ਓਨਟਾਰੀਓ, 30 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਤੋਂ ਲਿਬਰਲ ਐਮਪੀਪੀ ਮਿਤਜ਼ੀ ਹੰਟਰ ਵੱਲੋਂ ਵੀ ਟੋਰਾਂਟੋ ਦੇ ਮੇਅਰ ਦੀ ਦੌੜ ਵਿੱਚ ਸ਼ਾਮਲ ਹੋਣ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਆਪਣੇ ਇਨ੍ਹਾਂ ਇਰਾਦਿਆਂ ਦੀ ਪੁਸ਼ਟੀ ਹੰਟਰ ਵੱਲੋਂ ਵੀਰਵਾਰ ਨੂੰ ਕੀਤੀ ਗਈ।
ਸਕਾਰਬਰੋ-ਗਿੱਲਵੁੱਡ ਤੋਂ ਲਿਬਰਲ ਐਮਪੀਪੀ ਨੇ ਆਖਿਆ ਕਿ ਉਨ੍ਹਾਂ ਵਰਗੀ ਚੈਂਪੀਅਨ ਦੀ ਇਸ ਸਮੇਂ ਟੋਰਾਂਟੋ ਨੂੰ ਸੱਭ ਤੋਂ ਵੱਧ ਲੋੜ ਹੈ। ਇੱਕ ਬਿਆਨ ਵਿੱਚ ਹੰਟਰ ਨੇ ਆਖਿਆ ਕਿ ਇਹ ਚੋਣਾਂ ਟੋਰਾਂਟੋ ਲਈ ਟਰਨਿੰਗ ਪੁਆਇੰਟ ਹੋਣਗੀਆਂ। ਸਾਡੇ ਕੋਲ ਜਾਂ ਤਾਂ ਅਗਲੇ ਪੱਧਰ ਤੱਕ ਉੱਠਣ ਦਾ ਮੌਕਾ ਹੋਵੇਗਾ ਤੇ ਜਾਂ ਫਿਰ ਅਸੀਂ ਖੱਡ ਵਿੱਚ ਡਿੱਗ ਸਕਦੇ ਹਾਂ। ਅਗਲੇ ਪੱਧਰ ਉੱਤੇ ਜਾਣ ਲਈ ਟੋਰਾਂਟੋ ਵਾਸੀਆਂ ਨੂੰ ਉਨ੍ਹਾਂ ਦੀ ਮਦਦ ਦੀ ਲੋੜ ਹੈ।
ਹੰਟਰ ਦੇ ਪਲੇਟਫਾਰਮ ਅਨੁਸਾਰ ਉਹ ਆਪਣਾ ਸਾਰਾ ਧਿਆਨ ਟੀਟੀਸੀ ਸੇਫਟੀ, ਘਰਾਂ ਦੀ ਉਪਲਬਧਤਾ ਤੇ ਕਿਫਾਇਤੀਪਣ, ਹੋਮਲੈੱਸਨੈੱਸ ਨੂੰ ਖ਼ਤਮ ਕਰਨ, ਲੋਕਲ ਜਮਹੂਰੀਅਤ ਨੂੰ ਮਜ਼ਬੂਤ ਕਰਨ ਵੱਲ ਲਾਉਣਾ ਚਾਹੁੰਦੀ ਹੈ। ਉਨ੍ਹਾਂ ਇਹ ਵੀ ਆਖਿਆ ਕਿ ਜੇ ਉਨ੍ਹਾਂ ਨੂੰ ਟੋਰੀ ਦੀ ਥਾਂ ਟੋਰਾਂਟੋ ਦਾ ਮੇਅਰ ਚੁਣਿਆ ਜਾਂਦਾ ਹੈ ਤਾਂ ਉਹ ਸਟਰਾਂਗ ਮੇਅਰ ਪਾਵਰਜ਼ ਦੀ ਵਰਤੋਂ ਨਹੀਂ ਕਰੇਗੀ।
ਹੰਟਰ ਤੋਂ ਇਲਾਵਾ ਇਸ ਦੌੜ ਵਿੱਚ ਕਾਊਂਸਲਰ ਬ੍ਰੈਡ ਬ੍ਰੈਡਫੋਰਡ, ਕਾਊਂਸਲਰ ਜੋਸ਼ ਮੈਟਲੋਅ, ਸਿਟੀ ਦੀ ਸਾਬਕਾ ਕਾਊਂਸਲਰ ਐਨਾ ਬੇਲਾਓ, ਸਾਬਕਾ ਪੁਲਿਸ ਚੀਫ ਮਾਰਕ ਸਾਂਡਰਸ ਤੇ ਜਿੱਲ ਪੈਨਾਲੋਸਾ ਸ਼ਾਮਲ ਹੋ ਚੁੱਕੇ ਹਨ।