ਓਨਟਾਰੀਓ, 22 ਸਤੰਬਰ (ਪੋਸਟ ਬਿਊਰੋ) : ਅਗਸਤ ਦੇ ਅਖੀਰ ਵਿੱਚ ਵਸਾਗਾ ਬੀਚ ਉੱਤੇ ਹੋਈ ਕਾਰ ਰੈਲੀ ਤੋਂ ਬਾਅਦ ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਵੱਲੋਂ ਦਰਜਨ ਤੋਂ ਵੀ ਵੱਧ ਵਿਅਕਤੀਆਂ ਨੂੰ ਚਾਰਜ ਕੀਤਾ ਗਿਆ।
ਵੀਰਵਾਰ ਨੂੰ ਟਵਿੱਟਰ ਉੱਤੇ ਪੋਸਟ ਕੀਤੇ ਗਏ ਵੀਡੀਓ ਵਿੱਚ ਓਪੀਪੀ ਸੈਂਟਰਲ ਰੀਜਨ ਦੇ ਸਾਰਜੈਂਟ ਰੌਬਰਟ ਸਿੰਪਸਨ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ 26 ਤੋਂ 28 ਅਗਸਤ ਤੱਕ ਵਸਾਗਾ ਬੀਚ ਉੱਤੇ ਵਾਪਰੀ ਘਟਨਾ ਦੇ ਸਬੰਧ ਵਿੱਚ 20 ਵਿਅਕਤੀਆਂ ਨੂੰ ਚਾਰਜ ਕੀਤਾ ਗਿਆ ਹੈ।ਇਹ ਚਾਰਜ ਖਤਰਨਾਕ ਢੰਗ ਨਾਲ ਕਰਤਬ ਦਿਖਾਉਣ, ਕਾਰ ਰੇਸਿੰਗ, ਸਟੰਟ ਡਰਾਈਵਿੰਗ, ਤੋੜ ਭੰਨ੍ਹ ਤੇ ਹਾਈਵੇਅ ਟਰੈਫਿਕ ਐਕਟ ਦੀ ਉਲੰਘਣਾ ਕਰਨ ਦੇ ਸਬੰਧ ਵਿੱਚ ਲਾਏ ਗਏ ਹਨ।
ਚਾਰਜ ਕੀਤੇ ਗਏ ਵਿਅਕਤੀਆਂ ਵਿੱਚ 17 ਤੋਂ 37 ਸਾਲ ਦੇ ਵਿਅਕਤੀ ਸ਼ਾਮਲ ਹਨ। ਇਨ੍ਹਾਂ ਵਿੱਚੋਂ ਬਹੁਤੇ ਓਨਟਾਰੀਓ, ਜਿਸ ਵਿੱਚ ਸੈਂਟਰਲ ਰੀਜਨ ਤੇ ਗ੍ਰੇਟਰ ਟੋਰਾਂਟੋ ਏਰੀਆ ਵੀ ਸ਼ਾਮਲ ਹੈ, ਭਰ ਵਿੱਚ ਰਹਿਣ ਵਾਲੇ ਹਨ। ਅਜੇ ਵੀ ਇਸ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ ਤੇ ਵਾਧੂ ਚਾਰਜ ਵੀ ਲਾਏ ਜਾਣ ਦੀ ਸੰਭਾਵਨਾ ਹੈ।