ਸਕਾਰਬਰੋ, 23 ਜਨਵਰੀ (ਪੋਸਟ ਬਿਊਰੋ) : ਸਕਾਰਬਰੋ ਵਿੱਚ ਕੈਨੇਡੀ ਸਟੇਸ਼ਨ ਨੇੜੇ ਇੱਕ ਬੱਸ ਵਿੱਚ ਦੋ ਵਰਦੀਧਾਰੀ ਟੀਟੀਸੀ ਮੁਲਾਜ਼ਮਾਂ ਉੱਤੇ ਹਮਲਾ ਕਰਨ ਵਾਲੇ ਘੱਟੋ ਘੱਟ 15 ਟੀਨੇਜ ਲੜਕਿਆਂ ਦੀ ਟੋਰਾਂਟੋ ਪੁਲਿਸ ਵੱਲੋਂ ਭਾਲ ਕੀਤੀ ਜਾ ਰਹੀ ਹੈ।
ਕੈਨੇਡੀ ਰੋਡ ਤੇ ਮੈਰੀਅਨ ਰੋਡ ਏਰੀਆ ਵਿੱਚ ਦੁਪਹਿਰੇ 3:30 ਵਜੇ ਤੋਂ ਬਾਅਦ ਪੁਲਿਸ ਅਧਿਕਾਰੀਆਂ ਨੂੰ ਇਸ ਹਮਲੇ ਦੀਆਂ ਖਬਰਾਂ ਮਿਲੀਆਂ। ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ 10 ਤੋਂ 15 ਟੀਨੇਜ ਲੜਕਿਆਂ ਨੇ ਟੀਟੀਸੀ ਬੱਸ ਉੱਤੇ ਸਵਾਰ ਦੋ ਮੁਲਾਜ਼ਮਾਂ ਉੱਤੇ ਹਮਲਾ ਕੀਤਾ ਤੇ ਉੱਥੋਂ ਫਰਾਰ ਹੋ ਗਏ।ਪੁਲਿਸ ਨੇ ਇਸ ਗੱਲ ਦੀ ਵੀ ਪੁਸ਼ਟੀ ਕੀਤੀ ਕਿ ਇਨ੍ਹਾਂ ਮੁਲਾਜ਼ਮਾਂ ਨੂੰ ਬਹੁਤੀਆਂ ਸੱਟਾਂ ਨਹੀਂ ਲੱਗੀਆਂ। ਟੀਨੇਜ ਲੜਕਿਆਂ ਦੀ ਸਹੀ ਉਮਰ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ।
ਟੀਟੀਸੀ ਦੇ ਬੁਲਾਰੇ ਨੇ ਦੱਸਿਆ ਕਿ ਪੁਲਿਸ ਵੱਲੋਂ ਕੀਤੀ ਜਾ ਰਹੀ ਇਸ ਮਾਮਲੇ ਦੀ ਜਾਂਚ ਵਿੱਚ ਆਰਗੇਨਾਈਜ਼ੇਸ਼ਨ ਪੂਰਾ ਸਹਿਯੋਗ ਦੇ ਰਹੀ ਹੈ। ਟਰਾਂਜਿ਼ਟ ਮੁਲਾਜ਼ਮਾਂ ਉੱਤੇ ਇਸ ਤਰ੍ਹਾਂ ਦੇ ਹਮਲੇ ਨੂੰ ਕ੍ਰਿਮੀਨਲ ਕੋਡ ਦੇ ਵਿਸ਼ੇਸ਼ ਪ੍ਰਬੰਧ ਤਹਿਤ ਰੱਖਿਆ ਜਾਂਦਾ ਹੈ।ਐਮਲਗਾਮੇਟਿਡ ਟਰਾਂਜਿ਼ਟ ਯੂਨੀਅਨ (ਏਟੀਯੂ) ਲੋਕਲ 113, ਜੋ ਕਿ ਲੱਗਭਗ 12000 ਟਰਾਂਜਿ਼ਟ ਵਰਕਰਾਂ ਦੀ ਨੁਮਾਇੰਦਗੀ ਕਰਦੀ ਹੈ, ਵੱਲੋਂ ਵੀ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਹਮਲਾ ਕਰਨ ਵਾਲਿਆਂ ਵਿੱਚ ਟੀਨੇਜਰ ਲੜਕੇ ਹੀ ਸ਼ਾਮਲ ਸਨ।