ਟੋਕੀਓ, 31 ਅਕਤੂਬਰ (ਪੋਸਟ ਬਿਊਰੋ) : ਐਤਵਾਰ ਨੂੰ ਟੋਕੀਓ ਦੀ ਟਰੇਨ ਵਿੱਚ ਚਾਕੂ ਲੈ ਕੇ ਚੜ੍ਹੇ ਇੱਕ ਵਿਅਕਤੀ ਨੇ ਕਈ ਪੈਸੈਂਜਰਜ਼ ਨੂੰ ਜ਼ਖ਼ਮੀ ਕਰ ਦਿੱਤਾ ਤੇ ਗੱਡੀ ਵਿੱਚ ਅੱਗ ਵੀ ਲਗਾ ਦਿੱਤੀ। ਇਸ ਤੋਂ ਬਾਅਦ ਲੋਕਾਂ ਨੇ ਆਪਣੀ ਜਾਨ ਬਚਾਉਣ ਲਈ ਖਿੜਕੀਆਂ ਵਿੱਚੋਂ ਛਾਲਾਂ ਮਾਰ ਦਿੱਤੀਆਂ। ਇਹ ਜਾਣਕਾਰੀ ਪੁਲਿਸ ਤੇ ਚਸ਼ਮਦੀਦਾਂ ਨੇ ਦਿੱਤੀ।
ਟੋਕੀਓ ਫਾਇਰ ਡਿਪਾਰਟਮੈਂਟ ਦਾ ਕਹਿਣਾ ਹੈ ਕਿ ਇਸ ਘਟਨਾ ਵਿੱਚ 17 ਲੋਕ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਵਿੱਚੋਂ ਤਿੰਨ ਦੀ ਹਾਲਤ ਨਾਜੁ਼ਕ ਹੈ। ਹਮਲਾਵਰ ਦੀ ਪਛਾਣ 20 ਸਾਲਾਂ ਦੇ ਵਿਅਕਤੀ ਵਜੋਂ ਕੀਤੀ ਗਈ ਹੈ, ਉਸ ਨੂੰ ਮੌਕੇ ਉੱਤੇ ਹੀ ਗ੍ਰਿਫਤਾਰ ਕਰ ਲਿਆ ਗਿਆ ਤੇ ਉਸ ਉੱਤੇ ਕਤਲ ਕਰਨ ਦੀ ਕੋਸਿ਼ਸ਼ ਕਰਨ ਸਬੰਧੀ ਜਾਂਚ ਚੱਲ ਰਹੀ ਹੈ। ਐਨਐਚਕੇ ਨੇ ਆਖਿਆ ਕਿ ਉਸ ਦਾ ਮੰਤਵ ਅਜੇ ਸਮਝ ਨਹੀਂ ਆਇਆ ਹੈ।
ਐਨਐਚਕੇ ਨੇ ਦੱਸਿਆ ਕਿ ਚਸ਼ਮਦੀਦਾਂ ਵੱਲੋਂ ਪੁਲਿਸ ਨੂੰ ਇਹ ਜਾਣਕਾਰੀ ਦਿੱਤੀ ਗਈ ਹੈ ਹਮਲਾਵਰ ਨੇ ਬਹੁਤ ਹੀ ਗੂੜ੍ਹੇ ਰੰਗ ਦੇ ਕੱਪੜੇ ਪਾਏ ਹੋਏ ਸਨ-ਹਰੇ ਰੰਗ ਦੀ ਸ਼ਰਟ, ਨੀਲੇ ਰੰਗ ਦਾ ਸੂਟ ਤੇ ਜਾਮਣੀ ਰੰਗ ਦਾ ਕੋਟ। ਉਹ ਕੌਮਿਕ ਬੁੱਕ ਦਾ ਕੋਈ ਕਿਰਦਾਰ ਲੱਗ ਰਿਹਾ ਸੀ ਜਾਂ ਫਿਰ ਹੈਲੋਈਨ ਉੱਤੇ ਜਾਣ ਵਾਲਾ ਕੋਈ ਸ਼ਖ਼ਸ ਲੱਗ ਰਿਹਾ ਸੀ। ਟੋਕੀਓ ਪੁਲਿਸ ਨੇ ਦੱਸਿਆ ਕਿ ਇਹ ਹਮਲਾ ਕੋਕਿਰਿਓ ਸਟੇਸ਼ਨ ਨੇੜੇ ਕੇਈਓ ਟਰੇਨ ਦੇ ਅੰਦਰ ਹੋਇਆ।