ਓਨਟਾਰੀਓ, 17 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਸਰਕਾਰ ਵੱਲੋਂ ਇੱਕ ਅਜਿਹਾ ਬਿੱਲ ਲਿਆਉਣ ਦੀ ਪੇਸ਼ਕਸ਼ ਕੀਤੀ ਗਈ ਹੈ ਜਿਸ ਤਹਿਤ ਮਿਲਟਰੀ ਰਿਜ਼ਰਵਿਸਟਸ ਨੂੰ ਇਹ ਗਾਰੰਟੀ ਦਿੱਤੀ ਜਾਵੇਗੀ ਕਿ ਉਹ ਆਪਣੀਆਂ ਸ਼ਰੀਰਕ ਜਾਂ ਮਾਨਸਿਕ ਸੱਟਾਂ ਤੋਂ ਠੀਕ ਹੋਣ ਮਗਰੋਂ ਆਪਣੀਆਂ ਸਿਵਲੀਅਨ ਨੌਕਰੀਆਂ ਵਿੱਚ ਪਰਤ ਸਕਣਗੇ।
ਇਸ ਸਬੰਧ ਵਿੱਚ ਲੇਬਰ ਮੰਤਰੀ ਮੌਂਟੀ ਮੈਕਨੌਟਨ ਵੱਲੋਂ ਸੇਵਾਮੁਕਤ ਜਨਰਲ ਰਿੱਕ ਹਿੱਲੀਅਰ ਦੀ ਮੌਜੂਦਗੀ ਵਿੱਚ ਸੁ਼ੱਕਰਵਾਰ ਸਵੇਰੇ ਐਲਾਨ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਇਸ ਐਲਾਨ ਤੋਂ ਪਹਿਲਾਂ ਮੀਡੀਆ ਨਾਲ ਗੱਲ ਕਰਦਿਆਂ ਮੈਕਨੌਟਨ ਨੇ ਆਖਿਆ ਕਿ ਇਹ ਬਿੱਲ ਇੰਪਲੌਇਰਜ਼ ਨੂੰ ਇਹ ਸੁਨੇਹਾ ਦੇਣ ਲਈ ਹੈ ਕਿ ਇਹ ਨੌਕਰੀਆਂ ਮਿਲਟਰੀ ਰਿਜ਼ਰਵਿਸਟਸ ਲਈ ਹੋਣਗੀਆਂ ਜਦੋਂ ਉਹ ਵਿਦੇਸ਼ਾਂ ਵਿੱਚ ਤਾਇਨਾਤ ਹੋਣਗੇ ਜਾਂ ਫਿਰ ਕਿਸੇ ਕੁਦਰਤੀ ਆਫਤ ਦਾ ਸਾਹਮਣਾ ਕਰ ਰਹੇ ਹੋਣਗੇ। ਉਨ੍ਹਾਂ ਆਖਿਆ ਕਿ ਮਿਲਟਰੀ ਵਿੱਚ ਰਹਿ ਕੇ ਦੇਸ਼ ਦੀ ਸੇਵਾ ਨਿਭਾਉਣ ਵਾਲੇ ਇਨ੍ਹਾਂ ਪੁਰਸ਼ਾਂ ਤੇ ਮਹਿਲਾਵਾਂ ਲਈ ਕੁੱਝ ਕਰਨਾ ਸਾਡਾ ਵੀ ਫਰਜ਼ ਬਣਦਾ ਹੈ।
