ਪ੍ਰੀਟੋਰੀਆ, 23 ਅਗਸਤ (ਪੋਸਟ ਬਿਊਰੋ)- ਦੱਖਣੀ ਅਫਰੀਕਾ 'ਚ ਤਿੰਨ ਪਾਲਤੂ ਸ਼ੇਰਾਂ ਵੱਲੋਂ ਆਪਣੇ ਮਾਲਕ 'ਤੇ ਹਮਲਾ ਕਰਕੇ ਉਸ ਨੂੰ ਮਾਰ ਦੇਣ ਦਾ ਪਤਾ ਲੱਗਾ ਹੈ, ਜਿਸ ਪਿੱਛੋਂ ਸ਼ੇਰਾਂ ਨੂੰ ਵੀ ਗੋਲੀ ਮਾਰ ਦਿੱਤੀ ਗਈ।
ਯੂ ਕੇ ਮੈਟਰੋ ਦੀ ਰਿਪੋਰਟ ਅਨੁਸਾਰ ਲਿਓਨ ਵੈਨ ਬਿਲਜੋਨ (70) ਦੱਖਣੀ ਅਫਰੀਕਾ ਦੇ ਉਤਰ 'ਚ ਪ੍ਰੀਟੋਰੀਆ ਸਥਿਤ ਆਪਣੇ ‘ਗੇਮ ਲਾਜ' ਵਾੜ ਲਾ ਰਿਹਾ ਸੀ ਕਿ ਉਸ 'ਤੇ ਤਿੰਨ ਸ਼ੇਰਾਂ ਨੇ ਹਮਲਾ ਕਰ ਦਿੱਤਾ। ਬਿਜਲੋਨ ਨੇ ਸ਼ੇਰਾਂ ਨੂੰ ਛੋਟੇ ਹੁੰਦੇ ਤੋਂ ਪਾਲਿਆ ਸੀ। ਉਹ ਸ਼ੇਰਾਂ ਵੱਲ ਪਿੱਠ ਕਰਕੇ ਵਾੜ ਲਾ ਰਿਹਾ ਸੀ। ਇਸ ਦੌਰਾਨ ਇਕ ਸ਼ੇਰਨੀ ਅਤੇ ਦੋ ਸ਼ੇਰਾਂ ਨੇ ਉਸ 'ਤੇ ਹਮਲਾ ਕਰ ਦਿੱਤਾ। ਬਚਾਅ ਕਰਮੀ ਬਿਜਲੋਨ ਦੀ ਮਦਦ ਲਈ ਸੱਦਿਆ ਗਿਆ, ਪਰ ਉਹ ਬਿਜਲੋਨ ਤੱਕ ਨਾ ਪਹੁੰਚ ਸਕਿਆ, ਕਿਉਂਕਿ ਸ਼ੇਰ ਉਸ ਨੂੰ ਮਾਰਨ ਦੇ ਬਾਅਦ ਉਸ ਦੇ ਮ੍ਰਿਤਕ ਸਰੀਰ ਕੋਲ ਬੈਠੇ ਸਨ। ਇਸ ਪਿੱਛੋਂ ‘ਗੇਮ ਰੇਂਜਰ' ਬੁਲਾਇਆ ਗਿਆ ਤੇ ਉਸ ਨੇ ਤਿੰਨਾਂ ਸ਼ੇਰਾਂ ਨੂੰ ਗੋਲੀਆਂ ਨਾਲ ਮਾਰ ਦਿੱਤਾ। ਮਾਹਰਾਂ ਨੇ ਕਿਹਾ ਹੈ ਕਿ ਖਤਰਨਾਕ ਜੰਗਲੀ ਜਾਨਵਰਾਂ ਨੂੰ ਭਾਵੇਂ ਜਨਮ ਤੋਂ ਪਾਲਿਆ ਜਾਵੇ, ਇਹ ਆਪਣਾ ਹਮਲਾਵਰ ਵਿਹਾਰ ਨਹੀਂ ਛੱਡਦੇ।