ਓਟਵਾ, 27 ਮਾਰਚ (ਪੋਸਟ ਬਿਊਰੋ) : ਕੋਵਿਡ-19 ਕਾਰਨ ਪੈਦਾ ਹੋਏ ਸੰਕਟ ਕਾਰਨ ਕੰਜ਼ਰਵੇਟਿਵ ਪਾਰਟੀ ਵੱਲੋਂ ਆਪਣੀ ਲੀਡਰਸਿ਼ਪ ਦੌੜ ਸਸਪੈਂਡ ਕਰ ਦਿੱਤੀ ਗਈ ਹੈ।
ਜੂਨ 27 ਨੂੰ ਹੋਣ ਜਾ ਰਹੀ ਇਸ ਚੋਣ ਦਾ ਕੰਮ ਹਾਲ ਦੀ ਘੜੀ ਲਟਕ ਗਿਆ ਹੈ। ਲੀਡਰਸਿ਼ਪ ਆਰਗੇਨਾਈਜਿ਼ੰਗ ਕਮੇਟੀ ਨੇ ਇਸ ਦਾ ਇੱਕੋ ਕਾਰਨ ਮਹਾਮਾਰੀ ਫੈਲਣਾ ਦੱਸਿਆ ਹੈ। ਕਮੇਟੀ, ਜਿਸ ਨੂੰ ਐਲਈਓਸੀ ਆਖਿਆ ਜਾਂਦਾ ਹੈ, ਨੇ ਇਹ ਫੈਸਲਾ ਵੀਰਵਾਰ ਰਾਤ ਨੂੰ ਕੀਤੀ ਗਈ ਮੀਟਿੰਗ ਤੋਂ ਬਾਅਦ ਲਿਆ। ਕਮੇਟੀ ਨੇ ਆਖਿਆ ਕਿ ਉਨ੍ਹਾਂ ਉੱਤੇ ਲੰਮੇਂ ਸਮੇਂ ਤੋਂ ਕੋਈ ਕਾਰਵਾਈ ਕਰਨ ਲਈ ਦਬਾਅ ਪਾਇਆ ਜਾ ਰਿਹਾ ਸੀ।
ਪਾਰਟੀ ਨੇ ਟਵਿੱਟਰ ਉੱਤੇ ਜਾਰੀ ਕੀਤੇ ਗਏ ਬਿਆਨ ਵਿੱਚ ਆਖਿਆ ਕਿ ਹੁਣ ਜਦੋਂ ਓਨਟਾਰੀਓ ਤੇ ਕਿਊਬਿਕ ਵਿੱਚ ਸਾਰੇ ਗੈਰ ਜ਼ਰੂਰੀ ਕੰਮ ਕਾਜ, ਇੱਥੋਂ ਤੱਕ ਕਿ ਹੈੱਡਕੁਆਰਟਰ ਤੱਕ, ਬੰਦ ਕਰ ਦਿੱਤੇ ਗਏ ਹਨ, ਤਾਂ ਐਲਈਓਸੀ ਨੇ ਆਖਿਆ ਕਿ ਹੁਣ ਮੈਂਬਰਸਿ਼ਪਸ ਤੇ ਡੋਨੇਸ਼ਨਜ਼ ਦੀ ਪ੍ਰਕਿਰਿਆ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣਾ ਸੰਭਵ ਨਹੀਂ ਰਿਹਾ।
ਇਸ ਸਬੰਧ ਵਿੱਚ ਅਜੇ ਕੋਈ ਵੀ ਨਵੀਂ ਤਰੀਕ ਤੈਅ ਨਹੀਂ ਕੀਤੀ ਗਈ ਹੈ। ਪਾਰਟੀ ਨੇ ਆਖਿਆ ਕਿ ਉਹ ਪਹਿਲੀ ਮਈ ਨੂੰ ਸਥਿਤੀ ਦਾ ਮੁਲਾਂਕਣ ਕਰੇਗੀ। ਇਸ ਦੌਰਾਨ ਅਪਰੈਲ ਵਿੱਚ ਨਿਰਧਾਰਤ ਬਹਿਸ ਨੂੰ ਵੀ ਰੱਦ ਕਰ ਦਿੱਤਾ ਗਿਆ ਹੈ। ਨਵੇਂ ਮੈਂਬਰ ਬਣਾਉਣ ਲਈ ਮਿਥੀ ਗਈ ਤਰੀਕ 17 ਅਪਰੈਲ ਨੂੰ ਬਦਲ ਕੇ 15 ਮਈ ਕਰ ਦਿੱਤਾ ਗਿਆ ਹੈ।