ਕੋਰੋਨਾ ਵਾਇਰਸ ਕਾਰਨ ਹੋਏ ਲਾਕਡਾਊਨ ਵਿੱਚ ਫਿਲਮ ਇੰਡਸਟਰੀ ਠਹਿਰੀ ਹੋਈ ਹੈ। ਵੱਡੀ ਤੋਂ ਵੱਡੀ ਫਿਲਮ ਦੀ ਸ਼ੂਟਿੰਗ ਤੇ ਰਿਲੀਜ਼ ਲਟਕੀ ਹੋਈ ਹੈ। ਅਜਿਹੇ ਵਿੱਚ ਇਮਰਾਨ ਹਾਸ਼ਮੀ ਦੀ ਫਿਲਮ ‘ਏਜਰਾ’ ਦੀ ਸ਼ੂਟਿੰਗ ਵੀ ਰੁਕੀ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਫਿਲਮ ਦੀ ਸਿਰਫ ਦਸ ਦਿਨਾਂ ਦੀ ਸ਼ੂਟਿੰਗ ਬਾਕੀ ਸੀ।
ਫਿਲਮ ਨਿਰਮਾਤਾ ਅਭਿਸ਼ੇਕ ਪਾਠਕ ਨੇ ਦੱਸਿਆ ਕਿ ਉਨ੍ਹਾਂ ਦੀ ਹਾਰਰ ਫਿਲਮ ਦੀ ਬਾਕੀ ਸ਼ੂਟਿੰਗ ਲਾਕਡਾਊਨ ਤੋਂ ਪਹਿਲਾਂ ਮਾਰੀਸ਼ਸ਼ ਵਿੱਚ ਹੋ ਚੁੱਕੀ ਸੀ। ਬੱਸ ਦਸ ਦਿਨਾਂ ਦੀ ਸ਼ੂਟਿੰਗ ਬਚੀ ਸੀ, ਜੋ ਮੁੰਬਈ ਵਿੱਚ ਹੋਣੀ ਸੀ, ਲਾਕਡਾਊਨ ਦੇ ਕਾਰਨ ਉਹ ਨਹੀਂ ਹੋ ਸਕੀ। ਚੰਗੀ ਗੱਲ ਇਹ ਰਹੀ ਸੀ ਕਿ ਮੁੰਬਈ ਦਾ ਸ਼ਡਿਊਲ ਹੀ ਬਾਕੀ ਸੀ। ਅਜਿਹੇ ਵਿੱਚ ਜਦ ਵੀ ਸ਼ੂਟਿੰਗ ਸ਼ੁਰੂ ਕਰਨ ਦਾ ਸਮਾਂ ਆਏਗਾ, ਸਾਨੂੰ ਸ਼ਹਿਰ ਤੋਂ ਬਾਹਰ ਸ਼ੂਟਿੰਗ ਨਹੀਂ ਕਰਨੀ ਪਵੇਗੀ। ‘ਏਜਰਾ’ ਸਾਲ 2017 ਵਿੱਚ ਇਸੇ ਨਾਂਅ ਨਾਲ ਰਿਲੀਜ਼ ਹੋਈ ਮਲਿਆਲਮ ਫਿਲਮ ਦੀ ਹਿੰਦੀ ਰੀਮੇਕ ਹੈ। ਫਿਲਮ ਦਾ ਨਿਰਦੇਸ਼ਨ ਮੂਲ ਫਿਲਮ ਦੇ ਡਾਇਰੈਕਟਰ ਜੈ ਕ੍ਰਿਸ਼ਨਨ ਹੀ ਕਰ ਰਹੇ ਹਨ।
ਅਭਿਸ਼ੇਕ ਪਾਠਕ ਦੇ ਨਿਰਮਾਣ ਵਿੱਚ ਬਣ ਰਹੀ ਇੱਕ ਹੋਰ ਫਿਲਮ ‘ਖੁਦਾ ਹਾਫਿਜ਼’ ਦੀ ਸ਼ੂਟਿੰਗ ਹੋ ਚੁੱਕੀ ਹੈ। ਇਸ ਦਾ ਨਿਰਦੇਸ਼ਨ ਫਾਰੂਖ ਕਬੀਰ ਨੇ ਕੀਤਾ ਹੈ। ਵਿਧੁਤ ਜਮਵਾਲ ਫਿਲਮ ਵਿੱਚ ਪ੍ਰਮੁੱਖ ਭੂਮਿਕਾ ਵਿੱਚ ਹਨ। ਇਸ ਫਿਲਮ ਦੀ ਸ਼ੂਟਿੰਗ ਉਜਬੇਕਿਸਤਾਨ, ਲਖਨਊ, ਮੁੰਬਈ ਵਿੱਚ ਹੋਈ ਹੈ। ਫਿਲਮ ਦੇ ਪੋਸਟ ਪ੍ਰੋਡਕਸ਼ਨ 'ਤੇ ਘਰ ਬੈਠੇ ਕੰਮ ਹੋ ਰਿਹਾ ਹੈ।