ਟੋਰਾਂਟੋ, 7 ਮਾਰਚ (ਪੋਸਟ ਬਿਊਰੋ) : ਸਪੈਸ਼ਲ ਕੋਵਿਡ-19 ਫੰਡਿੰਗ ਖ਼ਤਮ ਹੋਣ ਦੀ ਤਰੀਕ ਨੇੜੇ ਆਉਣ ਨਾਲ ਟੋਰਾਂਟੋ ਡਿਸਟ੍ਰਿਕਟ ਸਕੂਲ ਬੋਰਡ (ਟੀਡੀਐਸਬੀ) ਵੱਲੋਂ ਸਟਾਫ ਵਿੱਚ ਕਟੌਤੀ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਇਸ ਫੈਸਲੇ ਉੱਤੇ ਸਿੱਖਿਆ ਮਾਹਿਰਾਂ ਵੱਲੋਂ ਸਖ਼ਤ ਇਤਰਾਜ਼ ਪ੍ਰਗਟਾਇਆ ਜਾ ਰਿਹਾ ਹੈ।
ਜਿ਼ਕਰਯੋਗ ਹੈ ਕਿ ਸਿੱਖਿਆ ਮੰਤਰਾਲੇ ਵੱਲੋਂ ਪਿਛਲੇ ਦੋ ਸਕੂਲ ਵਰ੍ਹਿਆਂ ਵਿੱਚ ਹਰੇਕ ਵਰ੍ਹੇ ਲਈ ਸਕੂਲ ਬੋਰਡ ਨੂੰ ਕੋਵਿਡ-19 ਲਰਨਿੰਗ ਰਿਕਵਰੀ ਫੰਡ ਰਾਹੀਂ 30 ਮਿਲੀਅਨ ਡਾਲਰ ਤੋਂ ਵੱਧ ਦੇ ਫੰਡ ਮੁਹੱਈਆ ਕਰਵਾਏ ਗਏ ਸਨ। ਇਸ ਨਾਲ ਬੋਰਡ ਨੂੰ 485 ਸਕੂਲ ਆਧਾਰਤ ਸਟਾਫ ਪੁਜ਼ੀਸ਼ਨਜ਼ ਕਾਇਮ ਕਰਨ ਦੀ ਖੁੱਲ੍ਹ ਮਿਲੀ। ਪਰ ਹੁਣ ਇਹ ਫੰਡਿੰਗ ਅਗਸਤ ਵਿੱਚ ਖ਼ਤਮ ਹੋਣ ਜਾ ਰਹੀ ਹੈ। ਸੋਮਵਾਰ ਨੂੰ ਬੋਰਡ ਵੱਲੋਂ ਜਾਰੀ ਕੀਤੀ ਗਈ ਇੱਕ ਰਿਪੋਰਟ ਵਿੱਚ ਆਖਿਆ ਗਿਆ ਕਿ ਵਾਧੂ ਫੰਡਿੰਗ ਤੋਂ ਬਿਨਾਂ ਟੀਡੀਐਸਬੀ ਨੂੰ ਅਗਲੇ ਸਾਲ ਇਸ ਦੌਰਾਨ ਰੱਖੇ ਗਏ ਸਟਾਫ ਨੂੰ ਹਟਾਉਣਾ ਪਵੇ।
ਇਸ ਦੌਰਾਨ ਓਨਟਾਰੀਓ ਐਜੂਕੇਸ਼ਨ ਵਰਕਰਜ਼ ਯੂਨਾਈਟਿਡ ਦਾ ਕਹਿਣਾ ਹੈ ਕਿ ਸਟਾਫ ਨੂੰ ਘਟਾਉਣ ਦੀ ਗੱਲ ਉਸ ਸਮੇਂ ਕੀਤੀ ਜਾ ਰਹੀ ਹੈ ਜਦੋਂ ਵਿਦਿਆਰਥੀਆਂ ਨੂੰ ਸਕੂਲਾਂ ਵਿੱਚ ਹੋਰ ਮਦਦ ਦੀ ਲੋੜ ਹੈ।ਜੇ ਰਿਪੋਰਟ ਵਿੱਚ ਦੱਸੀਆਂ ਗਈਆਂ ਇਨ੍ਹਾਂ ਤਬਦੀਲੀਆਂ ਨੂੰ ਸਵੀਕਾਰ ਲਿਆ ਜਾਂਦਾ ਹੈ ਤਾਂ ਅਗਲੇ ਸਾਲ ਸੈਕੰਡਰੀ ਸਕੂਲ ਗਾਇਡੈਂਸ ਸਟਾਫ, ਸਪੈਸ਼ਲ ਐਜੂਕੇਸ਼ਨ ਸਪੋਰਟ ਸਟਾਫ, ਸਕੂਲ ਬੇਸਡ ਸੇਫਟੀ ਮੌਨੀਟਰਜ਼ ਤੇ ਚਾਈਲਡ ਐਂਡ ਯੂਥ ਵਰਕਰਜ਼ ਦੀ ਛਾਂਗੀ ਕੀਤੀ ਜਾ ਸਕਦੀ ਹੈ।