ਮੋਹਾਲੀ, 03 ਅਕਤੂਬਰ (ਪੋਸਟ ਬਿਊਰੋ) - ਪੰਜਾਬੀ ਗਾਇਕ ਅਲਫਾਜ਼ ਉਰਫ਼ ਅਮਨਜੋਤ ਸਿੰਘ ਪੰਵਾਰ ਨੂੰ ਗੱਡੀ ਨੇ ਟੱਕਰ ਮਾਰ ਦਿੱਤੀ।ਜਿਸ ਤੋਂ ਬਾਅਦ ਉਸ ਨੂੰ ਜ਼ਖਮੀ ਹਾਲਤ 'ਚ ਮੋਹਾਲੀ ਦੇ ਇਕ ਨਿੱਜੀ ਹਸਪਤਾਲ 'ਚ ਲਿਜਾਇਆ ਗਿਆ।ਇਹ ਘਟਨਾ ਸ਼ਨੀਵਾਰ ਦੀ ਹੈ।ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਅਲਫਾਜ਼ ਸਥਾਨਕ ਢਾਬੇ 'ਤੇ ਸੀ।ਐਤਵਾਰ ਰਾਤ ਨੂੰ ਸੋਸ਼ਲ ਮੀਡੀਆ 'ਤੇ ਜਾਣਕਾਰੀ ਦਿੰਦੇ ਹੋਏ ਗਾਇਕ ਹਨੀ ਸਿੰਘ ਨੇ ਲਿਖਿਆ ਕਿ ਅਲਫਾਜ਼ ਖ਼ਤਰੇ ਤੋਂ ਬਾਹਰ ਹੈ।ਖਬਰਾਂ ਮੁਤਾਬਕ 'ਯਾਰ ਬਥੇਰੇ' ਗਾਇਕ ਆਪਣੇ ਤਿੰਨ ਦੋਸਤਾਂ ਨਾਲ ਢਾਬੇ 'ਤੇ ਸੀ, ਜਦੋਂ ਉਸ ਦਾ ਮੁਲਾਜ਼ਮ ਵਿੱਕੀ ਨਾਲ ਝਗੜਾ ਹੋ ਗਿਆ।
ਦਰਅਸਲ ਵਿੱਕੀ ਨੇ ਅਲਫਾਜ਼ ਨੂੰ ਵਿਚੋਲਗੀ ਕਰਨ ਅਤੇ ਢਾਬਾ ਮਾਲਕ ਤੋਂ ਉਸ ਦਾ ਬਕਾਇਆ ਕਲੀਅਰ ਕਰਨ ਦੀ ਬੇਨਤੀ ਕੀਤੀ ਸੀ।ਜਦੋਂ ਗਾਇਕ ਨੇ ਦਖਲ ਦੇਣ ਤੋਂ ਇਨਕਾਰ ਕਰ ਦਿੱਤਾ ਤਾਂ ਵਿੱਕੀ ਨੇ ਮਾਲਕ ਦੇ ਟੈਂਪੂ ਨਾਲ ਭੱਜਣ ਦੀ ਕੋਸਿ਼ਸ਼ ਕੀਤੀ ਅਤੇ ਇਸ ਦੌਰਾਨ ਗਾਇਕ ਨੂੰ ਟੱਕਰ ਮਾਰ ਦਿੱਤੀ।ਗਾਇਕ ਦੇ ਸਿਰ, ਬਾਹਾਂ ਅਤੇ ਲੱਤਾਂ 'ਤੇ ਕਈ ਸੱਟਾਂ ਲੱਗੀਆਂ ਅਤੇ ਉਸ ਦੇ ਦੋਸਤਾਂ ਨੇ ਉਸ ਨੂੰ ਹਸਪਤਾਲ ਲਿਜਾਇਆ।
ਦੂਜੇ ਪਾਸੇ ਮੁਲਜ਼ਮ ਵਿੱਕੀ ਮੌਕੇ ਤੋਂ ਫਰਾਰ ਹੋਣ ਵਿੱਚ ਕਾਮਯਾਬ ਹੋ ਗਿਆ। ਪਰ ਬਾਅਦ ਵਿੱਚ ਮੁਹਾਲੀ ਪੁਲੀਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ।ਬਾਅਦ ਵਿੱਚ ਪੁਲੀਸ ਨੇ ਮੁਲਜ਼ਮ ਖਿ਼ਲਾਫ਼ ਥਾਣਾ ਸੋਹਾਣਾ ਵਿੱਚ ਕੇਸ ਦਰਜ ਕਰ ਲਿਆ।