ਬੀਜਿੰਗ, 7 ਦਸੰਬਰ (ਪੋਸਟ ਬਿਊਰੋ)- ਚੀਨ ਨੇ ਬੁੱਧਵਾਰ ਨੂੰ ਵਿਆਪਕ ਵਿਰੋਧ ਤੋਂ ਬਾਅਦ ਕੋਵਿਡ-19 ਨਾਲ ਜੁੜੀਆਂ ਵੱਡੀਆਂ ਪਾਬੰਦੀਆਂ ਵਾਪਸ ਲੈ ਲਈਆਂ ਹਨ। ਇਸ ਨੂੰ ਭਿਆਨਕ ‘ਜੀਰੋ ਕੋਵਿਡ’ ਨੀਤੀ ਨੂੰ ਖਤਮ ਕਰਨ ਵੱਲ ਇਕ ਕਦਮ ਵਜੋਂ ਦੇਖਿਆ ਜਾ ਰਿਹਾ ਹੈ, ਜਿਸ ਨੇ ਦੇਸ ਭਰ ਵਿਚ ਆਰਥਿਕਤਾ ਅਤੇ ਲੋਕਾਂ ਦੀ ਆਵਾਜਾਈ ਦੀ ਰਫ਼ਤਾਰ ਹੌਲੀ ਕਰ ਦਿੱਤੀ ਸੀ। ਬਦਲਦੀ ਸਥਿਤੀ ਅਤੇ ਕੋਰੋਨਾ ਵਾਇਰਸ ਦੇ ਓਮੀਕਰੋਨ ਵੇਰੀਐਂਟ ਦੇ ਕਮਜੋਰ ਹੋਣ ਦੇ ਮੱਦੇਨਜਰ, ਸਟੇਟ ਕੌਂਸਲ, ਚੀਨ ਦੀ ਕੈਬਨਿਟ ਨੇ ਕੋਵਿਡ -19 ਨੂੰ ਲੈ ਕੇ ਨਵੇਂ ਉਪਾਵਾਂ ਦਾ ਐਲਾਨ ਕੀਤਾ ਹੈ। ਇਹ ਜਾਣਕਾਰੀ ਇੱਕ ਅਧਿਕਾਰਤ ਘੋਸ਼ਣਾ ਵਿੱਚ ਦਿੱਤੀ ਗਈ।
ਨਵੇਂ ਉਪਾਵਾਂ ਦੇ ਤਹਿਤ, ਤਾਲਾਬੰਦੀ ਪੂਰੇ ਜ਼ਿਲੇ ਅਤੇ ਆਂਢ-ਗੁਆਂਢ ਦੀ ਬਜਾਏ ਸਬੰਧਤ ਅਪਾਰਟਮੈਂਟਾਂ, ਮੰਜ਼ਿਲਾਂ ਅਤੇ ਇਮਾਰਤਾਂ ਤੱਕ ਸੀਮਤ ਕਰ ਦਿੱਤੀ ਗਈ ਹੈ। ਪਾਬੰਦੀਆਂ ਵਿਚ ਅਚਾਨਕ ਢਿੱਲ ਦਿੱਤੇ ਜਾਣ ਕਾਰਣ ਇਹ ਚਿੰਤਾ ਵਧ ਗਈ ਹੈ, ਹਰ ਰੋਜ਼ ਸਾਹਮਣੇ ਆ ਰਹੇ ਕੋਰੋਨਾ ਇਨਫੈਕਸ਼ਨ ਦੇ ਨਵੇਂ ਮਾਮਲਿਆਂ ਦੀ ਗਿਣਤੀ ਵਿਚ ਤੇਜ਼ੀ ਨਾਲ ਵਾਧਾ ਹੋ ਸਕਦਾ ਹੈ। ਇਸ ਸਮੇਂ ਕੋਵਿਡ-19 ਦੇ ਹਰ ਰੋਜ 30 ਹਜਾਰ ਨਵੇਂ ਮਾਮਲੇ ਸਾਹਮਣੇ ਆ ਰਹੇ ਹਨ। ਫਿਲਹਾਲ ਚੀਨ ਵਿਚ ਠੰਡ ਪੈ ਰਹੀ ਹੈ ਅਤੇ ਪਾਰਾ ਜੀਰੋ ਤੋਂ ਹੇਠਾਂ ਹੈ।
