ਓਨਟਾਰੀਓ, 17 ਸਤੰਬਰ (ਪੋਸਟ ਬਿਊਰੋ) : ਜੀਟੀਏ ਦੇ ਹਾਈਵੇਅ ਉੱਤੇ ਕਾਰ ਹਾਦਸੇ ਦੀ ਜਾਂਚ ਕਰ ਰਹੇ ਰੋਡ ਕ੍ਰਿਊ ਵਿੱਚ ਲਿਆ ਕੇ ਗੱਡੀ ਮਾਰਨ ਵਾਲੇ ਨਸੇ਼ ਵਿੱਚ ਧੁੱਤ ਵਿਅਕਤੀ ਦੇ ਮਾਮਲੇ ਦੀ ਪੁਲਿਸ ਜਾਂਚ ਕਰ ਰਹੀ ਹੈ। ਇਸ ਘਟਨਾ ਵਿੱਚ ਚਾਰ ਵਿਅਕਤੀ ਜ਼ਖ਼ਮੀ ਹੋ ਗਏ।
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ (ਓਪੀਪੀ) ਵੱਲੋਂ ਐਤਵਾਰ ਨੂੰ ਸੋਸ਼ਲ ਮੀਡੀਆ ਉੱਤੇ ਕੀਤੀ ਗਈ ਪੋਸਟ ਵਿੱਚ ਦੱਸਿਆ ਗਿਆ ਕਿ ਮਿਸੀਸਾਗਾ ਵਿੱਚ ਵਿੰਸਟਨ ਚਰਚਿਲ ਬੁਲੇਵਾਰਡ ਨੇੜੇ ਕਿਊਈਡਬਲਿਊ ਉੱਤੇ ਹੋਏ ਹਾਦਸੇ ਦੀ ਪੁਲਿਸ ਅਧਿਕਾਰੀਆਂ ਵੱਲੋਂ ਜਾਂਚ ਕੀਤੀ ਜਾ ਰਹੀ ਸੀ।ਇਸ ਦੌਰਾਨ ਇੱਕ ਹੋਰ ਕਾਰ ਆ ਕੇ ਉਸ ਟਰੱਕ ਨਾਲ ਟਕਰਾਅ ਗਈ ਜਿਹੜਾ ਸੀਨ ਦੀ ਹਿਫਾਜ਼ਤ ਲਈ ਚੱਲਦੇ ਟਰੈਫਿਕ ਦੀ ਲਾਈਨ ਵਿੱਚ ਖੜ੍ਹਾ ਸੀ।
ਹਾਦਸੇ ਵਾਲੀ ਥਾਂ ਦੀਆਂ ਤਸਵੀਰਾਂ ਤੋਂ ਸਾਹਮਣੇ ਆਇਆ ਹੈ ਕਿ ਇੱਕ ਕਾਲੇ ਰੰਗ ਦੀ ਸੇਡਾਨ ਦਾ ਸਾਹਮਣੇ ਵਾਲਾ ਹਿੱਸਾ ਬੁਰੀ ਤਰ੍ਹਾਂ ਟੁੱਟਿਆ ਭੱਜਿਆ ਪਿਆ ਹੈ ਜਦਕਿ ਇੱਕ ਟਰੱਕ ਨੂੰ ਵੀ ਕਾਫੀ ਨੁਕਸਾਨ ਪਹੁੰਚਿਆ ਹੈ। ਹੋਰਨਾਂ ਤਸਵੀਰਾਂ ਵਿੱਚ ਕਾਰ ਅੰਦਰ ਦਾਰੂ ਦੀਆਂ ਬੋਤਲਾਂ ਖਿੱਲਰੀਆਂ ਵੀ ਨਜ਼ਰ ਆ ਰਹੀਆਂ ਹਨ। ਇੱਕ ਬੋਤਲ ਡਰਾਈਵਰ ਦੀ ਸੀਟ ਥੱਲੇ ਤੇ ਦੂਜੀ ਪੈਸੈਂਜਰ ਸੀਟ ਥੱਲੇ ਪਈ ਨਜ਼ਰ ਆ ਰਹੀ ਹੈ।
ਓਪੀਪੀ ਵੱਲੋਂ ਪਾਈ ਗਈ ਪੋਸਟ ਅਨੁਸਾਰ ਚਾਰ ਵਿਅਕਤੀਆਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿਨ੍ਹਾਂ ਵਿੱਚ ਟਰਾਂਸਪੋਰਟੇਸ਼ਨ ਮੰਤਰਾਲੇ ਦੇ ਵਰਕਰ ਵੀ ਸ਼ਾਮਲ ਸਨ। ਕਾਰ ਦੇ ਡਰਾਈਵਰ ਨੂੰ ਨਸ਼ਾ ਕਰਕੇ ਗੱਡੀ ਚਲਾਉਣ ਲਈ ਚਾਰਜ ਕੀਤਾ ਗਿਆ ਹੈ।