ਨਾਇਪੀਡਾਵ, 9 ਜੁਲਾਈ (ਪੋਸਟ ਬਿਊਰੋ): ਮਿਆਂਮਾਰ ਵਿੱਚ ਘੱਟ ਗਿਣਤੀ ਕਬਾਇਲੀ ਬਾਗੀ ਸਮੂਹ ਅਰਾਕਾਨ ਨੇ ਫੌਜੀ ਸ਼ਾਸਨ ਖਿਲਾਫ ਚੱਲ ਰਹੀ ਲੜਾਈ ਵਿੱਚ ਇੱਕ ਹਵਾਈ ਅੱਡੇ ਉੱਤੇ ਕਬਜ਼ਾ ਕਰ ਲਿਆ ਹੈ।
ਥਾਂਡਵੇ ਨਾਮ ਦਾ ਇਹ ਹਵਾਈ ਅੱਡਾ ਮਿਆਂਮਾਰ ਦੇ ਪੱਛਮੀ ਸੂਬੇ ਰਖਾਈਨ ਦੇ ਦੱਖਣੀ ਹਿੱਸੇ ਵਿੱਚ ਸਥਿਤ ਹੈ। ਇਸ ਨੂੰ ਮਾ ਜਿਨ ਹਵਾਈ ਅੱਡੇ ਵਜੋਂ ਵੀ ਜਾਣਿਆ ਜਾਂਦਾ ਹੈ। ਦੇਸ਼ ਦੇ ਸਭ ਤੋਂ ਵੱਡੇ ਸ਼ਹਿਰ ਯੰਗੂਨ ਤੋਂ ਇਸਦੀ ਦੂਰੀ 260 ਕਿਲੋਮੀਟਰ ਹੈ।
ਰਖਾਈਨ ਸੂਬੇ ਦੇ ਨਿਵਾਸੀਆਂ ਅਤੇ ਸਥਾਨਕ ਮੀਡੀਆ ਨੇ ਵੀ ਹਵਾਈ ਅੱਡੇ 'ਤੇ ਕਬਜ਼ਾ ਕਰਨ ਦੀ ਪੁਸ਼ਟੀ ਕੀਤੀ ਹੈ। ਫਿਲਹਾਲ ਇਸ ਏਅਰਪੋਰਟ 'ਤੇ ਅਰਾਕਾਨ ਗਰੁੱਪ ਵੱਲੋਂ ਕਬਜ਼ਾ ਕਰਨ ਤੋਂ ਬਾਅਦ ਹਰ ਤਰ੍ਹਾਂ ਦੀਆਂ ਗਤੀਵਿਧੀਆਂ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ।
ਮਿਆਂਮਾਰ ਵਿੱਚ ਫੌਜੀ ਸ਼ਾਸਨ ਲਾਗੂ ਹੋਣ ਤੋਂ ਬਾਅਦ ਥਾਂਡਵੇ ਹਵਾਈ ਅੱਡਾ ਬਾਗੀ ਸਮੂਹ ਦੁਆਰਾ ਕਬਜ਼ਾ ਕੀਤਾ ਜਾਣ ਵਾਲਾ ਪਹਿਲਾ ਸਥਾਨ ਹੈ। ਇਹ ਹਵਾਈ ਅੱਡਾ ਦੇਸ਼ ਦੇ ਸਭ ਤੋਂ ਮਹੱਤਵਪੂਰਨ ਸਮੁੰਦਰੀ ਰਿਜ਼ੋਰਟਾਂ ਦੀ ਸੇਵਾ ਦਿੰਦਾ ਹੈ।
ਹਵਾਈ ਅੱਡੇ 'ਤੇ ਕਬਜ਼ਾ ਕਰਨ ਨਾਲ ਅਰਾਕਾਨ ਆਰਮੀ ਲਈ ਰਖਾਈਨ ਸੂਬੇ ਦੇ ਤੱਟੀ ਇਲਾਕਿਆਂ 'ਤੇ ਕਬਜ਼ਾ ਕਰਨ ਦਾ ਰਾਹ ਖੁੱਲ੍ਹ ਗਿਆ ਹੈ। ਅਰਾਕਾਨ ਆਰਮੀ ਦਾ ਪਹਿਲਾਂ ਹੀ ਖੇਤਰ ਦੇ ਉੱਤਰੀ ਹਿੱਸੇ 'ਤੇ ਕੰਟਰੋਲ ਹੈ।