ਨਵੀਂ ਦਿੱਲੀ, 18 ਅਗਸਤ (ਪੋਸਟ ਬਿਊਰੋ)- ਕੋਰੋਨਾ ਟੀਕੇ ਬਾਰੇ ਪਿੱਛੇ ਜਿਹੇ ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡੇਨ ਬਾਰੇ ਯੋਗਗੁਰੂ ਬਾਬਾ ਰਾਮਦੇਵ ਦੇ ਬਿਆਨ ਉੱਤੇ ਹਾਈ ਕੋਰਟ ਨੇ ਚਿੰਤਾ ਪ੍ਰਗਟਾਈ ਹੈ।
ਜਸਟਿਸ ਏ ਜੇ ਭੰਬਾਨੀ ਦੇ ਬੈਂਚ ਨੇ ਕਿਹਾ ਕਿ ਇਹ ਬਿਆਨ ਹੋਰ ਦੇਸ਼ਾਂ ਨਾਲ ਰਿਸ਼ਤਿਆਂ ਨੂੰ ਪ੍ਰਭਾਵਤ ਕਰਨ ਤੋਂ ਇਲਾਵਾ ਆਯੁਰਵੈਦ ਦੇ ਮਾਣ-ਸਨਮਾਨ ਨੂੰ ਵੀ ਖਰਾਬ ਕਰ ਸਕਦੇ ਹਨ। ਆਯੁਰਵੈਦ ਦਾ ਸਨਮਾਨ ਬਣਾਈ ਰੱਖੋ, ਪਰ ਐਲੋਪੈਥੀ ਖਿਲਾਫ ਬਿਆਨ ਦੇ ਕੇ ਜਨਤਾ ਨੂੰ ਗੁੰਮਰਾਹ ਨਾ ਕਰੋ।
ਵੱਖ-ਵੱਖ ਮੈਡੀਕਲ ਸੰਸਥਾਵਾਂ ਵੱਲੋਂ ਦਾਇਰ ਕੇਸ ਉੱਤੇਕੱਲ੍ਹ ਹਾਈ ਕੋਰਟ ਨੇ ਸੁਣਵਾਈ ਮੌਕੇ ਬੈਂਚ ਨੇ ਕਿਹਾ ਕਿ ਰਾਮਦੇਵ ਪਤੰਜਲੀ ਦੇ ਉਤਪਾਦ ਕੋਰੋਨਿਲ ਦੇ ਹੱਕ ਵਿੱਚ ਹੱਕ ਤੋਂ ਵੱਧ ਕੁਝ ਕਹਿਣ ਤੋਂ ਪ੍ਰਹੇਜ਼ ਕਰਨ। ਆਯੁਰਵੈਦ ਦੇ ਵਧੀਆ ਨਾਂਅ ਨੂੰ ਕਿਸੇ ਵੀ ਤਰ੍ਹਾਂ ਖਰਾਬ ਨਹੀਂ ਕਰਨਾ ਚਾਹੀਦਾ। ਸੁਣਵਾਈ ਮੌਕੇਮੈਡੀਕਲ ਸੰਸਥਾਵਾਂ ਵੱਲੋਂ ਸੀਨੀਅਰ ਵਕੀਲ ਕਪਿਲ ਸਿੱਬਲ ਨੇ ਚਾਰ ਅਗਸਤ ਨੂੰ ਹਰਿਦੁਆਰ ਵਿੱਚ ਦਿੱਤੇ ਰਾਮਦੇਵ ਦੇ ਬਿਆਨ ਬਾਰੇ ਦੱਸਿਆ। ਇਸ ਵਿੱਚ ਯੋਗੀ ਰਾਮਦੇਵ ਨੇ ਕਿਹਾ ਸੀ ਕਿ ਅਮਰੀਕੀ ਰਾਸ਼ਟਰਪਤੀ ਟੀਕਾਕਰਨ ਦੇ ਬਾਵਜੂਦ ਤੀਜੀ ਵਾਰ ਕੋਰੋਨਾ ਪੀੜਤ ਹੋਏ ਹਨ। ਸਿੱਬਲ ਨੇ ਕਿਹਾ ਕਿ ਵੀਡੀਓ ਵਿੱਚ ਰਾਮਦੇਵ ਨੂੰ ਕਹਿੰਦੇ ਸੁਣਿਆ ਜਾ ਸਕਦਾ ਹੈ ਕਿ ਮੈਡੀਕਲ ਵਿਗਿਆਨ ਹਾਲੇ ਬਾਲ ਅਵਸਥਾ ਵਿੱਚ ਹੈ ਅਤੇ ਮੈਂ ਬੱਚਿਆਂ ਦੀ ਆਲੋਚਨਾ ਨਹੀਂ ਕਰਨੀ ਚਾਹੁੰਦਾ।