ਬਾਲਟੀਮੋਰ ਵਿੱਚ ਗੈਸ ਧਮਾਕਾ, 1 ਹਲਾਕ, 4 ਜ਼ਖ਼ਮੀ
ਕਈ ਹੋਰਨਾਂ ਦੇ ਮਲਬੇ ਵਿੱਚ ਦੱਬੇ ਹੋਣ ਦਾ ਖਦਸ਼ਾ

ਬਾਲਟੀਮੋਰ, 10 ਅਗਸਤ (ਪੋਸਟ ਬਿਊਰੋ) : ਨੈਚੂਰਲ ਗੈਸ ਕਾਰਨ ਹੋਏ ਧਮਾਕੇ ਵਿੱਚ ਸੋਮਵਾਰ ਨੂੰ ਬਾਲਟੀਮੋਰ ਵਿੱਚ ਤਿੰਨ ਘਰ ਮਲੀਆ ਮੇਟ ਹੋ ਗਏ, ਇੱਕ ਮਹਿਲਾ ਦੀ ਮੌਤ ਹੋ ਗਈ ਤੇ ਕਈ ਹੋਰ ਮਲਬੇ ਵਿੱਚ ਦੱਬ ਗਏ| ਘੱਟੋ ਘੱਟ ਚਾਰ ਵਿਅਕਤੀਆਂ ਨੂੰ ਗੰਭੀਰ ਜ਼ਖ਼ਮੀ ਹਾਲਤ ਵਿੱਚ ਹਸਪਤਾਲ ਪਹੁੰਚਾਇਆ ਗਿਆ| ਮਲਬੇ ਥੱਲੇ ਦੱਬੇ ਲੋਕਾਂ ਦੀ ਫਾਇਰਫਾਈਟਰਜ਼ ਵੱਲੋਂ ਭਾਲ ਕੀਤੀ ਜਾ ਰਹੀ ਹੈ|
ਇੱਕ ਚੌਥੇ ਘਰ ਨੂੰ ਵੀ ਕਾਫੀ ਨੁਕਸਾਨ ਪਹੁੰਚਿਆ, ਨੇੜਲੇ ਹੋਰਨਾਂ ਘਰਾਂ ਦੀਆਂ ਖਿੜਕੀਆਂ ਦੇ ਸ਼ੀਸ਼ੇ ਟੁੱਟ ਗਏ, ਚਾਰੇ ਪਾਸੇ ਕੱਚ ਤੇ ਮਲਬੇ ਦੇ ਢੇਰ ਹੀ ਨਜ਼ਰ ਆ ਰਹੇ ਸਨ| ਬਾਲਟੀਮੋਰ ਫਾਇਰ ਡਿਪਾਰਟਮੈਂਟ ਦੀ ਤਰਜ਼ਮਾਨ ਬਲੇਅਰ ਐਡਮਜ਼ ਨੇ ਦੱਸਿਆ ਕਿ ਚਾਰ ਵਿਅਕਤੀਆਂ ਨੂੰ ਹਸਪਤਾਲ ਲਿਜਾਇਆ ਗਿਆ ਜਦਕਿ ਇੱਕ ਮਹਿਲਾ ਨੂੰ ਮੌਕੇ ਉੱਤੇ ਹੀ ਮ੍ਰਿਤਕ ਐਲਾਨ ਦਿੱਤਾ ਗਿਆ|
ਇਸ ਧਮਾਕੇ ਦਾ ਕਾਰਨ ਅਜੇ ਸਪਸ਼ਟ ਨਹੀਂ ਹੋ ਸਕਿਆ ਹੈ ਪਰ ਪ੍ਰਾਪਤ ਜਾਣਕਾਰੀ ਅਨੁਸਾਰ ਪਿਛਲੇ ਸਾਲ ਇਹ ਰਿਪੋਰਟਾਂ ਸਾਹਮਣੇ ਆਈਆਂ ਸਨ ਕਿ ਇੱਥੇ ਖਤਰਨਾਕ ਗੈਸ ਲੀਕੇਜ ਆਮ ਗੱਲ ਹੋ ਗਈ ਹੈ| ਯੂਟਿਲਿਟੀ ਵੱਲੋਂ ਫੈਡਰਲ ਅਧਿਕਾਰੀਆਂ ਨੂੰ ਕੀਤੀ ਗਈ ਰਿਪੋਰਟ ਅਨੁਸਾਰ ਔਸਤਨ ਦੋ ਦਰਜਨ ਦੇ ਨੇੜੇ ਤੇੜੇ ਘਰ ਅਕਸਰ ਇਸ ਦੀ ਸ਼ਿਕਾਇਤ ਕਰਦੇ ਰਹਿੰਦੇ ਹਨ| ਬਾਲਟੀਮੋਰ ਗੈਸ ਐਂਡ ਇਲੈਕਟ੍ਰਿਕ ਕੰਪਨੀ ਦੀਆਂ ਹਜ਼ਾਰਾਂ ਮੀਲ ਅਜਿਹੀਆ ਪਾਈਪਾਂ ਹਨ ਜਿਨ੍ਹਾਂ ਨੂੰ ਬਦਲੇ ਜਾਣ ਦੀ ਲੋੜ ਹੈ| ਇਸ ਸਾਰੇ ਕੰਮ ਵਿੱਚ ਇੱਕ ਬਿਲੀਅਨ ਡਾਲਰ ਦਾ ਖਰਚਾ ਤੇ ਦੋ ਦਹਾਕੇ ਦਾ ਸਮਾਂ ਲੱਗ ਸਕਦਾ ਹੈ|
ਫਾਇਰ ਡਿਪਾਰਟਮੈਂਟ ਵੱਲੋਂ ਸੋਮਵਾਰ ਸਵੇਰੇ 9:54 ਵਜੇ ਇਸ ਹਾਦਸੇ ਦੀ ਕਾਲ ਆਉਣ ਤੋਂ ਬਾਅਦ ਬੀਜੀਈ ਨੇ ਇਸ ਇਲਾਕੇ ਦੀ ਗੈਸ ਸਪਲਾਈ ਬੰਦ ਕਰ ਦਿੱਤੀ|