ਨਵੇਂ ਨਿਯਮਾਂ ਦੇ ਤਹਿਤ, ਕੋਰੋਨਾ ਵਾਇਰਸ ਨਾਲ ਸੰਕਰਮਿਤ ਪਾਏ ਗਏ ਲੋਕ ਹਸਪਤਾਲਾਂ ਵਿਚ ਦਾਖਲ ਹੋਣ ਦੀ ਬਜਾਏ ਘਰ ਵਿਚ ਇਕੱਲਤਾ ਵਿਚ ਰਹਿ ਸਕਣਗੇ। ਇਸ ਤੋਂ ਇਲਾਵਾ ਉਨ੍ਹਾਂ ਸਕੂਲਾਂ ਵਿਚ ਆਫਲਾਈਨ ਕਲਾਸਾਂ ਸੁਰੂ ਕੀਤੀਆਂ ਜਾ ਸਕਦੀਆਂ ਹਨ ਜਿੱਥੇ ਇਨਫੈਕਸ਼ਨ ਦਾ ਕੋਈ ਕੇਸ ਨਹੀਂ ਪਾਇਆ ਗਿਆ ਹੈ। ਇਸੇ ਤਰ੍ਹਾਂ ਬਾਹਰੋਂ ਯਾਤਰਾ ਕਰਕੇ ਜਾਂਚ ਦਾ ਨਿਯਮ ਵੀ ਹਟਾ ਦਿੱਤਾ ਗਿਆ ਹੈ।
ਇਸ ਤੋਂ ਇਲਾਵਾ ਨਰਸਿੰਗ ਹੋਮ, ਸਕੂਲਾਂ ਸਮੇਤ ਕੁਝ ਨਿਰਧਾਰਤ ਸਥਾਨਾਂ ਤੋਂ ਇਲਾਵਾ ਹੋਰ ਥਾਵਾਂ ’ਤੇ ਨੈਗੇਟਿਵ ਨਿਊਕਲੀਕ ਐਸਿਡ ਟੈਸਟ ਦਾ ਨਤੀਜਾ ਦਿਖਾਉਣ ਦੀ ਲੋੜ ਨਹੀਂ ਹੋਵੇਗੀ। ਇਹ ਰਿਆਇਤਾਂ ਸਖਤ ‘ਜੀਰੋ ਕੋਵਿਡ‘ ਨੀਤੀ ਨੂੰ ਲੈ ਕੇ ਚੀਨ ਦੇ ਵੱਖ-ਵੱਖ ਸ਼ਹਿਰਾਂ ਵਿਚ ਹੋਏ ਪ੍ਰਦਰਸਨਾਂ ਦੇ ਮੱਦੇਨਜ਼ਰ ਦਿੱਤੀਆਂ ਗਈਆਂ ਹਨ। ਪ੍ਰਦਰਸ਼ਨਕਾਰੀਆਂ ਦਾ ਕਹਿਣਾ ਹੈ ਕਿ ਦੇਸ ਵਿਚ ਤਿੰਨ ਸਾਲਾਂ ਤੋਂ ਲਾਗੂ ਇਨ੍ਹਾਂ ਪਾਬੰਦੀਆਂ ਕਾਰਨ ਜਿੱਥੇ ਆਮ ਜਨਜੀਵਨ, ਯਾਤਰਾ ਅਤੇ ਰੁਜਗਾਰ ਪ੍ਰਭਾਵਿਤ ਹੋਇਆ ਹੈ, ਉੱਥੇ ਹੀ ਆਰਥਿਕਤਾ ਵੀ ਪ੍ਰਭਾਵਿਤ ਹੋਈ ਹੈ।