ਦੁਬਈ, 3 ਅਗਸਤ (ਪੋਸਟ ਬਿਊਰੋ)- ਭਾਰਤੀ ਕ੍ਰਿਕਟ ਟੀਮ ਏਸ਼ੀਆ ਕੱਪ ਵਿੱਚ 28 ਅਗਸਤ ਨੂੰ ਪਾਕਿਸਤਾਨ ਨਾਲ ਭਿੜੇਗੀ। ਦੋਵੇਂ ਟੀਮਾਂ ਵਿਚਾਲੇ ਚਾਰ ਸਤੰਬਰ ਨੂੰ ਸੁਪਰ ਫੋਰ ਗੇੜ ਵਿੱਚ ਦੂਜੇ ਮੁਕਾਬਲਾ ਹੋ ਸਕਦਾ ਹੈ।
ਇਸ ਬਾਰੇ ਭਾਰਤ ਦੇ ਕ੍ਰਿਕਟ ਕੰਟਰੋਲ ਬੋਰਡ (ਬੀ ਸੀ ਸੀ ਆਈ) ਦੇ ਸੈਕਟਰੀ ਜੈ ਸ਼ਾਹ ਨੇ ਸੰਯੁਕਤ ਅਰਬ ਅਮੀਰਾਤ (ਯੂ ਏ ਈ) ਦੇ ਦੁਬਈ ਵਿੱਚ 27 ਅਗਸਤ ਤੋਂ 11 ਸਤੰਬਰ ਤੱਕ ਟੀ-20 ਵਜੋਂ ਖੇਡੇ ਜਾਣ ਵਾਲੇ ਟੂਰਨਾਮੈਂਟ ਦੇ ਪ੍ਰੋਗਰਾਮ ਦਾ ਐਲਾਨ ਟਵਿਟਰ ਉੱਤੇ ਕੀਤਾ ਹੈ। ਜੈ ਸ਼ਾਹ ਏਸ਼ੀਆਈ ਕ੍ਰਿਕਟ ਕੌਂਸਲ ਦਾ ਮੁਖੀ ਹੈ। ਇਸ ਮੌਕੇ ਉਨ੍ਹਾ ਨੇ ਕਿਹਾ, ‘‘ਉਡੀਕ ਦੀਆਂ ਘੜੀਆਂ ਖ਼ਤਮ। 27 ਅਗਸਤ ਤੋਂ ਏਸ਼ੀਆਈ ਕ੍ਰਿਕਟ ਵਿੱਚ ਵੱਕਾਰੀ ਮੁਕਾਬਲਾ। ਫਾਈਨਲ 11 ਸਤੰਬਰ ਨੂੰ ਹੋਵੇਗਾ। ਏਸ਼ੀਆ ਕੱਪ ਦਾ 15ਵਾਂ ਸੈਸ਼ਨ ਟੀ-20 ਵਿਸ਼ਵ ਕੱਪ ਦੀ ਤਿਆਰੀ ਲਈ ਆਦਰਸ਼ ਹੋਵੇਗਾ।''
ਪ੍ਰੋਗਰਾਮ ਮੁਤਾਬਕ ਭਾਰਤ ਗਰੁੱਪ-ਏ ਵਿੱਚ ਪਾਕਿਸਤਾਨ ਤੇ ਕੁਆਲੀਫਾਇਰ ਟੀਮ ਨਾਲ ਹੈ, ਜਿਸ ਵਿੱਚ ਭਾਰਤ ਤੇ ਪਾਕਿਸਤਾਨ ਦਾ ਭੇੜ 28 ਅਗਸਤ ਨੂੰ ਹੋਵੇਗਾ। ਭਾਰਤੀ ਟੀਮ 31 ਅਗਸਤ ਨੂੰ ਗਰੁੱਪ ਦੀ ਤੀਜੀ ਟੀਮ ਕੁਆਲੀਫਾਇਰ ਨਾਲ ਭਿੜੇਗੀ ਅਤੇ ਪਾਕਿਸਤਾਨ ਟੀਮ ਕੁਆਲੀਫਾਇਰ ਵਿਰੁੱਧ ਦੋ ਸਤੰਬਰ ਨੂੰ ਖੇਡੇਗੀ। ਗਰੁੱਪ-ਬੀ ਵਿੱਚ ਬੰਗਲਾ ਦੇਸ਼, ਸ਼੍ਰੀਲੰਕਾ ਤੇ ਅਫ਼ਗਾਨਿਸਤਾਨ ਦੀਆਂ ਟੀਮਾਂ ਹਨ। ਦੋਵੇਂ ਗਰੁੱਪਾਂ ਦੀਆਂ ਚੋਟੀ ਦੀਆਂ 2-2 ਟੀਮਾਂ ਸੁਪਰ ਫੋਰ ਗੇੜ ਦੇ ਲਈ ਕੁਆਲੀਫਾਈ ਕਰਨਗੀਆਂ। ਇਸ ਦੀ ਕਾਫੀ ਸੰਭਾਵਨਾ ਹੈ ਕਿ ਗਰੁੱਪ-ਏ ਤੋਂ ਭਾਰਤ ਤੇ ਪਾਕਿਸਤਾਨ ਦੀਆਂ ਟੀਮਾਂ ਸੁਪਰ ਫੋਰ ਲਈ ਕੁਆਲੀਫਾਈ ਕਰਨਗੀਆਂ, ਜਿਨ੍ਹਾਂ ਵਿੱਚ ਦੋਵੇਂ ਟੀਮਾਂ ਚਾਰ ਸਤੰਬਰ ਨੂੰ ਫਿਰ ਇੱਕ-ਦੂਜੇ ਨਾਲ ਭਿੜਨਗੀਆਂ।