ਮਿਸੀਸਾਗਾ, 29 ਨਵੰਬਰ (ਪੋਸਟ ਬਿਊਰੋ) : ਮਿਸੀਸਾਗਾ ਦੇ ਇੱਕ ਘਰ ਵਿੱਚ ਕੀਤੀ ਗਈ ਪਾਰਟੀ ਤੋਂ ਬਾਅਦ 29 ਵਿਅਕਤੀਆਂ ਨੂੰ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ| ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਸ ਪਾਰਟੀ ਵਿੱਚ 60 ਤੋਂ ਵੱਧ ਲੋਕਾਂ ਵੱਲੋਂ ਹਿੱਸਾ ਲਿਆ ਗਿਆ ਸੀ|
ਇੱਕ ਘਰ ਵਿੱਚ ਹੋ ਰਹੀ ਪਾਰਟੀ ਦੀ ਖਬਰ ਮਿਲਣ ਤੋਂ ਬਾਅਦ ਪੀਲ ਪੁਲਿਸ ਨੇ ਬਾਇ-ਲਾਅ ਅਧਿਕਾਰੀਆਂ ਨਾਲ ਰਲ ਕੇ ਐਤਵਾਰ ਅੱਧੀ ਰਾਤ ਨੂੰ ਨਾਈਨਥ ਲਾਈਨ ਤੇ ਡੀਪਵੁੱਡ ਹਾਈਟਸ ਨੇੜੇ ਏਅਰਬੀਐਨਬੀ ਦੇ ਘਰ ਉੱਤੇ ਛਾਪਾ ਮਾਰਿਆ| ਡਿਪਟੀ ਪੁਲਿਸ ਚੀਫ ਮਾਰਕ ਐਂਡਰਿਊਜ਼ ਨੇ ਦੱਸਿਆ ਕਿ ਕੋਵਿਡ-19 ਦੇ ਪਸਾਰ ਨੂੰ ਰੋਕਣ ਲਈ ਬਣਾਏ ਗਏ ਪ੍ਰੋਵਿੰਸ਼ੀਅਲ ਨਿਯਮਾਂ ਨੂੰ ਤੋੜਨ ਲਈ 27 ਵਿਅਕਤੀਆਂ ਨੂੰ 880 ਡਾਲਰ ਜੁਰਮਾਨਾ ਕੀਤਾ ਗਿਆ| ਇਸ ਪਾਰਟੀ ਦੇ ਦੋ ਮੇਜ਼ਬਾਨਾਂ ਨੂੰ ਪਾਰਟ 3 ਸੰਮਨ ਜਾਰੀ ਕੀਤੇ ਗਏ, ਜਿਸ ਤਹਿਤ ਇਨ੍ਹਾਂ ਨੂੰ 10,000 ਡਾਲਰ ਦਾ ਜੁਰਮਾਨਾ ਹੋ ਸਕਦਾ ਹੈ|
ਐਂਡਰਿਊਜ਼ ਨੇ ਆਖਿਆ ਕਿ ਇਸ ਸਮੇਂ ਸਾਰਿਆਂ ਲਈ ਹਾਲਾਤ ਕਾਫੀ ਨਾਸਾਜ਼ ਚੱਲ ਰਹੇ ਹਨ| ਉਨ੍ਹਾਂ ਦੱਸਿਆ ਕਿ ਪਾਰਟੀ ਵਿੱਚ 60 ਦੇ ਨੇੜੇ ਤੇੜੇ ਲੋਕ ਸਨ ਪਰ ਕਈ ਪੁਲਿਸ ਦੇ ਪਹੁੰਚਣ ਉੱਤੇ ਭੱਜ ਗਏ| ਦੋ ਵਿਅਕਤੀਆਂ ਵੱਲੋਂ ਪੁਲਿਸ ਨੂੰ ਆਪਣੀ ਪਛਾਣ ਦੱਸੇ ਜਾਣ ਤੋਂ ਇਨਕਾਰ ਕੀਤੇ ਜਾਣ ਕਾਰਨ ਉਨ੍ਹਾਂ ਉੱਤੇ ਨਿਆਂ ਵਿੱਚ ਵਿਘਣ ਪਾਉਣ ਦੇ ਚਾਰਜਿਜ਼ ਲਾਏ ਗਏ ਹਨ| ਇੱਥੇ ਦੱਸਣਾ ਬਣਦਾ ਹੈ ਕਿ ਪੀਲ ਵਿੱਚ ਇਸ ਸਮੇਂ ਲਾਕਡਾਊਨ ਚੱਲ ਰਿਹਾ ਹੈ| ਜਿਸ ਤਹਿਤ ਇੱਥੇ ਇੰਡੋਰ ਇੱਕਠ ਕਰਨ ਉੱਤੇ ਪਾਬੰਦੀ ਹੈ| ਮਿਸੀਸਾਗਾ ਦੀ ਮੇਅਰ ਬ੍ਰੌਨੀ ਕ੍ਰੌਂਂਬੀ ਨੇ ਆਖਿਆ ਕਿ ਐਨੇ ਵੱਡੇ ਇੱਕਠ ਦੀ ਖਬਰ ਸੁਣ ਕੇ ਉਨ੍ਹਾਂ ਨੂੰ ਕਾਫੀ ਨਮੋਸ਼ੀ ਹੋਈ ਹੈ|