ਨਿਊ ਯੌਰਕ, 30 ਜੂਨ (ਪੋਸਟ ਬਿਊਰੋ) : ਨਿਊ ਯੌਰਕ ਦੀ ਅੱਪਰ ਈਸਟ ਸਾਈਡ ਵਿੱਚ ਆਪਣੀ ਨਿੱਕੀ ਬੱਚੀ ਨੂੰ ਸਟਰੋਲਰ ਵਿੱਚ ਲਿਜਾ ਰਹੀ ਇੱਕ 20 ਸਾਲਾ ਮਹਿਲਾ ਨੂੰ ਬੁੱਧਵਾਰ ਰਾਤ ਨੂੰ ਗੋਲੀ ਮਾਰ ਦਿੱਤੀ ਗਈ, ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ।
ਇਸ ਮਹਿਲਾ ਨੂੰ ਜਦੋਂ ਗੋਲੀ ਮਾਰੀ ਗਈ ਤਾਂ ਉਹ ਲੈਗਜਿ਼ੰਗਟਨ ਐਵਨਿਊ ਤੇ 95ਥ ਸਟਰੀਟ ਦੇ ਲਾਂਘੇ ਨੇੜੇ ਜਾ ਰਹੀ ਸੀ। ਪੁਲਿਸ ਵੱਲੋਂ ਦਿੱਤੇ ਗਏ ਬਿਆਨ ਅਨੁਸਾਰ ਇਹ ਘਟਨਾ ਰਾਤੀਂ 8:30 ਵਜੇ ਵਾਪਰੀ। ਉਸ ਨੂੰ ਮੈਟਰੋਪੌਲੀਟਨ ਹਾਸਪਿਟਲ ਸੈਂਟਰ ਲਿਜਾਇਆ ਗਿਆ ਜਿੱਥੇ ਉਸ ਨੂੰ ਮਿ੍ਰਤਕ ਐਲਾਨ ਦਿੱਤਾ ਗਿਆ।
ਪੁਲਿਸ ਨੇ ਦੱਸਿਆ ਕਿ 3 ਮਹੀਨੇ ਦੀ ਬੱਚੀ ਨੂੰ ਕੋਈ ਸੱਟ ਫੇਟ ਨਹੀਂ ਲੱਗੀ ਪਰ ਉਸ ਨੂੰ ਮੈਡੀਕਲ ਜਾਂਚ ਲਈ ਹਸਪਤਾਲ ਲਿਜਾਇਆ ਗਿਆ। ਸਿਟੀ ਕਾਊਂਸਲ ਦੀ ਮੈਂਬਰ ਜੂਲੀ ਮੈਨਿਨ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਇਹ ਮਹਿਲਾ ਹੀ ਉਸ ਨਿੱਕੇ ਬੱਚੇ ਦੀ ਮਾਂ ਸੀ। ਉਸ ਦੀ ਪਛਾਣ ਅਜੇ ਜ਼ਾਹਿਰ ਨਹੀਂ ਕੀਤੀ ਗਈ ਹੈ। ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।