- ਕੈਨੇਡਾ ਦੀ 45ਵੀਂ ਪਾਰਲੀਮੈਂਟ ਦਾ ਕੀਤਾ ਰਸਮੀ ਆਗ਼ਾਜ਼
ਓਟਵਾ, 27 ਮਈ (ਪੋਸਟ ਬਿਊਰੋ): ਅੱਜ ਕਿੰਗ ਚਾਰਲਸ ਨੇ ਕੈਨੇਡੀਅਨ ਪਾਰਲੀਮੈਂਟ ਵਿਚ ਥ੍ਰੋਨ ਸਪੀਚ ਪੜ੍ਹਦਿਆਂ ਕੈਨੇਡਾ ਦੀ 45ਵੀਂ ਪਾਰਲੀਮੈਂਟ ਦਾ ਰਸਮੀ ਆਗ਼ਾਜ਼ ਕੀਤਾ।
ਪਾਰਲੀਮੈਂਟ ਦੇ ਹਰ ਨਵੇਂ ਸੈਸ਼ਨ ਦੀ ਸ਼ੁਰੂਆਤ ਇੱਕ ਥ੍ਰੋਨ ਸਪੀਚ ਰਾਹੀਂ ਹੁੰਦੀ ਹੈ। ਇਹ ਭਾਸ਼ਣ ਇੱਕ ਦਸਤਾਵੇਜ਼ ਹੁੰਦਾ ਹੈ ਜੋ ਇਹ ਦੱਸਦਾ ਹੈ ਕਿ ਸਰਕਾਰ ਅਗਲੇ ਸਮੇਂ ਦੌਰਾਨ ਕਿਹੜੀ ਦਿਸ਼ਾ ਵਿਚ ਕੰਮ ਕਰਨ ਦੀ ਉਮੀਦ ਰੱਖਦੀ ਹੈ, ਕੀ ਉਸਦੇ ਨਿਸ਼ਾਨੇ ਹਨ, ਅਤੇ ਉਹਨਾਂ ਨੂੰ ਪੂਰਾ ਕਰਨ ਲਈ ਕੀ ਯੋਜਨਾਵਾਂ ਬਣਾਈਆਂ ਗਈਆਂ ਹਨ।
ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਕੈਨੇਡਾ ਦੀ ਪ੍ਰਭੂਸੱਤਾ ਨੂੰ ਧਮਕੀਆਂ ਦੇਣ ਵਾਲੀਆਂ ਟਿੱਪਣੀਆਂ ਤੋਂ ਬਾਅਦ, ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕਿੰਗ ਚਾਰਲਜ਼ ਨੂੰ ਥ੍ਰੋਨ ਸਪੀਚ ਦੇਣ ਲਈ ਆਖਿਆ ਸੀ।
ਕਿੰਗ ਚਾਰਲਜ਼ ਨੇ ਆਪਣੇ ਭਾਸ਼ਣ ਦੇ ਸਮਾਪਨ ਵੇਲੇ ਕੈਨੇਡਾ ਦੀ ਪ੍ਰਸ਼ੰਸਾ ਕਰਦਿਆਂ ਇਸਨੂੰ ਦੁਨੀਆ ਦੇ ਚੰਗੇ ਲਈ ਇੱਕ ਤਾਕਤ ਆਖਿਆ। ਫਿਰ ਉਨ੍ਹਾਂ ਕਿਹਾ ਕਿ ਜਿਵੇਂ ਕੈਨੇਡੀਅਨ ਰਾਸ਼ਟਰੀ ਗਾਨ ਦੱਸਦਾ ਹੈ ਕਿ ਕੈਨੇਡਾ ਮਜ਼ਬੂਤ ਅਤੇ ਆਜ਼ਾਦ ਹੈ। ਕੈਨੇਡੀਅਨ ਰਾਸ਼ਟਰੀ ਗਾਨ ਵਿਚ The True North strong and free ਦੀ ਪੰਕਤੀ ਆਉਂਦੀ ਹੈ, ਜਿਸ ਦਾ ਜ਼ਿਕਰ ਚਾਰਲਸ ਨੇ ਕੀਤਾ।
ਇਹ ਤੀਜੀ ਵਾਰ ਹੋਇਆ ਹੈ ਕਿ ਜਦੋਂ ਕਿਸੇ ਬ੍ਰਿਟਿਸ਼ ਬਾਦਸ਼ਾਹ ਨੇ ਕੈਨੇਡਾ ਵਿੱਚ ਥ੍ਰੋਨ ਸਪੀਚ ਦਿੱਤੀ ਹੈ। ਮਹਾਰਾਣੀ ਐਲਿਜ਼ਾਬੈਥ ਨੇ 1957 ਅਤੇ 1977 ਵਿਚ ਕੈਨੇਡਾ ਵਿਚ ਥ੍ਰੋਨ ਸਪੀਚ ਦਿੱਤੀ ਸੀ।