ਵਾਸਿੰਗਟਨ, 31 ਮਾਰਚ (ਪੋਸਟ ਬਿਊਰੋ) : ਜੌਹਨਸਨ ਐਂਡ ਜੌਹਨਸਨ ਨੇ ਸੋਮਵਾਰ ਨੂੰ ਆਖਿਆ ਕਿ ਉਨ੍ਹਾਂ ਵਲੋਂ ਕਰੋਨਾਵਾਇਰਸ ਲਈ ਵੈਕਸੀਨ ਦੀ ਚੋਣ ਕਰ ਲਈ ਗਈ ਹੈ। ਇਸ ਲਈ ਮਨੁਖੀ ਟਰਾਇਲ ਸਤੰਬਰ ਤੋਂ ਸੁਰੂ ਹੋ ਜਾਣਗੇ ਤੇ ਇਹ ਅਗਲੇ ਸਾਲ ਤੋਂ ਐਮਰਜੰਸੀ ਵਿਚ ਵਰਤੋਂ ਲਈ ਤਿਆਰ ਹੋਵੇਗੀ।
ਫਾਰਮਾਸਿਊਟੀਕਲ ਕੰਪਨੀ ਨੇ ਇਸ ਕੋਸਿਸ ਲਈ ਇਕ ਬਿਲੀਅਨ ਡਾਲਰ ਨਿਵੇਸ ਕਰਨ ਲਈ ਅਮਰੀਕੀ ਸਰਕਾਰ ਦੀ ਬਾਇਓਮੈਡੀਕਲ ਐਡਵਾਂਸਡ ਰਿਸਰਚ ਐਂਡ ਡਿਵੈਲਪਮੈਂਟ ਅਥਾਰਟੀ ਨਾਲ ਸਮਝੌਤੇ ਉਤੇ ਸਹੀ ਪਾਈ ਹੈ। ਇਹ ਖੁਲਾਸਾ ਬਿਆਨ ਵਿਚ ਕੀਤਾ ਗਿਆ। ਜੇਐਂਡਜੇ ਵਲੋਂ ਇਸ ਇਨਵੈਸਟੀਗੇਸਨਲ ਵੈਕਸੀਨ ਏਡੀ26 ਸਾਰਸ-ਕੋਵ-2 ਉਤੇ ਜਨਵਰੀ ਵਿਚ ਹੀ ਕੰਮ ਸੁਰੂ ਕਰ ਦਿਤਾ ਗਿਆ ਸੀ। ਇਸ ਵਿਚ ਵੀ ਉਹੀ ਤਕਨਾਲੋਜੀ ਵਰਤੀ ਜਾ ਰਹੀ ਹੈ ਜਿਹੜੀ ਈਬੋਲਾ ਲਈ ਵੈਕਸੀਨ ਤਿਆਰ ਕਰਨ ਲਈ ਵਰਤੀ ਗਈ ਸੀ।
ਇਸ ਵਿਚ ਵਾਇਰਸ ਦੇ ਡੀਐਕਟੀਵੇਟਿਡ ਵਰਜਨ ਦੀ ਵਰਤੋਂ ਕਰਕੇ ਮਨੁਖੀ ਇਮਿਊਨ ਸਿਸਟਮ ਨੂੰ ਪ੍ਰਤੀਕਿਰਿਆ ਕਰਨ ਲਈ ਉਕਸਾਇਆ ਜਾਂਦਾ ਹੈ। ਕੰਪਨੀ ਨੇ ਆਖਿਆ ਕਿ ਉਸ ਵਲੋਂ ਅਮਰੀਕਾ ਤੇ ਹੋਰਨਾਂ ਦੇਸਾਂ ਵਿਚ ਆਪਣੀ ਗਲੋਬਲ ਉਤਪਾਦਨ ਸਮਰਥਾ ਵਧਾਈ ਜਾ ਰਹੀ ਸੀ।