ਕਰਾਚੀ, 13 ਸਤੰਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸੂਬਾ ਸਿੰਧ ਦੇ ਜ਼ਿਲ੍ਹਾ ਕਸ਼ਮੋਰ ਵਿੱਚ ਇੱਕ ਹਿੰਦੂ ਕਾਰੋਬਾਰੀ ਨੂੰ ਕੁਫਰ ਕਾਨੂੰਨ ਹੇਠ ਇਸਲਾਮ ਵਿਰੁੱਧ ਗਲਤ ਸ਼ਬਦਾ ਬੋਲਣ ਦੇ ਝੂਠੇ ਦੋਸ਼ ਵਿੱਚ ਪੁਲਸ ਨੇ ਗ੍ਰਿਫਤਾਰ ਕੀਤਾ ਹੈ।
ਦੱਸਿਆ ਗਿਆ ਹੈ ਕਿ ਕਾਸ਼ਮੋਰ ਦੇ ਬਕਸਾਪੁਰ ਇਲਾਕੇ ਵਿੱਚ ਚੌਲਾਂ ਦੇ ਕਾਰੋਬਾਰੀ ਨੇ ਆਪਣੇ ਇੱਕ ਮੁਲਾਜ਼ਮ ਨੂੰ ਕੰਮ `ਤੇ ਦੇਰੀ ਨਾਲ ਆਉਣ `ਤੇ ਮੁਹੰਮਦ ਸਾਹਿਬ ਦੇ ਦੱਸੇ ਰਸਤੇ `ਤੇ ਚੱਲਣ ਦੀ ਸਲਾਹ ਦਿੱਤੀ ਸੀ, ਜਿਸ ਉਤੇ ਉਸ ਨੇ ਬਾਜ਼ਾਰ `ਚ ਜਾ ਕੇ ਪ੍ਰਚਾਰ ਸ਼ੁਰੂ ਕਰ ਦਿੱਤਾ ਕਿ ਹਿੰਦੂ ਕਾਰੋਬਾਰੀ ਨੇ ਮੁਹੰਮਦ ਸਾਹਿਬ ਅਤੇ ਇਸਲਾਮ ਵਿਰੁੱਧ ਇਤਰਾਜ਼ ਯੋਗ ਸ਼ਬਦਾਵਲੀ ਵਰਤੀ ਹੈ। ਉਕਤ ਘਟਨਾ ਦੇ ਬਾਅਦ ਬਕਸਾਪੁਰ `ਚ ਸੜਕਾਂ `ਤੇ ਰੋਕ ਲਾ ਕੇ ਮਜ਼ਦੂਰ ਕਈ ਘੰਟਿਆਂ ਤੱਕ ਪੁਲਸ ਅੱਗੇ ਹਿੰਦੂ ਕਾਰੋਬਾਰੀ ਸ਼ਾਮ ਲਾਲ ਨੂੰ ਉਨ੍ਹਾਂ ਦੇ ਸਪੁਰਦ ਕਰਨ ਦੇ ਨਾਅਰੇ ਮਾਰਦੇ ਰਹੇ। ਇਲਾਕੇ ਦੇ ਮੌਲਵੀਆਂ ਨੇ ਜਦੋਂ ਮੁਸਲਿਮ ਨੌਜਵਾਨ ਤੋਂ ਪੁੱਛਗਿੱਛ ਕੀਤੀ ਤਾਂ ਉਸ ਨੇ ਮੰਨਿਆ ਕਿ ਹਿੰਦੂ ਕਾਰੋਬਾਰੀ ਨੇ ਉਸ ਨੂੰ ਨਬੀ ਦੇ ਦੱਸੇ ਰਸਤੇ `ਤੇ ਚੱਲਣ ਅਤੇ ਉਨ੍ਹਾਂ ਵਰਗੇ ਕੰਮ ਕਰਨ ਦੀ ਸਲਾਹ ਦਿੱਤੀ ਸੀ। ਇਸ `ਤੇੇ ਮੌਲਵੀਆਂ ਨੇ ਫਤਵਾ ਜਾਰੀ ਕਰਦਿਆਂ ਕਿਹਾ ਕਿ ਸ਼ਾਮ ਲਾਲ ਬੇਕਸੂਰ ਹੈ, ਪਰ ਅਜੇ ਵੀ ਸ਼ਾਮ ਲਾਲ ਪੁਲਸ ਦੀ ਹਿਰਾਸਤ ਵਿੱਚ ਹੈ।