ਅਬੋਹਰ, 16 ਅਕਤੂਬਰ (ਪੋਸਟ ਬਿਊਰੋ)- ਅਕਾਲੀ ਨੇਤਾ ਤੇ ਸ਼ਰਾਬ ਕਾਰੋਬਾਰੀ ਸ਼ਿਵ ਲਾਲ ਡੋਡਾ ਜਿੱਥੇ ਭੀਮ ਹੱਤਿਆਕਾਂਡ ਵਿੱਚ ਉਮਰ ਕੈਦ ਦੀ ਸਜ਼ਾ ਭੁਗਤ ਰਿਹਾ ਹੈ, ਉਥੇ ਉਸ ਦੇ ਖਿਲਾਫ ਧੋਖਾਧੜੀ ਦੇ ਕੇਸ ਵੀ ਹਨ। ਅਜਿਹਾ ਇੱਕ ਕੇਸ ਸਿਟੀ ਵੰਨ ਥਾਣੇ ਦੀ ਪੁਲਸ ਨੇ ਨੇਚਰ ਹਾਈਟਸ ਇੰਫਰਾ ਲਿਮਟਿਡ ਦੇ ਮਾਲਕ ਨੀਰਜ ਅਰੋੜਾ ਦੀ ਮਾਂ ਆਸ਼ਾ ਕੁਮਾਰੀ ਦੇ ਬਿਆਨਾਂ `ਤੇ ਕੱਲ੍ਹ ਹੋਰ ਦਰਜ ਕੀਤਾ ਸੀ, ਜਿਸ ਵਿੱਚ ਪੰਜ ਵਾਰ ਜ਼ਿਲ੍ਹਾ ਅਦਾਲਤ ਵਿੱਚ ਸੁਣਵਾਈ ਹੋਣ ਦੇ ਬਾਅਦ ਜੱਜ ਨੇ ਛੇਵੀਂ ਵਾਰ ਸੁਣਵਾਈ ਉੱਤੇ ਜ਼ਮਾਨਤ ਅਰਜ਼ੀ ਨੂੰ ਰੱਦ ਕਰ ਦਿੱਤਾ ਹੈ।
ਨੀਰਜ ਅਰੋੜਾ ਪੱਖ ਦੇ ਸੀਨੀਅਰ ਵਕੀਲ ਸੁਨੀਲ ਡੋਡਾ ਨੇ ਦੱਸਿਆ ਕਿ ਸ਼ਿਵ ਲਾਲ ਡੋਡਾ ਦੇ ਵਕੀਲ ਨੇ ਦਲੀਲ ਦਿੱਤੀ ਸੀ ਕਿ ਡੋਡਾ ਨੂੰ ਕੋਰੋਨਾ ਹੋਇਆ ਹੈ, ਇਸ ਲਈ ਉਸ ਨੂੰ ਰਹਿਮ ਦੇ ਆਧਾਰ ਉੱਤੇ ਜ਼ਮਾਨਤ ਦਿੱਤੀ ਜਾਏ, ਪਰ ਐਡੀਸ਼ਨਲ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਵਿਜੇ ਕੁਮਾਰ ਨੇ ਕੋਰੋਨਾ ਟੈਸਟ ਕਰਵਾਉਣ ਦੇ ਜੇਲ੍ਹਰ ਨੂੰ ਹੁਕਮ ਦਿੱਤੇ ਤਾਂ ਟੈਸਟ ਰਿਪੋਰਟ ਨੈਗੇਟਿਵ ਮਿਲੀ ਅਤੇ ਉਸ ਦੇ ਬਾਅਦ ਡੋਡਾ ਦੀ ਜ਼ਮਾਨਤ ਰੱਦ ਕਰ ਦਿੱਤੀ ਗਈ ਹੈ। ਵਰਨਣ ਯੋਗ ਹੈ ਕਿ ਦੋ ਮਹੀਨੇ ਪਹਿਲਾਂ ਆਸ਼ਾ ਕੁਮਾਰੀ ਨੇ ਸ਼ਿਵ ਲਾਲ ਡੋਡਾ ਸਮੇਤ ਹੋਰਨਾਂ ਲੋਕਾਂ ਉੱਤੇ ਕਰੋੜਾਂ ਦੀ ਠੱਗੀ ਦੇ ਦੋਸ਼ ਲਾ ਕੇ ਥਾਣਾ ਸਿਟੀ ਵੰਨ ਵਿੱਚ ਮਾਮਲਾ ਦਰਜ ਕਰਾਇਆ ਸੀ। ਪੁਲਸ ਡੋਡਾ ਨੂੰ ਪ੍ਰੋਟੈਕਸ਼ਨ ਵਾਰੰਟ ਉਤੇ ਲੈ ਕੇ ਆਈ ਤੇ ਰਿਮਾਂਡ ਖਤਮ ਹੋਣ ਉੱਤੇ ਜੇਲ੍ਹ ਭੇਜ ਦਿੱਤਾ ਸੀ। 19 ਸਤੰਬਰ ਨੂੰ ਡੋਡਾ ਨੇ ਜ਼ਮਾਨਤ ਲਈ ਜ਼ਿਲ੍ਹਾ ਫਾਜ਼ਿਲਕਾ ਦੀ ਅਦਾਲਤ ਵਿੱਚ ਅਰਜ਼ੀ ਦਿੱਤੀ ਸੀ। ਸਿਟੀ ਵੰਨ ਪੁਲਸ ਨੇ ਧਾਰਾ 365, 384, 420, 465, 467, 468, 471 ਅਤੇ 120 ਬੀ ਦੇ ਤਹਿਤ ਕੇਸ ਦਰਜ ਕੀਤਾ ਸੀ। 21 ਸਤੰਬਰ ਤੋਂ 15 ਅਕਤੂਬਰ ਛੇ ਵਾਰ ਸੁਣਵਾਈ ਹੋਈ ਅਤੇ ਕੱਲ੍ਹ ਐਡੀਸ਼ਨਲ ਜ਼ਿਲ੍ਹਾ ਮੈਜਿਸਟਰੇਟ ਵਿਜੇ ਕੁਮਾਰ ਨੇ ਉਸ ਦੀ ਜ਼ਮਾਨਤ ਅਰਜ਼ੀ ਨੂੰ ਰੱਦ ਕਰ ਦਿੱਤਾ ਹੈ।