ਓਸ਼ਵਾ, 29 ਫਰਵਰੀ (ਪੋਸਟ ਬਿਊਰੋ) : ਮੰਗਲਵਾਰ ਦੁਪਹਿਰ ਨੂੰ ਓਸ਼ਵਾ ਵਿੱਚ ਇੱਕ ਵਿਅਕਤੀ ਉੱਤੇ ਚਾਕੂ ਨਾਲ ਵਾਰ ਕਰਕੇ ਉਸ ਨਾਲ ਲੁੱਟ ਖੋਹ ਕਰਨ ਵਾਲੇ ਦੋ ਲੜਕਿਆਂ ਉੱਤੇ ਕਈ ਦਰਜਨ ਚਾਰਜਿਜ਼ ਲਾਏ ਗਏ ਹਨ।
ਦਰਹਾਮ ਪੁਲਿਸ ਨੇ ਦੱਸਿਆ ਕਿ ਦੁਪਹਿਰੇ 1:00 ਵਜੇ ਤੋਂ ਪਹਿਲਾਂ ਦੋ ਲੜਕੇ ਜੌਹਨ ਸਟਰੀਟ ਵੈਸਟ ਤੇ ਸੈਂਟਰ ਸਟਰੀਟ ਸਾਊਥ ਇਲਾਕੇ ਵਿੱਚ ਇੱਕ ਵਿਅਕਤੀ ਕੋਲ ਪਹੁੰਚੇ ਤੇ ਉਸ ਕੋਲੋਂ ਉਸ ਦਾ ਸੈੱਲਫੋਨ ਖੋਹ ਲਿਆ। ਜਦੋਂ ਉਸ ਵਿਅਕਤੀ ਨੇ ਆਪਣਾ ਸੈੱਲਫੋਨ ਵਾਪਿਸ ਲੈਣ ਦੀ ਕੋਸਿ਼ਸ਼ ਕੀਤੀ ਤਾਂ ਇੱਕ ਲੜਕੇ ਨੇ ਉਸ ਉੱਤੇ ਚਾਕੂ ਨਾਲ ਵਾਰ ਕਰ ਦਿੱਤਾ।
ਦੋਵੇਂ ਮਸ਼ਕੂਕ ਮੌਕੇ ਤੋਂ ਫਰਾਰ ਹੋ ਗਏ ਪਰ ਕੁੱਝ ਹੀ ਦੂਰੀ ਉੱਤੇ ਪੁਲਿਸ ਵੱਲੋਂ ਉਨ੍ਹਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਓਸ਼ਵਾ ਦੇ 13 ਸਾਲਾ ਲੜਕੇ ਖਿਲਾਫ ਗੁੱਸੇ ਨਾਲ ਹਮਲਾ ਕਰਨ, ਲੁਕੋ ਕੇ ਹਥਿਆਰ ਕੋਲ ਰੱਖਣ ਆਦਿ ਵਰਗੇ 10 ਚਾਰਜਿਜ਼ ਲਾਏ ਗਏ ਹਨ। ਓਸ਼ਵਾ ਦੇ 12 ਸਾਲਾ ਲੜਕੇ ਨੂੰ ਲੁੱਟ ਖੋਹ ਕਰਨ, ਹਥਿਆਰ ਰੱਖਣ ਆਦਿ ਵਰਗੇ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਹੋਵੇਗਾ।