ਓਟਵਾ, 22 ਅਗਸਤ (ਪੋਸਟ ਬਿਊਰੋ) : ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਈਕ ਪੌਂਪੀਓ ਵੱਲੋਂ ਅੱਜ ਓਟਵਾ ਦੇ ਕੀਤੇ ਜਾਣ ਵਾਲੇ ਦੌਰੇ ਦੇ ਮੱਦੇਨਜ਼ਰ ਪਾਰਲੀਆਮੈਂਟ ਹਿੱਲ ਦੇ ਦੁਆਲੇ ਸੁਰੱਖਿਆ ਪ੍ਰਬੰਧ ਹੋਰ ਸਖ਼ਤ ਕਰ ਦਿੱਤੇ ਗਏ ਹਨ।
ਪਾਰਲੀਆਮੈਂਟਰੀ ਪ੍ਰੋਟੈਕਟਿਵ ਸਰਵਿਸ ਵੱਲੋਂ ਇਹ ਆਖਿਆ ਗਿਆ ਕਿ ਪੌਂਪੀਓ ਦੇ ਦੌਰੇ ਕਾਰਨ ਮੌਕੇ ਦੀ ਨਜ਼ਾਕਤ ਨੂੰ ਵੇਖਦਿਆਂ ਹੋਇਆਂ ਹੀ ਇਹ ਸੁਰੱਖਿਆ ਪ੍ਰਬੰਧ ਐਨੇ ਸਖ਼ਤ ਕੀਤੇ ਗਏ ਹਨ। ਵਿਦੇਸ਼ ਮੰਤਰੀ ਕ੍ਰਿਸਟੀਆ ਫਰੀਲੈਂਡ ਦੇ ਆਫਿਸ ਦਾ ਕਹਿਣਾ ਹੈ ਕਿ ਪੌਂਪੀਓ ਨਾਲ ਹੋਣ ਵਾਲੀ ਗੱਲਬਾਤ ਕਈ ਘਰੇਲੂ ਤੇ ਕੌਮਾਂਤਰੀ ਮੁਹਾਜਾਂ ਬਾਰੇ ਸਹਿਯੋਗ ਦੇ ਨਾਲ ਨਾਲ ਸਕਿਊਰਿਟੀ ਤੇ ਵਿਦੇਸ਼ ਨੀਤੀ ਨਾਲ ਵੀ ਸਬੰਧਤ ਹੋਵੇਗੀ। ਵਿਦੇਸ਼ ਮੰਤਰਾਲੇ ਨੇ ਦੱਸਿਆ ਕਿ ਵੈਨੇਜ਼ੁਏਲਾ ਦਾ ਸੰਕਟ ਵੀ ਏਜੰਡੇ ਉੱਤੇ ਰਹੇਗਾ।
ਪੌਂਪੀਓ ਵੱਲੋਂ ਇਸ ਹਫਤੇ ਬਿਆਰਿਟਜ਼, ਫਰਾਂਸ ਵਿੱਚ ਹੋਣ ਜਾ ਰਹੀ ਜੀ-7 ਸਿਖਰ ਵਾਰਤਾ ਤੋਂ ਠੀਕ ਪਹਿਲਾਂ ਇਹ ਦੌਰਾ ਕੀਤਾ ਜਾ ਰਿਹਾ ਹੈ। ਜੀ-7 ਸਿਖਰ ਵਾਰਤਾ ਵਿੱਚ ਪ੍ਰਧਾਨ ਮੰਤਰੀ ਟਰੂਡੋ ਕੈਨੇਡਾ ਸਮੇਤ ਦੁਨੀਆ ਦੇ ਸੱਤ ਅਮੀਰ ਅਰਥਚਾਰਿਆਂ ਦੇ ਆਗੂਆਂ ਨਾਲ ਸ਼ਾਮਲ ਹੋਣਗੇ।