ਅੰਮ੍ਰਿਤਸਰ, 23 ਮਈ (ਪੋਸਟ ਬਿਊਰੋ)- ਇਸ ਹਫਤੇ ਅਮਰੀਕਾ ਵੱਲੋਂ ਭਾਰਤ ਨੂੰ ਸੌਂਪਿਆ ਗਿਆ ਅਲ ਕਾਇਦਾ ਦਾ ਦਹਿਸ਼ਤਗਰਦ ਮੁਹੰਮਦ ਇਬਰਾਹੀਮ ਜੁਬੈਰ, ਜਿਸ ਨੂੰ ਇਸ ਸਮੇਂ ਸਥਾਨਕ ਸਵਾਮੀ ਵਿਵੇਕਾਨੰਦ ਸਰਕਾਰੀ ਨਸ਼ਾ ਛੁਡਾਉ ਕੇਂਦਰ ਵਿੱਚ ਕੁਆਰੰਟਾਈਨ ਕੀਤਾ ਗਿਆ ਹੈ, ਬਾਰੇ ਸੂਤਰਾਂ ਦਾ ਕਹਿਣਾ ਹੈ ਕਿ ਭਾਰਤ ਵਿੱਚ ਉਸ ਵਿਰੁੱਧ ਇੱਕ ਵੀ ਕੇਸ ਨਹੀਂ ਹੈ। ਇਸ ਲਈ ਉਸ ਨੂੰ ਇਕਾਂਤਵਾਸ 'ਚ ਤੋਂ ਬਾਅਦ ਰਿਹਾਅ ਕੀਤਾ ਜਾ ਸਕਦਾ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਯਾਹੀਆ ਫਾਰੂਕ ਮੁਹੰਮਦ ਤੇ ਮੁਹੰਮਦ ਇਬਰਾਹੀਮ ਜੁਬੈਰ ਦੋਵੇਂ ਭਰਾ ਹੈਦਰਾਬਾਦ ਦੇ ਅਲਵਾਲ ਇਲਾਕੇ ਦੇ ਵਾਸੀ ਹਨ। ਇਹ ਦੋਵੇਂ ਅਮਰੀਕਾ ਪੜ੍ਹਨ ਗਏ ਸਨ, ਜਿੱਥੇ ਦੋਵਾਂ ਨੂੰ ਅਮਰੀਕੀ ਨਾਗਰਿਕਤਾ ਮਿਲ ਗਈ। ਓਥੇ ਰਹਿੰਦਿਆਂ ਇਹ ਦੋਵੇਂ ਅੱਤਵਾਦੀ ਸੰਗਠਨ ਅਲ ਕਾਇਦਾ ਵਿੱਚ ਸ਼ਾਮਲ ਹੋ ਗਏ। ਅਲ ਕਾਇਦਾ ਦੁਨੀਆ ਭਰ ਵਿੱਚ 400 ਦੇ ਲਗਭਗ ਹਮਲੇ ਕਰਵਾ ਚੁੱਕਾ ਦੱਸਿਆ ਜਾਂਦਾ ਹੈ। ਇਨ੍ਹਾਂ ਦੋਵਾਂ ਭਰਾਵਾਂ 'ਤੇ ਅੱਤਵਾਦੀ ਫੰਡਿੰਗ ਤੋਂ ਇਲਾਵਾ ਦਹਿਸ਼ਤਗਰਦਾਂ ਨਾਲ ਜੁੜੇ ਕਈ ਕੇਸ ਦਰਜ ਕੀਤੇ ਗਏ। ਯਾਹੀਆ ਫਾਰੂਕ ਮੁਹੰਮਦ ਨੂੰ ਅਮਰੀਕਾ ਵਿੱਚ 27 ਸਾਲ ਸਜ਼ਾ ਹੋਈ ਅਤੇ ਇਬਰਾਹੀਮ ਮੁਹੰਮਦ ਜੁਬੈਰ ਨੂੰ ਪੰਜ ਸਾਲ ਸਜ਼ਾ ਦਿੱਤੀ ਗਈ। ਜੁਬੈਰ ਨੂੰ ਉਸ ਦੀ ਪੰਜ ਸਾਲ ਸਜ਼ਾ ਪੂਰੀ ਹੋਣ ਤੋਂ ਬਾਅਦ ਭਾਰਤ ਭੇਜਿਆ ਗਿਆ ਹੈ, ਪਰ ਉਸ ਦਾ ਭਰਾ ਯਾਹੀਆ ਫਾਰੂਕ ਮੁਹੰਮਦ ਅਜੇ ਵੀ ਅਮਰੀਕੀ ਜੇਲ੍ਹ 'ਚ ਹੈ।