ਨਵੀਂ ਦਿੱਲੀ, 2 ਮਈ (ਪੋਸਟ ਬਿਊਰੋ): ਕਾਂਗਰਸ ਦੀ ਕੌਮੀ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਨੇ ਪ੍ਰਧਾਨ ਮੰਤਰੀ ਮੋਦੀ 'ਤੇ ਤਿੱਖਾ ਨਿਸ਼ਾਨਾ ਸਾਧਿਆ ਹੈ। ਉਨ੍ਹਾਂ ਕਿਹਾ ਕਿ ਮੋਦੀ ਆਪਣੇ ਆਪ ਨੂੰ ਬਹੁਤ ਇਮਾਨਦਾਰ ਕਹਿੰਦੇ ਹਨ, ਪਰ ਉਹ ਇਸ ਦੇਸ਼ ਵਿੱਚ ਭ੍ਰਿਸ਼ਟਾਚਾਰ ਦੀ ਸਭ ਤੋਂ ਵੱਡੀ ਸਕੀਮ ਲੈ ਕੇ ਆਏ। ਇਹ ਇੱਕ ਸਕੀਮ ਸੀ, ਦਾਨ ਕਰਨ ਵਾਲੇ ਦਾ ਨਾਮ ਗੁਪਤ ਰਹੇਗਾ। ਇਸ ਤਹਿਤ ਉਨ੍ਹਾਂ ਨੇ ਆਪਣੇ ਵੱਡੇ ਦੋਸਤਾਂ ਤੋਂ ਚੰਦਾ ਲਿਆ। ਪਹਿਲਾਂ ਛਾਪਾ ਮਾਰਿਆ, ਫਿਰ ਚੰਦਾ ਲੈ ਕੇ ਜਾਂਚ ਬੰਦ ਕਰ ਦਿੱਤੀ। ਉਨ੍ਹਾਂ ਗੁਜਰਾਤ ਵਿੱਚ ਪੁਲ ਡਿੱਗਣ ਦੀ ਘਟਨਾ ਦੀ ਉਦਾਹਰਣ ਵੀ ਦਿੱਤੀ।
ਪ੍ਰਿਅੰਕਾ ਵੀਰਵਾਰ ਨੂੰ ਕੋਰਬਾ ਲੋਕ ਸਭਾ ਦੇ ਚਿਰਮੀਰੀ 'ਚ ਇਕ ਜਨ ਸਭਾ ਨੂੰ ਸੰਬੋਧਨ ਕਰ ਰਹਟ ਸਨ। ਉਨ੍ਹਾਂ ਕੋਵਿਡ ਵੈਕਸੀਨ 'ਕੋਵਿਸ਼ੀਲਡ' ਸਬੰਧੀ ਰਿਪੋਰਟ ਦਾ ਵੀ ਜਿ਼ਕਰ ਕੀਤਾ। ਉਨ੍ਹਾਂ ਕਿਹਾ ਕਿ ਟੀਕਾ ਲਗਵਾਉਣ ਤੋਂ ਬਾਅਦ ਕੁਝ ਲੋਕਾਂ ਦੀ ਮੌਤ ਹੋ ਗਈ, ਕੁਝ ਬੀਮਾਰ ਹੋ ਗਏ। ਪਹਿਲਾਂ ਸਰਟੀਫਿਕੇਟ 'ਤੇ ਮੋਦੀ ਦੀ ਫੋਟੋ ਹੁੰਦੀ ਸੀ, ਪਰ ਹੁਣ ਲੱਭਣ 'ਤੇ ਨਹੀਂ ਮਿਲੇਗੀ।
ਪ੍ਰਿਅੰਕਾ ਦੀ ਛੱਤੀਸਗੜ੍ਹ ਦੀ ਇਹ ਦੂਜੀ ਫੇਰੀ ਸੀ। ਇਸ ਤੋਂ ਪਹਿਲਾਂ ਦੂਜੇ ਪੜਾਅ ਦੇ ਪ੍ਰਚਾਰ ਲਈ ਉਨ੍ਹਾਂ ਨੇ ਰਾਜਨੰਦਗਾਂਵ ਅਤੇ ਕਾਂਕੇਰ 'ਚ ਚੋਣ ਪ੍ਰਚਾਰ ਕੀਤਾ ਸੀ। ਛੱਤੀਸਗੜ੍ਹ ਦੀਆਂ 11 ਲੋਕ ਸਭਾ ਸੀਟਾਂ ਵਿੱਚੋਂ ਸਿਰਫ਼ 2 ਬਸਤਰ ਅਤੇ ਕੋਰਬਾ ਕਾਂਗਰਸ ਕੋਲ ਹਨ, ਬਾਕੀ 9 ਸੀਟਾਂ ਭਾਜਪਾ ਨੇ ਜਿੱਤੀਆਂ ਹਨ। ਇਸ ਵਾਰ ਭਾਜਪਾ ਵੱਲੋਂ ਪਾਰਟੀ ਦੀ ਮਜ਼ਬੂਤ ਨੇਤਾ ਸਰੋਜ ਪਾਂਡੇ ਚੋਣ ਮੈਦਾਨ ਵਿੱਚ ਹਨ। ਇਸ ਦੇ ਨਾਲ ਹੀ ਕਾਂਗਰਸ ਨੇ ਸੰਸਦ ਮੈਂਬਰ ਜਯੋਤਸਨਾ ਮਹੰਤ 'ਤੇ ਮੁੜ ਭਰੋਸਾ ਜਤਾਇਆ ਹੈ। ਅਜਿਹੇ 'ਚ ਇਸ ਸੀਟ ਨੂੰ ਕਾਫੀ ਅਹਿਮ ਮੰਨਿਆ ਜਾ ਰਿਹਾ ਹੈ।