ਨਵੀਂ ਦਿੱਲੀ, 22 ਨਵੰਬਰ (ਪੋਸਟ ਬਿਊਰੋ)- ਭਾਰਤ ਵਿੱਚ ਇਲੈਕਟ੍ਰਾਨਿਕ ਟੋਲ ਨੂੰ ਉਤਸ਼ਾਹਤ ਕਰਨ ਅਤੇ ਮੁਸਾਫਰਾਂ ਨੂੰ ਸਹੂਲਤ ਦੇਣ ਲਈ ਸਰਕਾਰ ਇੱਕ ਦਸੰਬਰ ਤੋਂ ਨੈਸ਼ਨਲ ਹਾਈਵੇ 'ਤੇ ਫਾਸਟਟੈਗ ਜਾਂ ਆਰ ਐੱਫ ਆਈ ਡੀ ਨੂੰ ਜ਼ਰੂਰੀ ਕਰਨ ਜਾ ਰਹੀ ਹੈ। ਦੇਸ਼ ਦੇ ਸਾਰੇ ਨੈਸ਼ਨਲ ਹਾਈਵੇਜ਼ ਟੋਲ ਪਲਾਜ਼ਿਆਂ 'ਤੇ ਫਾਸਟਟੈਗ ਜ਼ਰੂਰੀ ਹੋਵੇਗਾ।
ਆਰ ਐੱਫ ਆਈ ਡੀ ਜਾਂ ਰੇਡੀਓ ਫਰੀਕੁਐਂਸੀ ਇਨਫਰਾਰੈਂਡ ਡਿਵਾਈਸ ਅਸਲ ਵਿੱਚ ਛੋਟੀ ਚਿਪ ਜਾਂ ਸਟਿੱਕਰ ਹੁੰਦਾ ਹੈ, ਜਿਸ ਨੂੰ ਵਾਹਨ ਦੇ ਅਗਲੇ ਸ਼ੀਸ਼ੇ 'ਤੇ ਚਿਪਕਾ ਸਕਦੇ ਹਾਂ। ਇਸੇ ਸਟਿੱਕਰ ਜਾਂ ਚਿਪ ਨੂੰ ਫਾਸਟਟੈਗ ਕਹਿੰਦੇ ਹਨ। ਫਾਸਟਟੈਗ ਲੱਗਾ ਵਾਹਨ ਜਦੋਂ ਨੈਸ਼ਨਲ ਹਾਈਵੇ ਜਾਂ ਕਿਸੇ ਟੋਲ ਪਲਾਜ਼ਾ ਤੋਂ ਲੰਘੇ ਤਾਂ ਉਥੇ ਟੋਲ ਪਲਾਜ਼ਾ 'ਤੇ ਲੱਗੇ ਹਾਈ ਡੈਫੀਨੇਸ਼ਨ ਕੈਮਰੇ ਆਰ ਐੱਫ ਆਈ ਡੀ ਜਾਂ ਫਾਸਟ ਟੈਗ ਨੂੰ ਸਕੈਨ ਕਰ ਲੈਣਗੇ ਤੇ ਟੋਲ ਭੁਗਤਾਨ ਇਲੈਕਟ੍ਰਾਨਿਕ ਤਰੀਕੇ ਨਾਲ ਹੋ ਜਾਵੇਗਾ। ਜੇ ਉਹ ਗੱਡੀ 24 ਘੰਟੇ ਦੇ ਅੰਦਰ ਉਸ ਟੋਲ ਨੂੰ ਵਾਪਸ ਪਾਰ ਕਰਦੀ ਹੈ ਤਾਂ ਉਸ ਤੋਂ ਚਾਰਜ ਨਹੀਂ ਲਿਆ ਜਾਵੇਗਾ, ਉਸ ਦੇ ਖਾਤੇ ਵਿੱਚੋਂ ਅੱਪ-ਡਾਊਨ ਵਾਲੀ ਰਕਮ ਕੱਟ ਹੋਵੇਗੀ। ਨਵੇਂ ਵਾਹਨ 'ਤੇ ਇਹ ਫਾਸਟਟੈਗ ਪਹਿਲਾਂ ਹੀ ਲੱਗ ਕੇ ਆਉਂਦੇ ਹਨ। ਪੁਰਾਣੇ ਵਾਹਨਾਂ ਲਈ ਫਾਸਟਟੈਗ ਨੂੰ ਖਰੀਦਣ ਅਤੇ ਲਗਾਉਣਾ ਹੋਵੇਗਾ। ਆਰ ਐੱਫ ਆਈ ਡੀ ਕਿਸੇ ਵੀ ਬੈਂਕ 'ਚ ਬਣਵਾਇਆ ਜਾ ਸਕਦਾ ਹੈ। ਬਹੁਤੇ ਟੋਲਾਂ 'ਤੇ ਬੈਂਕ ਅਧਿਕਾਰੀ-ਕਰਮਚਾਰੀ ਬਿਠਾ ਦਿੱਤੇ ਗਏ ਹਨ ਤਾਂ ਕਿ ਵਾਹਨ ਚਾਲਕ ਉਥੇ ਹੀ ਆਪਣੀ ਪ੍ਰਕਿਰਿਆ ਨੂੰ ਪੂਰਾ ਕਰ ਸਕਣ। ਇਸ ਦੇ ਵਾਹਨ ਚਾਲਕ ਨੂੰ ਆਪਣੇ ਵਾਹਨ ਦੀ ਆਰ ਸੀ, ਆਧਾਰ ਕਾਰਡ, ਪੈਨ ਕਾਰਡ ਆਦਿ ਦੀ ਫੋਟੋ ਕਾਪੀ ਦੀ ਜ਼ਰੂਰਤ ਹੁੰਦੀ ਹੈ।