ਲੰਡਨ, 8 ਜੂਨ (ਪੋਸਟ ਬਿਊਰੋ)- ਇੰਗਲੈਂਡ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਟਿਮ ਬ੍ਰੇਸਨੇਨ ਨੇ ਕਿਹਾ ਹੈ ਕਿ 2011 ਵਿੱਚ ਟੈਸਟ ਮੈਚ ਵਿੱਚ ਸਚਿਨ ਤੇਂਦੁਲਕਰ ਨੂੰ ਐਲ ਬੀ ਡਬਲਯੂ ਆਊਟ ਕਰਨ ਪਿੱਛੋਂ ਉਨ੍ਹਾਂ ਨੂੰ ਅਤੇ ਅੰਪਾਇਰ ਰਾਡ ਟਕਰ ਨੂੰ ਜਾਨ ਤੋਂ ਮਾਰਨ ਦੀ ਧਮਕੀ ਮਿਲੀ ਸੀ। ਸਚਿਨ ਇਸ ਮੈਚ ਵਿੱਚ ਸੈਂਕੜੇ ਤੋਂ ਖੁੰਝ ਗਏ ਸਨ ਅਤੇ ਜੇ ਉਹ ਸੈਂਕੜਾ ਬਣਾ ਲੈਂਦੇ ਤਾਂ ਇਹ ਉਨ੍ਹਾਂ ਦਾ ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ 100ਵਾਂ ਸੈਂਕੜੇ ਹੁੰਦਾ।
ਸਚਿਨ ਜਦ 91 ਰਨ 'ਤੇ ਖੇਡ ਰਹੇ ਸਨ ਤਾਂ ਉਨ੍ਹਾਂ ਨੂੰ ਐਲ ਬੀ ਡਬਲਯੂ ਆਊਟ ਦੇ ਦਿੱਤਾ ਗਿਆ। ਇਹ ਬਹੁਤ ਕਰੀਬੀ ਫੈਸਲਾ ਸੀ ਕਿਉਂਕਿ ਰਿਪਲੇਅ ਵਿੱਚ ਗੇਂਦ ਲੈਗ ਸਟੰਪ ਦੇ ਉਪਰਲੇ ਹਿੱਸੇ ਨੂੰ ਛੂੰਹਦੀ ਦਿਸ ਰਹੀ ਸੀ। ਬ੍ਰੇਸਨੇਨ ਨੇ ਕਿਹਾ, ਉਨ੍ਹਾਂ ਦੇ ਨਾਂਅ 99 ਅੰਤਰਰਾਸ਼ਟਰੀ ਸੈਂਕੜੇ ਦਰਜ ਸਨ ਅਤੇ ਉਸ ਸੀਰੀਜ਼ ਵਿੱਚ ਰਿਵਿਊ ਨਹੀਂ ਸਨ ਕਰ ਸਕਦੇ, ਕਿਉਂਕਿ ਬੀ ਸੀ ਸੀ ਆਈ ਓਦੋਂ ਇਸ ਦੇ ਖਿਲਾਫ ਸੀ। ਗੇਂਦ ਸ਼ਾਇਦ ਲੈਗ ਸਟੰਪ ਦੇ ਬਾਹਰ ਜਾ ਰਹੀ ਸੀ ਤੇ ਅੰਪਾਇਰ ਟਕਰ ਨੇ ਉਨ੍ਹਾਂ ਨੂੰ ਆਊਟ ਦੇ ਦਿੱਤਾ। ਉਹ ਪੱਕੇ ਤੌਰ 'ਤੇ ਸੈਂਕੜਾ ਬਣਾ ਲੈਂਦੇ। ਬ੍ਰੇਸਨੇਨ ਨੇ ਕਿਹਾ ਕਿ ਇਸ ਪਿੱਛੋਂ ਉਨ੍ਹਾਂ ਨੂੰ ਤੇ ਅੰਪਾਇਰ ਟਕਰ ਨੂੰ ਜਾਨ ਤੋਂ ਮਾਰਨ ਦੀਆਂ ਧਮਕੀਆਂ ਮਿਲਣ ਲੱਗੀਆਂ। ਉਨ੍ਹਾਂ ਕਿਹਾ, ਟਕਰ ਦੇ ਘਰ ਲੋਕ ਧਮਕੀਆਂ ਭਰੇ ਪੱਤਰ ਭੇਜ ਰਹੇ ਸਨ। ਉਨ੍ਹਾਂ ਨੂੰ ਆਪਣੇ ਸੁਰੱਖਿਆ ਗਾਰਡ ਤੱਕ ਮੰਗਵਾਉਣੇ ਪਏ।