-ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ ਨੇ ਲਈ ਹਮਲੇ ਦੀ ਜ਼ਿੰਮੇਵਾਰੀ
ਪੇਸ਼ਾਵਰ, 30 ਜਨਵਰੀ (ਪੋਸਟ ਬਿਊਰੋ) - ਪਾਕਿਸਤਾਨ ਦੀ ਮਸਜਿਦ ਵਿਚ ਹੋਏ ਫਿਦਾਇਨ ਹਮਲੇ ਦੀ ਜ਼ਿੰਮੇਵਾਰੀ ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ (ਟੀਟੀਪੀ) ਨੇ ਲਈ ਹੈ। ਇਸ ਹਮਲੇ ਵਿਚ ਹੁਣ ਤੱਕ 61 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਜਦਕਿ 150 ਤੋਂ ਵੱਧ ਲੋਕ ਜਖਮੀ ਹਨ। ਇਸ ਹਮਲੇ ਦੇ ਵੇਰਵੇ ਭਿਆਨਕ ਹਨ। ਸੋਮਵਾਰ ਨੂੰ ਦੁਪਹਿਰ ਕਰੀਬ 1.40 ਵਜੇ ਪੇਸ਼ਾਵਰ ਦੇ ਇਕ ਬੇਹੱਦ ਸੁਰੱਖਿਅਤ ਇਲਾਕੇ ਵਿਚ ਇਕ ਮਸਜਿਦ ਲੋਕਾਂ ਨਾਲ ਖਚਾਖਚ ਭਰੀ ਹੋਈ ਸੀ। ਦੁਪਹਿਰ ਦੀ ਨਮਾਜ ਜੌਹਰ ਚੱਲ ਰਹੀ ਸੀ।
ਨਮਾਜ਼ੀਆਂ ’ਚ ਸਥਾਨਕ ਲੋਕ ਹੀ ਨਹੀਂ, ਪੁਲਸ, ਫੌਜ, ਬੰਬ ਨਿਰੋਧਕ ਦਸਤੇ ਦੇ ਕਰਮਚਾਰੀ ਵੀ ਸ਼ਾਮਲ ਸਨ। ਲੋਕ ਕਤਾਰਾਂ ਵਿੱਚ ਲੱਗ ਕੇ ਨਮਾਜ ਅਦਾ ਕਰ ਰਹੇ ਸਨ। ਉਦੋਂ ਹੀ ਨਮਾਜ਼ੀਆਂ ਵਿਚੋਂ ਪਹਿਲੀ ਕਤਾਰ ਵਿਚ ਬੈਠੇ ਇੱਕ ਵਿਅਕਤੀ ਨੇ ਇਕ ਵੱਡਾ ਧਮਾਕਾ ਕਰ ਦਿੱਤਾ। ਇਹ ਵਿਅਕਤੀ ਫਿਦਾਇਨ ਹਮਲਾਵਰ ਸੀ, ਜਿਸ ਦੇ ਧਮਾਕੇ ਨਾਲ ਟੁਕੜੇ-ਟੁਕੜੇ ਹੋ ਗਏ।
ਹਮਲਾਵਰ ਪੁਲਸ ਮੁਲਾਜਮਾਂ ਅਤੇ ਸੁਰੱਖਿਆ ਅਧਿਕਾਰੀਆਂ ਨੂੰ ਨਿਸ਼ਾਨਾ ਬਣਾਉਣਾ ਚਾਹੁੰਦੇ ਸਨ। ਮਰਨ ਵਾਲਿਆਂ ’ਚ ਜ਼ਿਆਦਾਤਰ ਪੁਲਸ ਕਰਮਚਾਰੀ ਅਤੇ ਸੁਰੱਖਿਆ ਕਰਮਚਾਰੀ ਸਾਮਲ ਹਨ। ਪਾਕਿਸਤਾਨੀ ਫੌਜ ਵਲੋਂ ਮਾਰੇ ਗਏ ਟੀ.ਟੀ.ਪੀ. ਕਮਾਂਡਰ ਉਮਰ ਖਾਲਿਦ ਖੁਰਾਸਾਨੀ ਦੇ ਭਰਾ ਨੇ ਦਾਅਵਾ ਕੀਤਾ ਹੈ ਕਿ ਇਹ ਹਮਲਾ ਉਸ ਦੇ ਭਰਾ ਦੀ ਹੱਤਿਆ ਦਾ ਬਦਲਾ ਸੀ। ਉਮਰ ਖਾਲਿਦ ਖੁਰਾਸਾਨੀ ਅਗਸਤ 2022 ਵਿੱਚ ਅਫਗਾਨਿਸਤਾਨ ਵਿੱਚ ਮਾਰਿਆ ਗਿਆ ਸੀ ਜਦੋਂ ਇਕ ਧਮਾਕੇ ਵਿਚ ਉਸਦੀ ਕਾਰ ਨੂੰ ਨਿਸ਼ਾਨਾ ਬਣਾਇਆ ਗਿਆ ਸੀ। ਇਸ ਵਿਚ ਖੁਰਾਸਾਨੀ ਸਮੇਤ 3 ਲੋਕ ਮਾਰੇ ਗਏ ਸਨ।