ਤੁਰਕੀ, 20 ਸਤੰਬਰ (ਪੋਸਟ ਬਿਊਰੋ)- ਤੁਰਕੀ ਵਿੱਚ ਮਿਸਰ ਦਾ ਇੱਕ ਵੱਡਾ ਕਾਰਗੋ ਜਹਾਜ਼ ਪਲਟ ਗਿਆ।ਇਸ ਕਾਰਨ ਕਈ ਡੱਬੇ ਡੂੰਘੇ ਸਮੁੰਦਰ ਵਿੱਚ ਰੁੜ੍ਹ ਗਏ।ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਇੱਕ ਵੀਡੀਓ ਵਿੱਚ ਦਿਖਾਇਆ ਗਿਆ ਹੈ ਕਿ ਸੀ ਈਗਲ ਨਾਮ ਦਾ ਇੱਕ ਮਾਲਵਾਹਕ ਜਹਾਜ਼ ਪਲਟਣ ਤੋਂ ਬਾਅਦ ਸਮੁੰਦਰ ਵਿੱਚ ਡੁੱਬ ਰਿਹਾ ਹੈ।ਜਹਾਜ਼ਾਂ ਬਾਰੇ ਖਬਰ ਦੇਣ ਵਾਲੀ ਵੈੱਬਸਾਈਟ ਮੁਤਾਬਕ, ਜਹਾਜ਼ ਤੁਰਕੀ ਦੇ ਇਸਕੇਂਡਰਮ ਬੰਦਰਗਾਹ 'ਤੇ ਖੜ੍ਹਾ ਸੀ ਅਤੇ ਇਸ ਤੋਂ ਮਾਲ ਉਤਾਰਿਆ ਜਾ ਰਿਹਾ ਸੀ।ਉਦੋਂ ਇਹ ਹਾਦਸਾ ਵਾਪਰਿਆ।ਇਹ ਹਾਦਸਾ ਸ਼ਨੀਵਾਰ ਨੂੰ ਹੋਇਆ। ਇਹ ਕਾਰਗੋ ਜਹਾਜ਼ 1984 ਵਿਚ ਬਣਾਇਆ ਗਿਆ ਸੀ।
ਤੁਰਕੀ ਦੇ ਟਰਾਂਸਪੋਰਟ ਅਤੇ ਇਨਫਰਾ ਮੰਤਰਾਲੇ ਨੇ ਬਾਅਦ ਵਿੱਚ ਟਵਿੱਟਰ 'ਤੇ ਕਿਹਾ ਕਿ ਟੋਗੋਲੀਜ਼ ਦੇ ਝੰਡੇ ਵਾਲੇ ਜਹਾਜ਼ ਤੋਂ 24 ਕੰਟੇਨਰ ਗੁੰਮ ਹੋ ਗਏ ਸਨ ਅਤੇ ਇੱਕ ਹਲਕੇ ਤੇਲ ਦਾ ਰਿਸਾਅ ਵੀ ਹੋਇਆ ਹੈ। ਖੁਸ਼ਕਿਸਮਤੀ ਨਾਲ ਚਾਲਕ ਦਲ ਦੇ ਸਾਰੇ ਮੈਂਬਰ ਸੁਰੱਖਿਅਤ ਬਾਹਰ ਨਿਕਲਣ ਵਿੱਚ ਕਾਮਯਾਬ ਰਹੇ ਅਤੇ ਕਿਸੇ ਨੂੰ ਸੱਟ ਨਹੀਂ ਲੱਗੀ।ਤੁਰਕੀ ਦੇ ਬੰਦਰਗਾਹ ਅਧਿਕਾਰੀ ਘਟਨਾ ਦੀ ਜਾਂਚ ਕਰ ਰਹੇ ਹਨ। ਇਸ ਦੌਰਾਨ ਜਹਾਜ਼ ਦਾ ਈਂਧਨ ਕੱਢਣ ਅਤੇ ਕੰਟੇਨਰ ਦਾ ਪਤਾ ਲਗਾਉਣ ਦਾ ਕੰਮ ਚੱਲ ਰਿਹਾ ਹੈ।