ਵਾਸ਼ਿੰਗਟਨ, 14 ਅਗਸਤ (ਪੋਸਟ ਬਿਊਰੋ)- ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਖਿਲਾਫ ਜਾਸੂਸੀ ਕਾਨੂੰਨ ਦੀ ਸੰਭਾਵੀ ਉਲੰਘਣਾ ਦੀ ਜਾਂਚ ਸ਼ੁਰੂ ਹੋ ਗਈ ਹੈ। ਟਰੰਪ ਦੇ ਫਲੋਰੀਡਾ ਵਾਲੇ ਨਿੱਜੀ ਘਰ ਮਾਰ-ਏ-ਲਾਗੋ ਤੋਂ ਅਮਰੀਕੀ ਜਾਂਚ ਏਜੰਸੀ ਐਫ ਬੀ ਨੂੰ ਕਈ ਕਲਾਸੀਫਾਈਡ ਦਸਤਾਵੇਜ਼ ਮਿਲੇ ਸਨ, ਜਿਨ੍ਹਾਂ ਵਿੱਚ ਕਈ ਬਹੁਤ ਅਤਿ ਗੁਪਤ ਦਸਤਾਵੇਜ਼ ਵੀ ਹਨ। ਐਫ ਬੀ ਆਈ ਨੇ ਬੀਤੇ ਸੋਮਵਾਰ ਨੂੰ ਟਰੰਪ ਦੇ ਘਰ ਦੀ ਤਲਾਸ਼ੀ ਲਈ ਸੀ।
ਵਰਨਣ ਯੋਗ ਹੈ ਕਿ ਅਮਰੀਕਾ ਦੇ ਜਾਸੂਸੀ ਐਕਟ ਤਹਿਤ ਕਿਸੇ ਦੂਜੇ ਦੇਸ਼ ਲਈ ਜਾਸੂਸੀ ਕਰਨਾ ਜਾਂ ਅਮਰੀਕੀ ਜਾਣਕਾਰੀ ਨੂੰ ਅਣ-ਅਧਿਕਾਰਤ ਲੋਕਾਂ ਨਾਲ ਸਾਂਝਾ ਕਰਨਾ ਤੇ ਉਸ ਨੂੰ ਗਲਤ ਤਰੀਕੇ ਨਾਲ ਸੰਭਾਲਣਾ ਗੈਰ ਕਾਨੂੰਨੀ ਹੈ। ਅਜਿਹੇ ਵਿੱਚ ਉਸ ਜਗ੍ਹਾ ਉੱਤੇ ਗੁਪਤ ਦਸਤਾਵੇਜ਼ਾਂ ਨੂੰ ਰੱਖਣ ਤੋਂ ਕਈ ਸਵਾਲ ਉਠ ਰਹੇ ਹਨ ਜਿੱਥੇ ਵੱਡੀ ਗਿਣਤੀ ਵਿੱਚ ਲੋਕ ਆਉਂਦੇ ਹੋਣ।ਰਾਸ਼ਟਰਪਤੀ ਹੁੰਦਿਆਂ ਡੋਨਾਲਡ ਟਰੰਪ ਨੇ ਵੀ ਕਈ ਵਾਰ ਗੁਪਤ ਸੂਚਨਾਵਾਂ ਜਨਤਕ ਕਰ ਦਿੱਤੀਆਂ ਸਨ। ਉਨ੍ਹਾਂ ਰਾਸ਼ਟਰਪਤੀ ਵਜੋਂ ਆਪਣੇ ਮੁੱਢਲੇ ਦਿਨਾਂ ਵਿੱਚ ਰੂਸੀ ਵਿਦੇਸ਼ ਮੰਤਰੀ ਨੂੰ ਇਸਲਾਮਕ ਸਟੇਟ ਦੇ ਖਿਲਾਫ ਇੱਕ ਗੁਪਤ ਮੁਹਿੰਮ ਬਾਰੇ ਦੱਸ ਦਿੱਤਾ ਸੀ। ਵੱਡੇ ਖੇਤਰ ਵਿੱਚ ਫੈਲੇ ਟਰੰਪ ਦੇ ਇਸ ਘਰ ਦੀ ਵਰਤੋਂ ਰਿਜ਼ਾਰਟ ਵਾਂਗ ਹੁੰਦੀ ਹੈ। ਧਨ ਇਕੱਠਾ ਕਰਨ ਲਈ ਆਏ ਦਿਨ ਉਥੇ ਪਾਰਟੀਆਂ ਅਤੇ ਵਿਆਹ ਸ਼ਾਦੀਆਂ ਹੁੰਦੀਆਂ ਹਨ। ਇਨ੍ਹਾਂ ਵਿੱਚ ਵੱਡੀ ਗਿਣਤੀ ਵਿੱਚ ਬਾਹਰੀ ਲੋਕਾਂ ਦਾ ਆਉਣਾ ਜਾਣਾ ਬਣਿਆ ਰਹਿੰਦਾ ਹੈ।
ਡੋਨਾਲਡ ਟਰੰਪ ਜਦੋਂ ਤਕ ਰਾਸ਼ਟਰਪਤੀ ਸਨ, ਉਨ੍ਹਾਂ ਦੇ ਇਸ ਘਰ ਦੀ ਸੁਰੱਖਿਆ ਵਿੱਚ ਖੁਫੀਆ ਸੇਵਾ ਦੇ ਏਜੰਟ ਲੱਗੇ ਹੁੰਦੇ ਸਨ, ਪਰ ਉਨ੍ਹਾਂ ਦੇ ਅਹੁਦਾ ਛੱਡਣ ਪਿੱਛੋਂ ਉਨ੍ਹਾਂ ਉੱਤੇ ਇਸ ਘਰ ਦੀ ਜ਼ਿੰਮੇਵਾਰੀ ਨਹੀਂ। ਟਰੰਪ ਦੇ ਨਿੱਜੀ ਘਰ ਤੋਂ ਵੱਡੀ ਗਿਣਤੀ ਵਿੱਚਕਲਾਸੀਫਾਈਡ ਦਸਤਾਵੇਜ਼ ਮਿਲਣ ਉੱਤੇ ਨਿਆਂ ਵਿਭਾਗ ਨੇ ਚਿੰਤਾ ਪ੍ਰਗਟਾਈ ਹੈ, ਪਰ ਟਰੰਪ ਨੇ ਆਪਣੇ ਇੰਟਰਨੈਂਟ ਮੀਡੀਆ ਪਲੇਟਫਾਰਮਤੋਂ ਇੱਕ ਬਿਆਨ ਵਿੱਚ ਕਿਹਾ ਹੈ ਕਿ ਸਾਰੇ ਦਸਤਾਵੇਜ਼ ਅਨ-ਕਲਾਸੀਫਾਈਡ ਸਨ ਤੇ ਉਨ੍ਹਾਂ ਨੂੰ ਸੁਰੱਖਿਆ ਸਥਾਨ ਉੱਤੇ ਰੱਖਿਆ ਸੀ। ਨਿਆਂ ਵਿਭਾਗ ਦੀ ਸਾਬਕਾ ਅਧਿਕਾਰੀ ਮੈਰੀਕਾਰਡ ਦਾ ਕਹਿਣਾ ਹੈ ਕਿ ਇਹ ਬਹੁਤ ਗੰਭੀਰ ਮਸਲਾ ਹੈ। ਮਾਰ-ਏ-ਲਾਗੋ ਵਿੱਚ ਵਿਦੇਸ਼ੀ ਮਹਿਮਾਨ ਆਉਂਦੇ ਹਨ, ਜਿਨ੍ਹਾਂ ਵਿੱਚ ਦੂਜੇ ਦੇਸ਼ਾਂ ਦੀ ਸਰਕਾਰ ਨਾਲ ਜੁੜੇ ਅਧਿਕਾਰੀ ਤੇ ਏਜੰਟ ਵੀ ਹੋ ਸਕਦੇ ਹਨ।