ਕੈਲੇਫੋਰਨੀਆ, 24 ਜਨਵਰੀ (ਪੋਸਟ ਬਿਊਰੋ) : ਉੱਤਰੀ ਕੈਲੇਫੋਰਨੀਆ ਕਮਿਊਨਿਟੀ ਵਿੱਚ ਇੱਕ ਫਾਰਮ ਤੇ ਉਸ ਤੋ ਕਾਫੀ ਦੂਰੀ ਉੱਤੇ ਵਾਪਰੇ ਸੂਟਿੰਗ ਦੇ ਦੋ ਮਾਮਲਿਆਂ ਵਿੱਚ ਸੱਤ ਵਿਅਕਤੀ ਮਾਰੇ ਗਏ। ਅੱਠ ਦਿਨਾਂ ਵਿੱਚ ਸਮੂਹਕ ਕਤਲੇਆਮ ਦਾ ਇਹ ਤੀਜਾ ਮਾਮਲਾ ਹੈ।
ਸੋਮਵਾਰ ਨੂੰ ਵਾਪਰੀ ਇਸ ਘਟਨਾ ਦੇ ਸਬੰਧ ਵਿੱਚ ਪੁਲਿਸ ਅਧਿਕਾਰੀਆਂ ਵੱਲੋਂ ਇੱਕ ਮਸ਼ਕੂਕ, 67 ਸਾਲਾ ਚੁਨਲੀ ਜ਼ਾਓ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਸੈਨ ਮੈਟੀਓ ਕਾਊਂਟੀ ਸ਼ੈਰਿਫ ਕ੍ਰਿਸਟੀਨਾ ਕੌਰਪਸ ਨੇ ਦੱਸਿਆ ਕਿ ਜ਼ਾਓ ਪੁਲਿਸ ਨੂੰ ਸ਼ੈਰਿਫ ਸਬਸਟੇਸ਼ਨ ਦੇ ਪਾਰਕਿੰਗ ਲੌਟ ਵਿੱਚ ਇੱਕ ਕਾਰ ਵਿੱਚ ਬੈਠਿਆ ਮਿਲਿਆ।ਸ਼ੈਰਿਫ ਆਫਿਸ ਨੇ ਦੱਸਿਆ ਕਿ ਇੱਕ ਫਾਰਮ ਉੱਤੇ ਚਾਰ ਵਿਅਕਤੀ ਗੋਲੀਆਂ ਲੱਗਣ ਕਾਰਨ ਮ੍ਰਿਤਕ ਮਿਲੇ ਤੇ ਇੱਕ ਹੋਰ ਜ਼ਖ਼ਮੀ ਹਾਲਤ ਵਿੱਚ ਮਿਲਿਆ। ਇਸ ਤੋਂ ਇਲਾਵਾ ਪੁਲਿਸ ਨੂੰ ਕਈ ਮੀਲ ਦੀ ਦੂਰੀ ਉੱਤੇ ਇੱਕ ਵੱਖਰੀ ਲੋਕੇਸ਼ਨ ਉੱਤੇ ਤਿੰਨ ਹੋਰ ਲੋਕ ਮ੍ਰਿਤਕ ਪਏ ਮਿਲੇ।
ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਜ਼ਾਓ ਇਨ੍ਹਾਂ ਵਿੱਚੋਂ ਇੱਕ ਫੈਸਿਲਿਟੀ ਉੱਤੇ ਵਰਕਰ ਵਜੋਂ ਕੰਮ ਕਰਦਾ ਸੀ ਤੇ ਮਾਰੇ ਗਏ ਲੋਕ ਵੀ ਵਰਕਰ ਹੀ ਸਨ। ਕੌਰਪਸ ਨੇ ਆਖਿਆ ਕਿ ਪੁਲਿਸ ਅਧਿਕਾਰੀਆਂ ਨੂੰ ਸ਼ੂਟਿੰਗ ਦਾ ਮੰਤਵ ਅਜੇ ਨਹੀਂ ਮਿਲਿਆ ਹੈ। ਨਵੇਂ ਸਾਲ ਤੋਂ ਬਾਅਦ ਅਮਰੀਕਾ ਵਿੱਚ ਸਮੂਹਕ ਕਤਲਾਂ ਦਾ ਅਜਿਹਾ ਸਿਲਸਿਲਾ ਸੁ਼ਰੂ ਹੋਇਆ ਹੈ ਜਿਹੜਾ ਰੁਕਣ ਦਾ ਨਾਂ ਹੀ ਨਹੀਂ ਲੈ ਰਿਹਾ।16 ਜਨਵਰੀ ਤੋਂ ਲੈ ਕੇ ਹੁਣ ਤੱਕ ਸਮੂਹਕ ਕਤਲੇਆਮ ਦੀਆਂ ਤਿੰਨ ਵਾਰਦਾਤਾਂ ਵਾਪਰ ਚੁੱਕੀਆਂ ਹਨ। ਇਸ ਕਾਰਨ ਹੁਣ ਤੱਕ 39 ਲੋਕ ਮਾਰੇ ਜਾ ਚੁੱਕੇ ਹਨ। ਕੌਰਪਸ ਨੇ ਆਖਿਆ ਕਿ ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋਇਆ ਹੈ ਕਿ ਇਹ ਦੋਵੇਂ ਲੋਕੇਸ਼ਨ ਆਪਸ ਵਿੱਚ ਇੱਕ ਦੂਜੇ ਨਾਲ ਕਿਵੇਂ ਜੁੜੀਆਂ ਹੋਈਆਂ ਹਨ।