ਕਲਕੱਤਾ, 21 ਅਪ੍ਰੈਲ (ਪੋਸਟ ਬਿਊਰੋ): ਪੱਛਮੀ ਬੰਗਾਲ ਦੇ ਕ੍ਰਿਸ਼ਨਾਨਗਰ ਤੋਂ ਟੀਐੱਮਸੀ ਉਮੀਦਵਾਰ ਮਹੂਆ ਮੋਇਤਰਾ ਨੇ ਸ਼ੁੱਕਰਵਾਰ, 19 ਅਪ੍ਰੈਲ ਨੂੰ ਆਪਣਾ ਨਾਮਜ਼ਦਗੀ ਪੱਤਰ ਦਾਖਲ ਕੀਤਾ। ਨਾਦੀਆ ਜਿ਼ਲ੍ਹਾ ਮੈਜਿਸਟ੍ਰੇਟ ਦਫ਼ਤਰ ਵਿੱਚ ਰਿਟਰਨਿੰਗ ਅਫ਼ਸਰ ਨੂੰ ਦਿੱਤੇ ਹਲਫ਼ਨਾਮੇ ਵਿੱਚ, ਮਹੂਆ ਨੇ ਕਿਹਾ ਹੈ ਕਿ ਉਨ੍ਹਾਂ ਦੀ ਜਾਇਦਾਦ ਵਿੱਚ 80 ਲੱਖ ਰੁਪਏ ਦੀ ਇੱਕ ਹੀਰੇ ਦੀ ਅੰਗੂਠੀ, 2.72 ਲੱਖ ਰੁਪਏ ਦੀ ਕੀਮਤ ਦਾ ਇੱਕ ਚਾਂਦੀ ਦਾ ਡਿਨਰ ਸੈੱਟ ਅਤੇ 30 ਲੱਖ ਰੁਪਏ ਦਾ ਇੱਕ ਆਰਟ ਵਰਕ ਵੀ ਸ਼ਾਮਿਲ ਹੈ।
ਲੋਕ ਸਭਾ ਸਕੱਤਰੇਤ ਨੇ 8 ਦਸੰਬਰ 2023 ਨੂੰ ਕੈਸ਼ ਫਾਰ ਕਿਊਰੀ ਮਾਮਲੇ ਵਿੱਚ ਮਹੂਆ ਦੀ ਲੋਕ ਸਭਾ ਮੈਂਬਰਸਿ਼ਪ ਰੱਦ ਕਰ ਦਿੱਤੀ ਸੀ। ਮਹੂਆ ਮੋਇਤਰਾ ਨੇ 2019 ਦੀਆਂ ਲੋਕ ਸਭਾ ਚੋਣਾਂ 6 ਲੱਖ 14 ਹਜ਼ਾਰ 872 ਵੋਟਾਂ ਨਾਲ ਜਿੱਤ ਹਾਸਿਲ ਕੀਤੀ ਸੀ। ਜਦਕਿ ਭਾਜਪਾ ਦੇ ਕਲਿਆਣ ਚੌਬੇ ਨੂੰ 5 ਲੱਖ 51 ਹਜ਼ਾਰ 654 ਵੋਟਾਂ ਮਿਲੀਆਂ।
ਮਹੂਆ ਨੇ ਰਿਟਰਨਿੰਗ ਅਫਸਰ ਨੂੰ ਦਿੱਤੇ 14 ਪੰਨਿਆਂ ਦੇ ਹਲਫਨਾਮੇ ਵਿੱਚ ਆਪਣੀ ਕੁੱਲ ਆਮਦਨ ਅਤੇ ਜਾਇਦਾਦ ਦਾ ਐਲਾਨ ਕੀਤਾ ਹੈ। ਮਹੂਆ ਦੀ ਮੌਜੂਦਾ ਕਮਾਈ 12 ਲੱਖ 7 ਹਜ਼ਾਰ 541 ਰੁਪਏ ਹੈ। ਇਹ ਰਕਮ 2018-19 ਦੇ ਮੁਕਾਬਲੇ ਜਿ਼ਆਦਾ ਹੈ। 2019 ਵਿੱਚ ਉਨ੍ਹਾਂ ਦੀ ਆਮਦਨ 5 ਲੱਖ 51 ਹਜ਼ਾਰ 80 ਰੁਪਏ ਸੀ।
ਮਹੂਆ ਦੀ ਹੋਰ ਐਲਾਨੀ ਜਾਇਦਾਦ ਵਿੱਚ 9.41 ਲੱਖ ਰੁਪਏ ਦਾ 150 ਗ੍ਰਾਮ ਸੋਨਾ, 2.72 ਲੱਖ ਰੁਪਏ ਦਾ ਇੱਕ ਚਾਂਦੀ ਦਾ ਡਿਨਰ ਸੈੱਟ, 1.17 ਲੱਖ ਰੁਪਏ ਦਾ ਇੱਕ ਚਾਂਦੀ ਦਾ ਚਾਹ ਸੈੱਟ ਅਤੇ 8 ਲੱਖ ਰੁਪਏ ਦੇ ਗਹਿਣੇ ਸ਼ਾਮਿਲ ਹਨ। ਗਹਿਣਿਆਂ ਦੀ ਕੁੱਲ ਕੀਮਤ 3.5 ਕਰੋੜ ਰੁਪਏ ਹੈ। ਮਹੂਆ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਖਿਲਾਫ ਅਪਰਾਧਿਕ ਮਾਮਲਾ ਦਰਜ ਹੈ। ਜਿਸ ਦੀ ਜਾਂਚ ਚੱਲ ਰਹੀ ਹੈ।