ਮੈਕਨੌਟਨ ਨੇ ਅੱਗੇ ਆਖਿਆ ਕਿ ਉਨ੍ਹਾਂ ਨੂੰ ਇਹ ਐਲਾਨ ਕਰਦਿਆਂ ਖੁਸ਼ੀ ਹੋਵੇਗੀ ਕਿ ਉਹ ਇਸ ਸਬੰਧ ਵਿੱਚ ਨਵਾਂ ਬਿੱਲ ਪੇਸ਼ ਕਰਨ ਜਾ ਰਹੇ ਹਨ। ਅਧਿਕਾਰੀਆਂ ਨੇ ਦੱਸਿਆ ਕਿ ਅਫਗਾਨਿਸਤਾਨ ਵਿੱਚ ਤਾਇਨਾਤ 40,000 ਸੈਨਿਕਾਂ ਵਿੱਚੋਂ ਸੱਤ ਵਿੱਚੋਂ ਇੱਕ ਨੂੰ ਮਾਨਸਿਕ ਸੱਟ ਲੱਗੀ ਤੇ ਇਹ ਸੱਭ ਉਨ੍ਹਾਂ ਦੀ ਤਾਇਨਾਤੀ ਕਾਰਨ ਹੋਇਆ।ਉਨ੍ਹਾਂ ਆਖਿਆ ਕਿ ਇਹ ਯਕੀਨੀ ਬਣਾਉਣਾ ਸਾਡੀ ਡਿਊਟੀ ਹੈ ਕਿ ਅਸੀਂ ਆਪਣੇ ਮਿਲਟਰੀ ਰਿਜ਼ਰਵਿਸਟਸ ਦੀ ਸ਼ਰੀਰਕ ਤੇ ਮਾਨਸਿਕ ਸਿਹਤ ਦੀ ਹਿਫਾਜ਼ਤ ਕਰ ਰਹੇ ਹਾਂ।
ਇਸ ਦੇ ਨਾਲ ਹੀ ਓਨਟਾਰੀਓ ਸਰਕਾਰ ਵੱਲੋਂ ਅਜਿਹੇ ਰੈਗੂਲੇਸ਼ਨਜ਼ ਦਾ ਪ੍ਰਸਤਾਵ ਵੀ ਰੱਖਿਆ ਜਾਵੇਗਾ ਜਿਸ ਤਹਿਤ ਮਿਲਟਰੀ ਰਿਜ਼ਰਵਿਸਟਸ ਨੂੰ ਘਰੇਲੂ ਐਮਰਜੰਸੀ ਜਿਵੇਂ ਕਿ ਸਰਚ ਤੇ ਰੈਸਕਿਊ ਆਪਰੇਸ਼ਨਜ਼ ਤੇ ਹੜ੍ਹ ਜਾਂ ਬਰਫੀਲੇ ਤੂਫਾਨ ਆਦਿ ਵਰਗੀਆਂ ਕੁਦਰਤੀ ਆਫਤਾਂ ਲਈ ਕੰਮ ਕਰਨ ਦਾ ਮੌਕਾ ਵੀ ਮਿਲੇਗਾ। ਇਨ੍ਹਾਂ ਕੰਮਾਂ ਵਿੱਚ ਹਿੱਸਾ ਲੈਣ ਲਈ ਰਿਜ਼ਰਵਿਸਟਸ ਨੂੰ ਆਪਣੇ ਮਹੀਨਿਆਂ ਲੰਮੇਂ ਇੰਪਲੌਇਮੈਂਟ ਪ੍ਰੋਬੇਸ਼ਨਰੀ ਪੀਰੀਅਡ ਦੇ ਖ਼ਤਮ ਹੋਣ ਤੱਕ ਦਾ ਇੰਤਜ਼ਾਰ ਨਹੀਂ ਕਰਨਾ ਹੋਵੇਗਾ। ਮੈਕਨੌਟਨ ਨੇ ਆਖਿਆ ਕਿ ਇਸ ਨਾਲ ਜੇ ਕੈਨੇਡਾ ਵਿੱਚ ਇਨ੍ਹਾਂ ਰਿਜ਼ਰਵਿਸਟਸ ਦੀ ਲੋੜ ਪੈਂਦੀ ਹੈ ਤਾਂ ਉਨ੍ਹਾਂ ਨੂੰ ਨੌਕਰੀ ਸਬੰਧੀ ਫੌਰੀ ਪ੍ਰੋਟੈਕਸ਼ਨ ਮਿਲੇਗੀ।