ਕਾਠਮੰਡੂ, 23 ਨਵੰਬਰ (ਪੋਸਟ ਬਿਊਰੋ)- ਪ੍ਰਧਾਨ ਮੰਤਰੀ ਸ਼ੇਰ ਬਹਾਦੁਰ ਦੇਉਬਾ ਨੇ ਪੱਛਮੀ ਨੇਪਾਲ ਦੇ ਦਡੇਲਧੁਰਾ ਹਲਕੇ ਤੋਂ ਲਗਾਤਾਰ ਸੱਤਵੀਂ ਵਾਰ ਵੋਟਾਂ ਦੇ ਵੱਡੇ ਫਰਕ ਨਾਲ ਜਿੱਤ ਦਰਜ ਕੀਤੀ ਹੈ। ਦੇਊਬਾ (77) ਨੂੰ 25,534 ਵੋਟਾਂ ਮਿਲੀਆਂ, ਜਦੋਂ ਕਿ ਉਨ੍ਹਾਂ ਦੇ ਨੇੜਲੇ ਵਿਰੋਧੀ ਅਤੇ ਆਜ਼ਾਦ ਉਮੀਦਵਾਰ ਸਾਗਰ ਧਾਕਲ (31) ਨੂੰ 1,302 ਵੋਟਾਂ ਮਿਲੀਆਂ। ਦੇਊਬਾ ਨੇ ਆਪਣੇ ਪੰਜ ਦਹਾਕਿਆਂ ਦੇ ਸਿਆਸੀ ਕਰੀਅਰ ਵਿੱਚ ਕਦੇ ਕੋਈ ਸੰਸਦੀ ਚੋਣ ਨਹੀਂ ਹਾਰੀ। ਧਾਕਲ ਇੱਕ ਨੌਜਵਾਨ ਇੰਜੀਨੀਅਰ ਹੈ ਜਿਸਦੀ ਪੰਜ ਸਾਲ ਪਹਿਲਾਂ ਬੀਬੀਸੀ (ਬ੍ਰਿਿਟਸ਼ ਬ੍ਰੌਡਕਾਸਟਿੰਗ ਕਾਰਪੋਰੇਸ਼ਨ) ਦੇ 'ਸਾਂਝਾ ਸਵਾਲ' ਪ੍ਰੋਗਰਾਮ 'ਤੇ ਇੱਕ ਜਨਤਕ ਚਰਚਾ ਦੌਰਾਨ ਦੇਉਬਾ ਨਾਲ ਜ਼ੁਬਾਨੀ ਝਗੜਾ ਹੋਇਆ ਸੀ।
ਇਸ ਤੋਂ ਬਾਅਦ ਉਨ੍ਹਾਂ ਨੇ ਦੇਊਬਾ ਨੂੰ ਚੁਣੌਤੀ ਦੇਣ ਦਾ ਫੈਸਲਾ ਕਰਦੇ ਹੋਏ ਕਿਹਾ ਕਿ ਹੁਣ ਨੌਜਵਾਨਾਂ ਨੂੰ ਰਾਜਨੀਤੀ ਵਿੱਚ ਆਉਣਾ ਚਾਹੀਦਾ ਹੈ ਅਤੇ ਦੇਉਬਾ ਵਰਗੇ ਸੀਨੀਅਰ ਲੋਕਾਂ ਨੂੰ ਆਰਾਮ ਕਰਨਾ ਚਾਹੀਦਾ ਹੈ। ਨੇਪਾਲੀ ਕਾਂਗਰਸ ਦੇ ਪ੍ਰਧਾਨ ਦੇਉਬਾ ਇਸ ਸਮੇਂ ਪੰਜਵੀਂ ਵਾਰ ਪ੍ਰਧਾਨ ਮੰਤਰੀ ਦਾ ਅਹੁਦਾ ਸੰਭਾਲ ਰਹੇ ਹਨ। ਸੱਤਾਧਾਰੀ ਨੇਪਾਲੀ ਕਾਂਗਰਸ ਨੇ ਹੁਣ ਤੱਕ ਪ੍ਰਤੀਨਿਧ ਸਦਨ ਦੀਆਂ 10 ਸੀਟਾਂ ਜਿੱਤੀਆਂ ਹਨ, ਜਦਕਿ ਉਹ 46 ਹੋਰ ਸੀਟਾਂ 'ਤੇ ਅੱਗੇ ਚੱਲ ਰਹੀ ਹੈ।
ਨੇਪਾਲ ਵਿੱਚ ਸੰਘੀ ਸੰਸਦ ਦੀਆਂ 275 ਸੀਟਾਂ ਅਤੇ ਸੱਤ ਸੂਬਾਈ ਅਸੈਂਬਲੀਆਂ ਦੀਆਂ 550 ਸੀਟਾਂ ਲਈ ਚੋਣਾਂ ਹੋ ਰਹੀਆਂ ਹਨ। ਫੈਡਰਲ ਪਾਰਲੀਮੈਂਟ ਦੇ ਕੁੱਲ 275 ਮੈਂਬਰਾਂ ਵਿੱਚੋਂ 165 ਦੀ ਚੋਣ ਸਿੱਧੀ ਵੋਟਿੰਗ ਰਾਹੀਂ ਕੀਤੀ ਜਾਵੇਗੀ, ਜਦਕਿ ਬਾਕੀ 110 ਦੀ ਚੋਣ ‘ਅਨੁਪਾਤਕ ਚੋਣ ਪ੍ਰਣਾਲੀ’ ਰਾਹੀਂ ਕੀਤੀ ਜਾਵੇਗੀ। ਇਸੇ ਤਰ੍ਹਾਂ ਸੂਬਾਈ ਅਸੈਂਬਲੀਆਂ ਦੇ ਕੁੱਲ 550 ਮੈਂਬਰਾਂ ਵਿੱਚੋਂ 330 ਸਿੱਧੇ ਤੌਰ 'ਤੇ ਚੁਣੇ ਜਾਣਗੇ, ਜਦਕਿ 220 ਅਨੁਪਾਤਕ ਪ੍ਰਣਾਲੀ ਰਾਹੀਂ ਚੁਣੇ ਜਾਣਗੇ।