ਲੰਡਨ, 4 ਅਗਸਤ (ਪੋਸਟ ਬਿਊਰੋ)- ਆਮ ਤੌਰ ਉੱਤੇ ਅਸੀਂ ਜਾਣਦੇ ਹਾਂ ਕਿ ਇਨਸਾਨ ਦੇ ਸਰੀਰ ਵਿੱਚ ਏ, ਬੀ, ਏ-ਬੀ ਅਤੇ ਓ ਪਾਜ਼ੇਟਿਵ ਅਤੇ ਨੈਗੇਟਿਵ ਵਰਗੇ ਬਲੱਡ ਗਰੁੱਪਸ ਹਨ, ਪਰ ਇਨ੍ਹਾਂ ਸਾਰਿਆਂ ਤੋਂ ਵੱਖ ਇੱਕ ਅਜਿਹਾ ਬਲੱਡ ਗਰੁੱਪ ਹੈ, ਜਿਸ ਬਾਰੇ ਬਹੁਤ ਘੱਟ ਲੋਕ ਜਾਣਦੇ ਹਨ ਤੇ ਇਹ ਬਹੁਤ ਘੱਟ ਮਿਲਦਾ ਹੈ, ਇਸੇ ਕਾਰਨ ਇਸ ਨੂੰ ‘ਗੋਲਡਨ ਬਲੱਡ' ਕਿਹਾ ਜਾਂਦਾ ਹੈ। ਇਸ ਬਲੱਡ ਗਰੁੱਪ ਦਾ ਨਾਂ ਹੈ, ਆਰ ਐਚ ਨਿਲ। ਖਾਸ ਗੱਲ ਇਹ ਹੈ ਕਿ ਇਸ ਗਰੁੱਪ ਵਾਲੇ ਖੂਨ ਨੂੰ ਦੂਸਰੇ ਕਿਸੇ ਵੀ ਗਰੁੱਪ ਨਾਲ ਮੈਚ ਕੀਤਾ ਜਾ ਸਕਦਾ ਹੈ। ਇਹ ਬਲੱਡ ਗਰੁੱਪ ਸਿਰਫ਼ ਉਸ ਇਨਸਾਨ ਦੇ ਸਰੀਰ ਵਿੱਚ ਮਿਲਦਾ ਹੈ, ਜਿਸ ਦਾ ਆਰ ਐਚ ਫੈਕਟਰ ਨਿਲ ਹੁੰਦਾ ਹੈ।
ਗੋਲਡਨ ਬਲੱਡ ਗਰੁੱਪ ਵਿੱਚ ਰੈਡ ਬਲੱਡ ਸੈਲਜ਼ ਉੱਤੇ ਕੋਈ ਆਰ ਐਚ ਐਂਟੀਜਨ (ਪ੍ਰੋਟੀਨ) ਨਹੀਂ ਮਿਲਦਾ। ਜੇ ਇਹ ਪ੍ਰੋਟੀਨ ਆਰ ਬੀ ਸੀ ਵਿੱਚ ਮੌਜੂਦ ਹੈ ਤਾਂ ਬਲੱਡ ਆਰ ਐਚ ਪ੍ਰਾਜ਼ੇਟਿਵ ਕਹਾਉਂਦਾ ਹੈ। ਇਸ ਬਲੱਡ ਗਰੁੱਪ ਦੇ ਲੋਕਾਂ ਵਿੱਚ ਆਰ ਐਚ ਫੈਕਟਰ ਨਿਲ ਹੁੰਦਾ ਹੈ। ਅਮਰੀਕਾ, ਕੋਲੰਬੀਆ, ਬ੍ਰਾਜ਼ੀਲ ਤੇ ਜਾਪਾਨ ਵਿੱਚ ਇਸ ਬਲੱਡ ਗਰੁੱਪ ਦੇ ਲੋਕ ਹਨ। ਕਿਹਾ ਜਾਂਦਾ ਹੈ ਕਿ ਦੁਨੀਆ ਵਿੱਚ ਇਹ ਬਲੱਡ ਗਰੁੱਪ ਸਿਰਫ਼ 43 ਲੋਕਾਂ ਵਿੱਚ ਮਿਲਿਆ ਹੈ ਅਤੇ ਸਿਰਫ਼ 9 ਲੋਕ ਹਨ, ਜੋ ਬਲੱਡ ਡੋਨੇਟ ਕਰਦੇ ਹਨ, ਇਸ ਲਈ ਇਸ ਗਰੁੱਪ ਨੂੰ ‘ਗੋਲਡਨ ਬਲੱਡ' ਕਿਹਾ ਜਾਂਦਾ ਹੈ। ਦੁਨੀਆ ਵਿੱਚ ਇਹ ਸਭ ਤੋਂ ਮਹਿੰਗਾ ਬਲੱਡ ਗਰੁੱਪ ਹੈ। ਇੱਕ ਖਾਸ ਗੱਲ ਇਹ ਵੀ ਹੈ ਕਿ ਇਸ ਗਰੁੱਪ ਦਾ ਖੂਨ ਕਿਸੇ ਨੂੰ ਵੀ ਚੜ੍ਹਾਇਆ ਜਾ ਸਕਦਾ ਹੈ, ਪਰ ਜੇਕਰ ਕਿਸੇ ਹਾਲਤ ਵਿੱਚ ਇਸ ਗਰੁੱਪ ਵਾਲੇ ਲੋਕਾਂ ਨੂੰ ਖ਼ੂਨ ਦੀ ਲੋੜ ਹੋਵੇ ਤਾਂ ਪ੍ਰੇਸ਼ਾਨੀ ਹੁੰਦੀ ਹੈ।