤਰ ਉੱਤੇ ਡਰੋਨ ਹਮਲੇ ਕੀਤੇ ਸਨ। ਤਿੰਨ ਪੈਟਰੋਲੀਅਮ ਟੈਂਕਰਾਂ ਵਿੱਚ ਹੋਏ ਧਮਾਕੇ ਵਿੱਚ ਦੋ ਭਾਰਤੀ ਤੇ ਇੱਕ ਪਾਕਿਸਤਾਨੀ ਨਾਗਰਿਕ ਦੀ ਮੌਤ ਹੋ ਗਈ ਸੀ, ਜਦੋਂ ਕਿ ਛੇ ਜ਼ਖਮੀ ਹੋ ਗਏ ਸਨ। ਯੂ ਐੱਨ ਸਕਿਓਰਟੀ ਕੌਂਸਲ ਨੇ ਆਬੂਧਾਬੀ ਵਿੱਚ ਹੋਏ ਹਮਲੇ ਦੀ ਸਖਤ ਨਿੰਦਾ ਕੀਤੀ ਸੀ।