ਇੰਡੋਨੇਸ਼ੀਆ, 16 ਨਵੰਬਰ (ਪੋਸਟ ਬਿਊਰੋ) : ਜੀ-20 ਸਿਖਰ ਵਾਰਤਾ ਦੌਰਾਨ ਹੋਈ ਮੁਲਾਕਾਤ ਵਿੱਚ ਚੀਨ ਦੇ ਰਾਸ਼ਟਰਪਤੀ ਜ਼ੀ-ਜਿੰ਼ਨਪਿੰਗ ਨੇ ਉਲਾਂਭਾ ਦਿੰਦਿਆਂ ਟਰੂਡੋ ਉੱਤੇ ਨਿਜੀ ਗੱਲਾਂ ਮੀਡੀਆ ਸਾਹਮਣੇ ਲੀਕ ਕਰਨ ਦਾ ਦੋਸ਼ ਲਗਾਇਆ। ਜ਼ੀ-ਜਿ਼ਨਪਿੰਗ ਨੇ ਟਰੂਡੋ ਉੱਤੇ ਡਿਪਲੋਮੈਟਿਕ ਸਬੰਧਾਂ ਨੂੰ ਖਰਾਬ ਕਰਨ ਦਾ ਦੋਸ਼ ਵੀ ਲਾਇਆ।
ਜੀ-20 ਸਿਖਰ ਵਾਰਤਾ ਦੌਰਾਨ ਇੱਕ ਈਵੈਂਟ ਵਿੱਚ ਬੁੱਧਵਾਰ ਨੂੰ ਦੋਵਾਂ ਆਗੂਆਂ ਵਿਚਾਲੇ ਗੱਲਬਾਤ ਚੱਲ ਰਹੀ ਸੀ ਤੇ ਮੀਡੀਆ ਵੀ ਇਸ ਨਿੱਕੀ ਜਿਹੀ ਮੁਲਾਕਾਤ ਨੂੰ ਕਵਰ ਕਰਨ ਲਈ ਮੌਜੂਦ ਸੀ। ਇਸੇ ਮੌਕੇ ਜ਼ੀ ਨੇ ਆਪਣੇ ਦੁਭਾਸ਼ੀਏ ਜ਼ਰੀਏ ਟਰੂਡੋ ਨੂੰ ਆਖਿਆ ਕਿ ਜਿਹੜੀ ਵੀ ਗੱਲ ਆਪਾਂ ਇੱਕ ਦੂਜੇ ਨਾਲ ਸਾਂਝੀ ਕਰਦੇ ਹਾਂ ਉਹ ਮੀਡੀਆ ਕੋਲ ਪਹੁੰਚ ਜਾਂਦੀ ਹੈ, ਇਹ ਸਹੀ ਨਹੀਂ ਹੈ। ਇਸ ਤਰ੍ਹਾਂ ਗੱਲਬਾਤ ਨਹੀਂ ਹੁੰਦੀ। ਜੇ ਤੁਸੀਂ ਦੋਵਾਂ ਧਿਰਾਂ ਦਰਮਿਆਨ ਗੱਲਬਾਤ ਨੂੰ ਲੈ ਕੇ ਐਨੇ ਸੰਜੀਦਾ ਹੋ ਤਾਂ ਅਜਿਹਾ ਨਹੀਂ ਹੋਣਾ ਚਾਹੀਦਾ।
ਇਸ ਉੱਤੇ ਟਰੂਡੋ ਨੇ ਆਖਿਆ ਕਿ ਅਸੀਂ ਖੁੱਲ੍ਹੀ ਗੱਲਬਾਤ ਦੇ ਹਮਾਇਤੀ ਹਾਂ ਤੇ ਅਸੀਂ ਅੱਗੇ ਵੀ ਇਹੋ ਕਰਨਾ ਜਾਰੀ ਰੱਖਾਂਗੇ। ਅਸੀਂ ਉਸਾਰੂ ਢੰਗ ਨਾਲ ਗੱਲਬਾਤ ਕਰਨੀ ਜਾਰੀ ਰੱਖਣੀ ਚਾਹੁੰਦੇ ਹਾਂ ਪਰ ਕਈ ਗੱਲਾਂ ਅਜਿਹੀਆਂ ਹਨ ਜਿਨ੍ਹਾਂ ਨਾਲ ਅਸੀਂ ਸਹਿਮਤ ਨਹੀਂ ਹੋਵਾਂਗੇ। ਇਸ ਦਾ ਜਵਾਬ ਦਿੰਦਿਆਂ ਜ਼ੀ ਨੇ ਆਖਿਆ ਕਿ ਗੱਲਬਾਤ ਲਈ ਪਹਿਲਾਂ ਆਪਾਂ ਸ਼ਰਤਾਂ ਤੈਅ ਕਰ ਲੈਂਦੇ ਹਾਂ।ਇਸ ਨਿੱਕੀ ਜਿਹੀ ਗੱਲਬਾਤ ਤੋਂ ਬਾਅਦ ਦੋਵਾਂ ਆਗੂਆਂ ਨੇ ਹੱਥ ਮਿਲਾਏ ਤੇ ਵੱਖ ਹੋ ਗਏ।